Zabuli 6 - KITAWO MALEŊ

Kwayo ma kony i hongo ma teko

¹ Awi Rwoth, ikir'itiran i nge perin, ikir'imiyan gir'acula i keme perin.

² Awi Rwoth, maki kodan wor, kole aloc! Miyan meni, aol kicutho,

³ aka adundo paran rembo. To inokur kiri keraŋo konyan, Awi Rwoth?

⁴ Awi Rwoth, wire ibothan, gonyan kwoŋ tho ro mar perin makiwire.

⁵ Kole ongoye ŋata poyin i tho, aka ongoye ŋata nyalo pakin i piny pa jom'otho.

⁶ Rem olacan, kisi wor kanindo paran dhiek gi pigi waŋan, muto ma theno wiyan bile gi ywak paran.

⁷ Akinyali neno maber, waŋan jobomere, ro ywak ma jokwor paran jokelo ran.

⁸ Eye win bongan win joreco! Kole Rwoth owinjo derino ma ywak paran.

⁹ Rwoth otieko winjo kwayo paran ri kony, aka go bino dwokan.

¹⁰ Jokwor paran je wiy gin bino kwot to jorembo, ibino riemo jo woko i nyawin abwap.