1 Korinthia 11 - ꞌBuuk cĩ Thõõth cĩ Nyekuci

¹ Ũnnẽẽc terethiinit caannĩ hĩcĩ hanũ naa terethiinit cĩ Krĩstõ.

ꞌGõõl ꞌcĩ halaiini

² Hirriani naa hĩnĩngĩtĩ ngagiita, hĩnĩngĩtĩ ammuhaannaangu niig nganĩĩt hõdõõkõthĩ nẽ uꞌthuuttu ꞌlimman baa hallimaneekuung naana.

³ Nẽẽthĩ ꞌyioko, hadiimmuung naa ngagiit agaac ĩĩtõ, Makayyioohit cĩ eet ꞌcĩg maacĩg vẽlẽk Krĩstõ nẽ makayyioohit cĩ ngaa ꞌcĩ ngayyi, ẽẽtĩ ꞌcĩ maacẽẽnĩ nẽ Makayyioohit cĩ Krĩstõ Nyekuci.

⁴ Ẽẽtĩ ꞌcĩ alayyi hode aduha thõõth ꞌcĩ hatĩ aku horumwa nẽ ũmmũt õõ thõng, hõllõngaa iꞌngolli nẽẽ Krĩstõ hĩ Makayyioohiti cĩnnẽẽnĩ.

⁵ Nẽ ngaa ꞌcĩ alayyi hode aduha thõõth ꞌcĩ hatĩ aku horumwa nẽ hõllõngaa ammũt õõ cĩnnĩ, hõllõngaa iꞌngolli Krĩstõ hĩ Makayyioohiti cĩnnẽẽnĩ, aduhõõ hĩ ngaatĩ ahũũcẽnĩ õõ cĩnnĩ thõng.

⁶ Má hõllõngaa ammũt ngaa umwa õõ cĩnnĩ, aꞌnyĩĩk hũtũhũũca ĩma cĩgĩnnĩg nẽ má abathĩ ngaatĩ ahũũcanĩ ngaa õõ cĩnnĩ, aꞌnyĩĩk hũmmũt õõ cĩnnĩ thõng.

⁷ Occa hõllõngaa ammũt ẽẽtĩ ꞌcĩ maacĩ õõ cĩnnĩ, hĩnĩngĩtĩ ĩĩn nẽẽ ꞌthooura hĩ bulẽẽnĩt cĩ Nyekuci nẽ ĩĩ ngaa bulẽẽnĩt cĩ eet ꞌcĩ maacĩ.

⁸ Hĩnĩngĩtĩ baa hõllõngaa aku ẽẽtĩ ꞌcĩ maacĩ ngaawaa ꞌcĩ ngayyi, baa aku ngaa ꞌcĩ ngayyi eetaa ꞌcĩ maacĩ;

⁹ nẽ baa hõllõngaa ẽhẽnytaak Nyekuci eet ꞌcĩ maacĩ ngaa ꞌcĩ ngayyi, baa ẽhẽnytaak nẽẽ ngaa ꞌcĩ ngayyi eet ꞌcĩ maacĩ.

¹⁰ Hĩnĩngĩtĩ thõõth icci nẽ hĩnĩngĩtĩ aajĩlẽẽt, aꞌnyĩĩk ngaa ꞌcĩ ngayyi hũmmũt õõ hẽtẽrẽtha aĩ aꞌnyak nẽẽ terethiinit cĩ makaaꞌthĩt cĩnnĩ õõa cĩnnĩ.

¹¹ Eetinii cĩg Makayyiooktak, adiim ngaaĩ eet ꞌcĩg maacĩg nẽ adiim eeta ꞌcĩg maacĩg ngaaĩ.

¹² Hĩnĩngĩtĩ baa aku ngaa eetaa ꞌcĩ maacĩ nẽ ꞌgõõlaa cĩ aduhõõ thõng, arrita ngaa eet ꞌcĩ maacĩ. Nẽẽthĩ, aku ꞌgii vẽlẽk hĩ Nyekuc.

¹³ Ittiamanit da thõõth icci ẽmmẽn. Abũnnaa occa ngaatĩ alaĩ ngaa Nyekuc, hatĩ hõllõngaa ammũt õõ?

¹⁴ Hõllõngaa nooyyia abathĩ hĩ eet ꞌcĩ maacĩ ngaatĩ aꞌnyahĩ ĩma ꞌcĩg uuttik?

¹⁵ Nẽ má aꞌnyak ngaa ĩma ꞌcĩg uuttik, aitiõõ occa hõllõngaa ĩĩn bulẽẽnĩt cĩnnĩ? Hĩnĩngĩtĩ baa aaꞌnyĩhoothĩk ĩnõõnnõ ĩmana ꞌcĩg uuttik hũmmũtĩt õõ cĩnnĩ.

¹⁶ Nẽẽthĩ, má ẽppẽhan eet umwaa thõõth icci, haini naa hõllõngaa haꞌnyak naag nyepitee umwa ꞌcĩ ĩllõõan icci nẽ hõllõngaa aꞌnyak lothippiti cĩ lemmiook cĩg Nyekuci cĩg loonyin cũũmõ cũũmõ buúk, nyepitee ꞌcĩ ĩllõõan icci.

ꞌGẽẽn cĩ Makayyiookto

¹⁷ Nẽẽthĩ, tilooittaa cĩ, occa hõllõngaa hadĩhĩꞌthuung naa ngagiita, hĩnĩngĩtĩ ma ommotoonnu niiga, aꞌnyaku niig thõõth ꞌcĩ abathĩ hĩllõõan bũnnai.

¹⁸ Ĩĩcĩ oou, hathihi naa aĩ, ma au ommotoonnu niig ngaatĩ hõdẽẽthõng hĩ lothippit cĩ lemmioohu, aku aaĩ ngẽrõõnĩtĩ hõrggẽẽnaa cunuung nẽ ꞌgõõlaa umwaanĩ, haga naa ĩĩn dĩdĩ.

¹⁹ Nẽ dĩdĩ, occa ꞌthẽk aaĩ ngẽrõõnĩtĩ hõrggẽẽnaa cunuung, hátĩ hedeeꞌnyia nganĩ hõrggẽẽnaa cunuung ꞌcĩ ẽlẽmĩ Nyekuci.

²⁰ Ma aꞌnyaku niig rũmẽẽnĩt, hõllõngaa ĩĩn ꞌgẽẽn cĩ ꞌjiaatinu cĩ Makayyiookto ꞌcĩ aduku niig ko,

²¹ hĩnĩngĩtĩ ma aduheennu niiga, hõllõngaa ereeyyu eet ũgĩ ꞌcĩg nga aattiyyiaa buúk. Ma adak eet umwa magĩthĩ, adũũtĩ hinnia umwaa thõng.

²² Aitioonnuung ngagiit olooyyioha ꞌcĩg aduheennu hĩ ꞌcĩg ahũdeennu tõõ? Hode arannu niig lothippit cĩ lemmiook cĩg Nyekuci nẽ aanytĩhu ngaaoni haggam eet ꞌcĩg hiꞌthihi ꞌgii ꞌcĩ adahĩ? Ĩcca occa hatĩ hanneekuung naa ngagiit ne? Ĩcca occa hatĩ hadĩhĩꞌthuung naa ngagiit, hĩnĩngĩtĩ thõõth icci? Aitiõõ ũdũt!

ꞌGẽẽn cĩ ꞌjiaatinu cĩ Makayyiookto

²³ Baa Makayyioohit ꞌcĩ aaꞌnya nganĩĩt thõõth ꞌcĩ hakuu haduhaakuung ngagiit ko. Baa attiha Makayyioohiti Yeesu ũbũnĩ baalin baa õhõppõõcaniini nẽẽnĩ,

²⁴ ma baa ĩĩnnĩk Nyekuc ĩlaallẽ, ikia appak nẽẽ ũbũnĩ nicci nẽ ĩĩ, “Ẽlẽ caannĩ cieeni ꞌcĩ aaꞌnyĩhoothĩkuung ngagiita, ĩdĩmanit thõõth icci, hátĩ gõõng ummuktaayyiaangu nganĩĩta.”

²⁵ Nẽ ꞌgõõla hõdẽẽthõng, ittiha nẽẽ hooppo cĩ viinoo nẽ ĩĩ, “Ĩĩn hooppo ciee cĩ lõhõt ꞌcĩ ĩĩn ngeju cĩ biyyi cĩgannĩg, ĩdĩmanit hatĩ gõõng thõõth icci, hatĩ ahuddu biyyi iccig, hátĩ ummuktaayyiaangu nganĩĩta.”

²⁶ Hĩnĩngĩtĩ ma hatĩ gõõng aduku ũbũnĩ icci nẽ uhuddu biyyi iccig, aduhaannu hatĩ daahĩth cĩ Makayyiookto, ĩꞌthõng hatĩ hõbõda nẽẽnĩ.

²⁷ Nẽẽthĩ hoti ho, ẽẽtĩ ꞌcĩ aduk ũbũnĩ hode ahũdĩ hooppoaa cĩ Makayyiookto ꞌgõõlaa ꞌcĩ abathĩ, ẽꞌthẽcan hatĩ nẽẽ ẽlẽ hĩ biyyi cĩg Makayyiooktak.

²⁸ Adiim occa attũhũl ẽẽtĩ ꞌthĩnĩt cĩnnĩ, nga huduk ũbũnĩ hode hũhũd biyyi iccig.

²⁹ Hĩnĩngĩtĩ ẽẽtĩ ꞌcĩ aduk ũbũnĩ icci, hode ahũd biyyi iccig nẽ hõllõngaa ammuk aĩ, ĩĩn ciee ẽlẽ cĩ Makayyiookto, etteedĩk nẽẽ ẽlẽ cĩnnĩ thõõth ꞌcĩ abathĩ.

³⁰ Ĩnõõ thõõth ꞌcĩ appĩĩrnanĩ nẽ otomoorito eeta ꞌcĩg mẽẽlĩg hõrggẽẽnaa cunuung nẽ adaahito ũgẽẽgĩ ho.

³¹ Nẽ má hetteedĩk naag eleeti cĩggaac thõõth jurrung, aitiõõ hatĩ Nyekuci hõllõngaa uukeeta.

³² Ma etteedĩkeet Makayyioohiti ngagĩĩt thõõth, ilootteet nẽẽ ngagĩĩt, hátĩ hiittiõõ hõllõngaa etteedoothĩkeet ngagĩĩt thõõth hõdẽĩ hĩ eet cĩg looc nicci.

³³ Nẽẽthĩ, abũnnaa ꞌgotoonoga hĩ ngoonoga, ma au aduheennu niig ngaatĩ hõdẽẽthõng, ẽrẽẽc nõõ ꞌgoonogu vẽlẽk hiita.

³⁴ Má adakuung magĩthĩ dĩdĩ, udukto nõõ õlõ, hátĩ hiittiõõ hõllõngaa etteedoothĩkuung thõõth hatĩ ommotoonnu ngaatĩ hõdẽẽthõng. Hakuu hatĩ hallimaneekuung naa thooꞌthiok ũgĩ tarĩ hatĩ hikia.