Zabuli 108 - KITAWO MALEŊ

Kwayo ri Kony kwoŋ jokwor

¹ Cunyan ocwiny, Awi Were, cunyan ocwiny, alawero, t'apakin. Cew, adundo paran!

² Alacew gi tongol kodi dingidi! Alacew i ŋamba.

³ Alafoyin, Awi Rwoth, i dier nonin. Alapakin i dier ji.

⁴ Kole mar perin makiwire bor loyo polo, aka adieri perin tundo i pondeponde.

⁵ Nyuthi meni perin i pondeponde, Awi Were, aka weyi dwoŋ perin wobedi i piny gibe.

⁶ Both wan gi meni perin, dwoki kwayo paran, ŋey ji m'imaro jowobothi.

⁷ Were otieko ciko i ot pere ni, “Alatiako Sekem i loyo, t'apoko milelo ma Sukoth ri ji paran.

⁸ Giliad obedo aparan; Manase obedo aparan; Efrayim obedo junga paran; aka Yuda luth paran.

⁹ Mowab obedo galaya paran ma lwoki, aka kwoŋ Edom abolo war paran, kwoŋ Filistia akoko i loyo.”

¹⁰ Ŋa m'okelan i tindi madwoŋ m'otinda? Ŋa m'otelan i Edom?

¹¹ Adieri ijwango wan, Awi Were? Ikilaŋanjo gi jolweny mawan?

¹² Kony wan kwoŋ jakwor, kole kony pa dhano bukony.

¹³ Gi Were yuthenge mawan walaloyo, go lakikengila jokwor mawan.