Yobu 31 - KITAWO MALEŊ

¹ Atieko timo cikirok gi waŋan, onyo anowanya dhako nedi?

² Aŋo ma Were Majameni Je timo riwan? Go culo wan nedi ri tim mawan?

³ Go kelo teko aka sika woko, jono ma jotimo gimarac.

⁴ Were oŋeyo yo paran, aka go neno woth paran je.

⁵ K'inen atieko woth i kidakana, aka tiendan obedo mayot twodo,

⁶ weyi Were wopima an i rapim m'otire, aka go laneno ni abu banja.

⁷ K'inen aweyo yo m'otire, aka cunyan odhiran timo gimarac,

⁸ kenyo weyi acwoy, aka dhano man wocam, aka weyi gim'afuro wonyekere.

⁹ Ka cunyan otieko kiwanya dhako moro, aka akuro kiyo i kabuti thigo pere,

¹⁰ kenyo weyi dhako paran wotedi ri jacwo man cemo, aka weyi jacwo man wonindi gine.

¹¹ Meno obedo kidakana madwoŋ, aka kite reco no ripo gi gir'acula.

¹² Meno cal mac ma reyo woko piny pa jom'otho, manyalo reyo woko kisi gim'anitie gine.

¹³ K'atieko kwero atoŋa pa ŋecin paran ma mon kodi ma cwo, munyo jogeŋisa kodan,

¹⁴ aŋo m'alatimo k'anocungi ruwaŋ Were? Anodwoki aŋo ka go openjan?

¹⁵ Kole Were acel m'ocweyan i iy mama, ama bende ocweyo ŋecin paran.

¹⁶ An fodi akikwero konyo jacandi, kosa weyo citho candirok.

¹⁷ An akicem kendan nyagwondo, kosa athwono nyathi kic cemo to riyo kec.

¹⁸ An akuro nyathi kic, t'akwonga citho.

¹⁹ An akiweyo dhano m'ongoye gi ruk candirok, kosa akiweyo jacandi bedo m'ongoye gi gium.

²⁰ Ŋa ma fodi k'okwayo ran silwany, kwoŋbedo amiyo go pien rombo paran to umere gine?

²¹ K'atieko kwalo nyathi kic, kareno akanya ni ji jolathielan.

²² K'obedo ameno, weyi badan wofudhere wok i gokan, aka weyi cingan womukere wok i kumbo mere.

²³ Kole oyido alworo teko ma Were nyalo kelo, aka d'akinyalo ciro meni pere.

²⁴ Fodi akiketho geno paran i zahabu, kosa tero zahabu macil paka miseni paran.

²⁵ Fodi akisiemere ro thotho ma lim paran, kosa ro gigipiny kweth m'alimo gi cingan.

²⁶ Fodi akilamo waŋceŋ ka liel, kosa dwe i ŋono mere.

²⁷ Cunyan fodi k'owondan nyaliŋliŋ, aka fodi akicwiyo lwetan ma woro jo.

²⁸ Meno je reco ma ripo gi gir'acula, aka meno bedo ngoye g'adieri ri Were manitie malo.

²⁹ Fodi akisangala ka jokwor paran jocandere, kosa ka joromo gi teko.

³⁰ Fodi akitimo reco gi dhokan, kwoŋo kwo pajo.

³¹ Jono je ma jotiyo ran joŋeyo maber, ni noknok ajolo jokicar.

³² Ajolo jowoth peco paran, aka akiweyo jo nindo i royo.

³³ Fodi akikano reco paran, paka jomegi jotemo timo.

³⁴ Akilworo gima ji jonyalo waco, akidoŋ peco kosa akiliŋ, ni rupiri alworo yet pajo.

³⁵ A, ka bedi oyido nitie ŋata nyalo winjan! Aridho ni gim'awaco obedo adieri, aka weyi Jameni Je wodwokan. Kabedi misegey je ma jakwor kelo kwoŋan, ondiki piny m'anyalo neno jo,

³⁶ adieri dinyo atiŋo i badan, dinyo atweyo kwoŋan paka sangaria.

³⁷ Dinyo awaco ri Were kisi gim'atieko timo, t'aŋanjo ruwaŋe paka jadhum.

³⁸ K'inen atieko kwalo lowo m'afuro, aka amayo wegi mere,

³⁹ k'inen atieko camo cemo mere m'akinyewo, t'amiyo wegi mere tho kec,

⁴⁰ onyo weyi kudhin ama wotw'iye makiweno ŋano, kosa dudi makiweno bale. Me gike ma luwo pa Yobu.