1 Korinthia 12 - ꞌBuuk cĩ Thõõth cĩ Nyekuci

ꞌBaaninit cĩ Loriio

¹ Nẽẽthĩ ꞌyioko, ꞌgotoonoga hĩ ngoonoga, thõõth ꞌcĩ ajinnaangu niig nganĩĩt ꞌbaaninit cĩ Lori ꞌcĩ Ẽllẽẽmĩth ko, hõllõngaa hadiimmuung naa ngagiit herehuung thõõth cieeni.

² Agayyu niig baa nga agaac niig Nyekuc, baa arahannuung ngagiit hẽlẽggĩ ꞌcĩg aarru niig hĩĩtõ nyekuꞌnya nẽ alayyu hẽlẽggĩ ꞌcĩg hõllõngaa õthõõth buúk.

³ Nẽẽthĩ ꞌyioko, hadiimmuung naa ngagiit agaac ĩĩtõ, aitiõõ ẽẽtĩ ꞌcĩ occa õthõõth loriia cĩ Nyekuci hõllõngaa occa accĩĩn Yeesu nẽ aitiõõ ẽẽtĩ ꞌcĩ occa õthõõth aĩ, ĩĩn Yeesu Makayyioohit, hatĩ aitiõõ Lorii ꞌcĩ Ẽllẽẽmĩth hĩ ĩnõõnnõ tõõ.

⁴ Aaꞌnyĩk Lorii ꞌcĩ Ẽllẽẽmĩth eet ꞌbaaninit cũũmõ cũũmõ.

⁵ Mẽẽlĩg dtiicanĩ gẽrrẽẽt, nẽẽthĩ hinnia, odoyyii Makayyioohiti ꞌcĩ hadticanoothĩk naaga.

⁶ Adticanni Nyekuci ꞌgoolliohĩĩ cĩg mẽẽlĩg nẽ Nyekuc nicci dioo ꞌcĩ adtican thooꞌthiok hĩ eet vẽlẽk.

⁷ Aaꞌnyeet Lorii ngagĩĩt hõdẽĩ hõdẽĩ ꞌgõõl ꞌcĩ hadticanõõthĩkĩ ꞌgoonogeet.

⁸ Õthõõth eeta ũgẽẽgĩ hõrggẽẽnaa cĩnaac ꞌgẽẽnyĩtha nẽ othoothito ũgẽẽgĩ thooꞌthiok ꞌcĩg aga nẽẽg jurrung ꞌcĩg aaꞌnyĩk Lorii nicciee diooni.

⁹ Aaꞌnyĩk Lorii eet ũgĩ lemiinit cobbi nẽ aaꞌnyĩk ũgĩ ꞌtirrian ꞌcĩ ẽẽlanĩ eet ꞌcĩg õmmõõrĩ hũbũttaathõ,

¹⁰ nẽ aaꞌnyĩk ũgĩ ꞌtirrian ꞌcĩ adticanĩ thooꞌthiok ꞌcĩg ĩnaat eeta, aaꞌnyĩk eet umwa huduha thõõth ꞌcĩ hatĩ aku horumwa nẽ aaꞌnyĩk eet umwa hittiaman nyeemuut ꞌcĩ aku hĩ Lori cĩ Nyekuci hode hĩ loriẽẽt ũgĩ haaga nẽ aaꞌnyĩk eet umwa hõkõban thooꞌthiok loonyini cũũmõ cũũmõ.

¹¹ Ĩĩn cieeg vẽlẽk dtiicanĩ cĩg Lori hõdẽẽthõng nẽ aaꞌnyĩk nẽẽ eet hõdẽĩ hõdẽĩ hĩcĩ adiim nẽẽnĩ.

Ẽlẽ hõdẽẽthõng ꞌcĩ aꞌnyak dhooriꞌnya ꞌcĩg mẽẽlĩg

¹² Ĩĩn ẽlẽ hõdẽẽthõng, tananga ẽhẽnytaa haꞌnyak dhooriꞌnya ꞌcĩg mẽẽlĩg nẽ tananga mẽẽlĩg dhooriꞌnya cĩgĩnnẽẽgĩ, ĩĩn nẽẽg vẽlẽk ẽlẽ hõdẽẽthõng. Nẽ aaĩ ẽlẽ cĩ Krĩstõ buúk noho.

¹³ Hĩnĩngĩtĩ baa aggamoothĩkeet ngagĩĩt vẽlẽk baattithimo Loriia, hiita hĩĩtõ naag ẽlẽ hõdẽẽthõng, tananga hĩĩgĩn ꞌJudeei hode ꞌGirik hode appahacaaꞌnya hode eet ꞌcĩg hõllõngaa ĩĩn appahacaaꞌnya nẽ baa aaꞌnyĩhoothĩkeet ngagĩĩt vẽlẽk Lorii hõdẽẽthõng ꞌthinneetinii cĩggaac.

¹⁴ Nẽẽthĩ ꞌyioko, baa hõllõngaa ẽhẽnytaa ẽlẽ ĩĩn dhoorit hõdẽẽthõng, baa ẽhẽnytaa aꞌnyak dhooriꞌnya ꞌcĩg mẽẽlĩg.

¹⁵ Nẽ má occa ꞌyioko hĩĩ ꞌthõõtĩ, “Hĩnĩngĩtĩ hõllõngaa hĩĩnĩ naa aꞌthiit, aitiõõ hõllõngaa hĩĩnĩ naa dhoorit cĩ ello,” hĩnĩngĩtĩ thõõth niccia, hõllõngaa occa nẽ iittiõõ hõllõngaa ĩĩn ꞌthõõtĩ dhoorit cĩ ello.

¹⁶ Nẽ má occa ꞌyioko hĩĩ ĩtatĩ, “Hĩnĩngĩtĩ hõllõngaa hĩĩnĩ naa hebereec, aitiõõ hõllõngaa hĩĩnĩ naa dhoorit cĩ ello,” nẽẽthĩ, hĩnĩngĩtĩ thõõth icci, occa hõllõngaa alaam ĩnõõnnõ ngaatĩ ĩĩnnĩ dhoorit cĩ ello.

¹⁷ Nẽ má baa hĩĩ ẽlẽ vẽlẽk hebereec, occa ꞌyioko baa aaĩ nĩngĩtĩ thĩhẽẽttõ ngaana? Má baa hĩĩ ẽlẽ vẽlẽk ĩtat, occa ꞌyioko baa aaĩ nĩngĩtĩ coohittõõ ngaana?

¹⁸ Nẽẽthĩ dĩdĩ, baa ẽꞌthẽdaneek Nyekuci dhooriꞌnya ẽlla, aarĩk ĩhõõggõ vẽlẽk hĩcĩ baallĩ ꞌthẽk adiim nẽẽnĩ.

¹⁹ Má baa hĩĩtõ nẽẽg vẽlẽk dhoorit hõdẽẽthõng, occa baa aaĩ ẽlẽ ngaana?

²⁰ Nẽ hĩ ꞌyioko ho, mẽẽlĩg dhooriꞌnya cĩg ẽllaak, nẽẽthĩ hinnia, odoyyii ẽlẽ.

²¹ Occa hõllõngaa anneek hẽbẽrẽẽcĩ aꞌthiit, “Hõllõngaa hadiimmii naa nganiita!” Nẽ occa hõllõngaa anneek õõ ꞌthoo, “Hõllõngaa hadiimmuung naa ngagiita!”

²² Nẽẽthĩ dĩdĩ, dhooriꞌnya ũgẽẽgĩ cĩg ẽllaak ꞌcĩg aattĩg hĩcĩ hõllõngaa attiran ko, aaddi nẽẽg buúk gẽrrẽẽt ĩllõõanĩ.

²³ Nẽẽthĩ, harrĩcana hinnia naag ngaatĩ hahimti dhooriꞌnya ũgĩ cĩg eleeti cĩggaac. Nẽ hũmmũtĩt dhooriꞌnya ũgĩ cĩg ẽllaak ꞌcĩg aaꞌnyeet ngaaoni, hiittiõõ hõllõngaa edeeꞌnyia.

²⁴ Nẽ dhooriꞌnya ꞌcĩg edeeꞌnyia, hõllõngaa haallak gẽrrẽẽt. Baa arũm Nyekuci dhooriꞌnya vẽlẽk cĩg ẽllaak nẽ aaꞌnyĩk dhooriꞌnya ꞌcĩg hõllõngaa tiirik gẽrrẽẽt hĩĩtõ ꞌcĩg tiirik,

²⁵ baa adĩman nẽẽ hoti, haaꞌnyĩk dhooriꞌnya cĩg ẽllaak vẽlẽk hidticattõõ hõdẽĩ jurrung, ꞌgõõlaa ꞌcĩ aꞌthũũnnĩ ꞌgõõnõgĩ ũgĩ.

²⁶ Má ẽkẽdan dhooriti umwaanĩ, ẽkẽdan ẽlẽ vẽlẽk. Má hõllõngaa ẽkẽdan dhooriti umwaanĩ, accamanoothĩk ẽlẽ vẽlẽk.

²⁷ Nẽẽthĩ ꞌyioko, ĩĩgĩnnu niig ẽlẽ cĩ Krĩstõ nẽ niig hõdẽĩ hõdẽĩ, iiginnu dhoorit cĩ ẽlẽ cĩnnĩ ho.

²⁸ Hõrggẽẽnaa cĩ lothippit cĩ lemmioohu, baa ẽbẽra Nyekuci ĩĩcĩ oou ꞌthooyyiak nẽ ꞌramma cĩnnĩ, ẽbẽra põrõvẽtaaꞌnya nẽ ĩĩcĩ ĩĩn iyyio, ẽbẽra ꞌlimmanniook nẽ ẽbẽra dticcianniook cĩg thooꞌthiok ꞌcĩg ĩnaat eeta nẽ ẽbẽra eet ꞌcĩg aꞌnyak ꞌbaaninit ꞌcĩ aaꞌnyĩkĩ eet hũbũttaathõ nẽ ẽbẽra eet ꞌcĩg ũũlũ ngaatĩ ẽẽlĩ ꞌgõõnõgĩ nẽ ẽbẽra eet ꞌcĩg aꞌnyak ꞌbaaninit ꞌcĩ aggamĩ ꞌgõõnõgĩ nẽ ẽbẽra eet ꞌcĩg õthõõth thooꞌthiohĩ cũũmõ cũũmõ.

²⁹ Aitiõõ hõllõngaa ĩĩn eeta vẽlẽk ꞌthooyyiak. Nẽ hõllõngaa ĩĩn eeta vẽlẽk põrõvẽtaaꞌnya. Nẽ tarĩ, hõllõngaa ĩĩn eeta vẽlẽk ꞌlimmanniook. Aitiõõ hõllõngaa ũũlũ eeta vẽlẽk ngaatĩ adticanĩ thooꞌthiok ꞌcĩg ĩnaat eeta.

³⁰ Hõllõngaa ũũlũ eeta vẽlẽk ngaatĩ aaꞌnyĩkĩ eet ꞌcĩg õmmõõrĩ hũbũttaathõ. Hõllõngaa ũũlũ eeta vẽlẽk ngaatĩ õthõõthĩ utugeetinii ꞌcĩg ꞌrĩĩng. Nẽ hõllõngaa ũũlũ eeta vẽlẽk ngaatĩ õkõbanĩ thõõth ꞌcĩ ꞌrĩĩng hagaacõ eeta.

³¹ Hadiimmuung naa ngagiit ũbũratteek ꞌbaaninit ꞌcĩ tiiri gẽrrẽẽt. Nẽẽthĩ ꞌyioko, heterꞌtheekuung hatĩ naa ꞌgõõl ꞌcĩ ẽllẽẽmĩth gẽrrẽẽt.