1 Korinthia 10 - ꞌBuuk cĩ Thõõth cĩ Nyekuci

Ma halayyu nyekuꞌnya ꞌcĩg hõllõngaa ĩĩn dĩdĩ

¹ ꞌGotoonoga hĩ ngoonoga, hõllõngaa hadiimmuung naa ngagiit herehuung thõõth baa hĩbaangĩ cĩggaac, baag baangaani horrwaa ꞌcĩ õdõhõhĩĩ kak. Baa ẽtẽrẽth ĩhõõggõ vẽlẽk diith ꞌcĩ uwwattẽẽkĩ ĩhõõggõ nẽ abaaktĩ nẽẽg bũlũc ẽdẽcĩ ꞌgõõl ꞌcĩ õdõhõhĩĩ.

² Baa aggam nẽẽg vẽlẽk baattithimo, hiita hĩĩtõ nuyyiook cĩg Mũũꞌtha diithatõõ hĩ bũlũcatõõ.

³ Baa adak hĩbaangĩ vẽlẽk ꞌgẽẽn hõdẽẽthõng cĩ loriio,

⁴ nẽ ũhũdĩt nẽẽg vẽlẽk maam cĩg loriiak, hĩnĩngĩtĩ baa ahũd nẽẽg maam cĩg lõbarab baa õõkõr hĩ ĩhõõggõ nẽ baa ĩĩn lõbarabĩ niccia Krĩstõ.

⁵ Nẽẽthĩ hoti ho, baa hõllõngaa accamana Nyekuci eet ꞌcĩg mẽẽlĩg hõrggẽẽnaa cĩnĩĩng, nĩngĩtĩ ĩꞌthanõthõõthĩkĩ eleeti cĩggĩĩng horu ꞌcĩ õdõhõhĩĩ kak.

⁶ Nẽ ꞌyioko, baa edeeꞌnyia thooꞌthioha cieeg hĩĩtõ terethiinit, hátĩ heelliaeet ngagĩĩt, hiittiõõ hõllõngaa hadĩman thooꞌthiok ꞌcĩg abathĩ hĩ baa nẽẽgĩ.

⁷ Ma hiiginnu eet ꞌcĩg ala hẽlẽggĩ ꞌcĩg aar eeta hĩĩtõ nyekuꞌnya hĩ baa ala hĩbaangĩ, hĩcĩ eheeddi ꞌBuuhaa cĩ Nyekuci aĩ, “Baa aattĩg eeta loota nẽ udukto nẽ ũhũdĩt mẽrtĩ nẽ ĩtĩngaacõ ũrũgũmĩt hĩdĩmanit thooꞌthiok ꞌcĩg adĩman eeta ꞌcĩg hõllõngaa aga Nyekuc.”

⁸ Occa hõllõngaa hadĩman naag buúk thooꞌthiok ꞌcĩg ĩĩn ꞌriiring, hĩ baa adĩman eeta ũgẽẽgĩ hõrggẽẽnaa cĩnĩĩng nẽ waathĩna hõdẽẽthõng, iita adaahito aalibꞌnya hẽẽn ꞌramma hĩ iyyio (23,000) hõrggẽẽnaa cĩnĩĩng.

⁹ Occa hõllõngaa hattĩman naag Makayyioohit hĩ baa attĩman eeta ũgẽẽgĩ hõrggẽẽnaa cĩnĩĩng nẽ iita adahit ĩhõõggõ hũkaaꞌnya.

¹⁰ Nẽ ma hongoongoyyu hĩ baa õngõõngõ eeta ũgẽẽgĩ hõrggẽẽnaa cĩnĩĩng nẽ ikia uruk aajĩlõ cĩ daahĩthõõ ĩhõõggõ.

¹¹ Baa adĩmanoothĩk thooꞌthioha cieeg ĩhõõggõ, hĩĩtõ terethiinit nẽ baa eheeddi loota hĩĩtõ tilooinit ꞌcĩ ilootteet ngagĩĩt eet ꞌcĩg hõbõktõõ hĩ decciaanĩt cĩ lootu ho.

¹² Nẽẽthĩ hoti ho, má ammuku niig ainnu okommu, uꞌthuutti thĩ eleeti, hátĩ hiittiõõ hõllõngaa etteeddu looc!

¹³ Attĩmaniinnu niig ꞌgõõla hõdẽẽthõng, ĩĩcĩ attĩmaniini eeta vẽlẽk. Nẽẽthĩ, agayyi Nyekuci ngaatĩ occa hõllõngaa aaꞌnyuung ngagiit ĩttĩmattĩ gẽrrẽẽt nẽ eterꞌtheekuung hatĩ nẽẽ ꞌgõõl ꞌcĩ occa hatĩ aꞌnyamannu ꞌtĩmman.

Ũtũbũrĩt karrama cĩ ꞌgii ꞌcĩ aar eeta hĩĩ nyekuc

¹⁴ ꞌGotoonoga hĩ ngoonoga, ma halayyu hẽlẽggĩ ꞌcĩg aar eeta hĩĩtõ nyekuꞌnya ho.

¹⁵ Hothoothikuung naa ngagiit hĩ eeta ꞌcĩg agaacõ thõõth ꞌcĩ hothoothi naa ho ngaatĩ ĩĩnnĩ dĩdĩ.

¹⁶ Ma hahũdĩ naag hooppoa ꞌcĩ hannẽẽkĩ Nyekuc ĩlaallẽ, hõllõngaa ĩĩn niccia ꞌgõõl ꞌcĩ hõthõlĩ biyyi cĩg Krĩstõ? Nẽ ma hẽꞌngẽr naag ũbũnĩ ꞌcĩ haduk thõng, hõllõngaa ĩĩn niccia ꞌgõõl ꞌcĩ hõthõlĩ naag ẽlẽ cĩ Krĩstõ?

¹⁷ Hĩnĩngĩtĩ hõthõl naag ũbũnĩ hõdẽẽthõng, hiita hĩĩtõ naag ẽlẽ hõdẽẽthõng, tananga hĩĩgĩn mẽẽlĩg.

¹⁸ Ummuhuttooth da nõõ eet cĩg Ĩꞌthĩraẽlĩ. Hõllõngaa nooyyia arũm eeta ꞌcĩg adak ꞌgaarrieenit altaarĩa eleeti thõng?

¹⁹ Haini ꞌyioko naa ĩĩn ꞌgaarrieeniti ꞌcĩ ĩbboorothoothĩk ꞌgii ꞌcĩ aar eeta hĩĩ nyekuc ko ꞌgiimwa, hode haini ĩĩn ꞌgii ꞌcĩ aar eeta hĩĩ nyekuc ko ꞌgiimwa haaga?

²⁰ Aitiõõ ũdũt, nẽẽthĩ, ꞌgaarriẽẽna cĩg eet ꞌcĩg hõllõngaa aga Nyekuc, ĩbboorothoothĩk loriẽẽt ꞌcĩg abathĩ, hõllõngaa ĩbboorothoothĩk Nyekuc nẽ hõllõngaa hadiimmuung naa ngagiit otholit ꞌgaarriẽẽn hĩ loriẽẽt ꞌcĩg abathĩ.

²¹ Occa hõllõngaa ahũdeennu niig hooppo cĩ Makayyiookto nẽ uhuddiooyyu hooppo cĩ loriẽẽt ꞌcĩg abathĩ buúk. Occa hõllõngaa othollu niig tẽrẽmẽẽja cĩ Makayyiookto hĩ tẽrẽmẽẽja cĩ loriẽẽt ꞌcĩg abathĩ buúk.

²² Hadiim occa naag hĩkõõtha nyigarthẽẽt cĩ Makayyiookto? Hattiran naag hĩllõõan Makayyioohit?

Ĩdĩhĩthĩt Nyekuc hõdõõkõthĩ

²³ Ainnu niig ũgẽẽgĩ, “Occa hadĩmanna ꞌgii vẽlẽk hĩcĩ hadiimma!” Nẽẽthĩ haduhaakuung dĩdĩ, hõllõngaa occa abũnnaa hode eelluung hẽlẽggĩ vẽlẽk.

²⁴ Aitiõõ ẽẽtĩ ꞌcĩ occa adiim bũnnai cĩ ẽlẽ cĩnnĩ ẽmmẽn tõõ, nẽẽthĩ, occa adiim nẽẽ bũnnai cĩ ꞌgõõnõgĩ ũgĩ buúk.

²⁵ Adahit ꞌgii vẽlẽk ꞌcĩ ũũtĩ ꞌcuuhaa cĩ idiingo, hĩllõõan ngaatĩ aꞌnyaku muhẽẽnĩt ꞌcĩ aĩ, aku baa idingi ciee ĩĩna.

²⁶ Hĩnĩngĩtĩ eheeddi ꞌBuuhaa cĩ Nyekuci aĩ, “Ĩĩn lõõcĩ hĩ hẽlẽggĩ vẽlẽk ꞌcĩg aattĩg loota nĩnga cĩg Makayyiooktak.”

²⁷ Má avvaanni ẽẽtĩ umwaa ꞌcĩ hõllõngaa ĩĩn lemmioohit ꞌgẽẽna nẽ idiim uuhu, bĩĩt nẽẽ nii daak ꞌgẽẽn vẽlẽk ꞌcĩ aaꞌnyĩhoothĩkiina nẽ ma haallahi jinẽẽnĩt umwa ꞌcĩ aku ꞌthĩnĩtaa cunni.

²⁸ Nẽẽthĩ, má iinnihii eet umwaa, “Iding ꞌcĩ baa ĩbboorothoothĩk nyekuc ꞌcĩ hõllõngaa ĩĩn dĩdĩ cieeni,” ma thĩ hadahi, hátĩ ẽla ẽlẽ cunni hĩ eet ꞌcĩ aduhaaki ho buúk.

²⁹ Hõllõngaa hothoothi naa thõõth cĩ ẽlẽ cunni, hothoothi naa thõõth cĩ eet ꞌcĩ aduhaaki nganiit ko. Inni occa hatĩ hĩbĩlĩ muhẽẽnĩtĩ cĩ ꞌthĩnĩt cĩ eet umwa, thõõth ꞌcĩ hadiim hadĩmani naa hĩcĩ hatabi ho?

³⁰ Má hadahi naa ꞌgẽẽn nẽ hĩĩnnĩha Nyekuc ĩlaallẽ, inni hutuburriaa eeta, hĩnĩngĩtĩ ꞌgẽẽn ꞌcĩ hannẽẽkĩ Nyekuc ĩlaallẽ ho?

³¹ Nẽẽthĩ hoti ho, má aduheennu nẽ uhuddieeu hode adĩmannu hẽlẽggĩ ꞌcĩg adiimmu niiga, ĩdĩmanit ĩhõõggõ vẽlẽk hĩĩtõ bulẽẽnĩt cĩ Nyekuci.

³² Ma haĩnanaannu eet umwa hẽttẽẽd looc, hode ꞌJudeeinit hode ꞌGiriheenit hode lothippit cĩ lemmiook cĩg Nyekuci,

³³ tananga hĩcĩ hattĩmani naa haaꞌnyĩk eet haccamattoothĩk ꞌgoolliohĩ vẽlẽk. Hĩnĩngĩtĩ hõllõngaa hadiimi naa bũnnai caannĩ dioo, hadiimi bũnnai cĩ eet ꞌcĩg mẽẽlĩg, hátĩ heellia nẽẽgĩ.