1 Korinthia 13 - ꞌBuuk cĩ Thõõth cĩ Nyekuci

Mĩnnan

¹ Má hothoothi naa utugeetinii cĩg eet cĩg looc nicci, hĩ ĩcĩ aajĩleetu nẽ hõllõngaa hammĩnani eet ũgĩ, haaĩ naa hĩ hutuba ꞌcĩ abũ ngõõtĩ haaga.

² Má haꞌnyahi naa ꞌbaaninit ꞌcĩ haduhaanĩ thooꞌthiok cĩg horumwa hĩ gaiinit cĩ thooꞌthiok vẽlẽk ꞌcĩg hõllõngaa agayyi nẽ má haꞌnyahi lemiinit ꞌcĩ occa aaꞌnyĩk muurriok hõtõmõõcõ nẽ aitioonna mĩnnanĩ tõõ, hĩĩnĩ ꞌgiimwa haaga.

³ Má haaꞌnyihi naa hẽlẽggĩ cĩgannĩg vẽlẽk eet ꞌcĩg ĩĩn hullaha nẽ haaꞌnyĩha ẽlẽ caannĩ hũtũũthĩ nẽ aitioonna mĩnnanĩ tõõ, aitiõõ ꞌthẽk ꞌgii ꞌcĩ hammũda naa tõõ.

⁴ Aaꞌnyĩk mĩnnanĩ eet hetemeethito thõõth nẽ aaꞌnyĩk hĩĩtõ tarbalĩg. Hõllõngaa iinan mĩnnanĩ ꞌgiimwa, hode athĩngõõnyanĩ, hode irrianĩ.

⁵ Hõllõngaa aaꞌnyeet mĩnnanĩ tõngõrõrẽẽꞌthĩt, hõllõngaa aaꞌnyĩk mĩnnanĩ eet hũꞌthũũtĩ ẽlẽ cĩnnĩ diooni, hõllõngaa aaꞌnyĩk mĩnnanĩ eet hĩlĩĩlĩ hĩdĩĩkoothong, hõllõngaa aꞌthũũnnĩ mĩnnani mẽdẽr.

⁶ Hõllõngaa accamana mĩnnanĩ thõõth ꞌcĩ abathĩ, nẽẽthĩ, accamana thõõth ꞌcĩ ĩĩn dĩdĩ.

⁷ Eteiini mĩnnanĩ eet hõdõõkõthĩ nẽ aꞌnyak lemiinit hĩ eet hõdõõkõthĩ nẽ aꞌnyak muhẽẽnĩt ꞌcĩ abũnnaa nẽ aalla mĩnnanĩ hõdõõkõthĩ.

⁸ Aitiõõ mĩnnanĩ hõllõngaa adtuunnihi. Nẽẽthĩ, ngaatĩ adukiaanĩ thooꞌthioha ꞌcĩg hatĩ horumwa, au hatĩ abĩlĩ nẽẽgĩ nẽ ngaatĩ õthõõthĩ eeta thooꞌthiohĩ cũũmõ cũũmõ, au hatĩ abĩlĩ nẽẽgĩ, ngaatĩ aayyi ꞌgẽẽnyĩthĩ, aku hatĩ aꞌnginoothi.

⁹ Aitiõõ naag hõllõngaa haga hẽlẽggĩ vẽlẽk nẽ nga hũttũbattoothĩk thooꞌthioha ꞌcĩg adukiaa ꞌcĩg hatĩ nga au horumwa.

¹⁰ Hĩnĩngĩtĩ nga hũttũbanoothĩk ꞌbaaniniti cĩnaac cĩ ꞌgẽẽnyĩthõõ hĩ ꞌgõõl ꞌcĩ hirriooni thõõth cĩ Nyekuci, nẽẽthĩ, ma ikia thõõth ꞌcĩ attũbanoothĩk ko, ũũnnothoothĩk hatĩ thõõth ꞌcĩ nga hũttũbanoothĩk ko.

¹¹ Baa nga hĩĩnĩ naa loholeec ꞌcĩ hidici, baa hothoothi hĩ loholeec ꞌcĩ hidicẽẽnĩ nẽ haꞌnyaha muhẽẽnĩt hĩ loholeec ꞌcĩ hidicẽẽnĩ. Ma baa hĩĩna maka, hikia hũtũngeeha muhẽẽnĩt cĩ hĩdĩꞌthẽẽtõ.

¹² Nẽẽthĩ ꞌyioko, ꞌgii vẽlẽk ꞌcĩ hacĩnĩ naag Nyekuc, aaĩ hĩcĩ hacĩn ꞌthooura cĩnnĩ ꞌcĩ hõllõngaa edeeꞌnyia jurrung maadaraawatõõ. Nẽ hatĩ uruta, hacĩn hatĩ naag ĩnõõnnõ cũrũmũũm. Hõllõngaa haga naag hẽlẽggĩ vẽlẽk, nẽẽthĩ, haga hatĩnĩ, hĩcĩ agayyeet Nyekuci ngagĩĩta.

¹³ Nẽẽthĩ ꞌyioko, aattĩg thooꞌthioha iyyio, lemiinit hĩ muhẽẽnĩt ꞌcĩ abũnnaa hĩ mĩnnan. Nẽẽthĩ, thooꞌthiohĩĩ cĩg vẽlẽk, mĩnnan ꞌcĩ ĩllõõanĩ.