Yobu 10 - KITAWO MALEŊ

¹ Ajok gi kwo paran, akilakano kigeŋisa paran, alaluwo gi keco ma cunyan.

² Alawaco ri Were ni, ikir'ithum ran banja, wac ran aŋey gima miyin imon kodan.

³ Ber rin bedo gi gero? Icayo tic m'atieko timo gi cingan, aka ithiel can pa jokidakana.

⁴ Initie gi waŋ dhano? Ineno gigipiny paka dhano?

⁵ Ndelo perin bende cal gi ndelo pa dhano? Kosa oro perin bende cal gi oro pa dhano?

⁶ Raŋo irango komo paran, gi reco paran.

⁷ Iŋeyo maber ni abu banja, aka ongoye ŋata nyalo botho wok i cingin.

⁸ Cingin am'ocweyan, aka onyo pama iwire reyan woko.

⁹ Mondo poyi ni icweyan paka dak, onyo ilalokan fukefuke kendo?

¹⁰ Imiyan amol paka cak, aka imiyan apoto paka mo dhiaŋ.

¹¹ Irukan gi pien kodi del, aka ikwoyan kanyacel gi cokin kodi fuc.

¹² Imiyan kwo gi mar makiwire, aka dewo perin omiyan akwo.

¹³ Kucel imako gigipiny me i cunyin, aŋeyo ni me oyido obedo atoŋa perin.

¹⁴ K'atimo reco, inenan, aka ikicwaki ran.

¹⁵ K'abedo jakidakana, kidamba ran, k'atimo gim'otire, akilatiŋere malo, kole apoŋ giwickwot, aka aneno litho paran.

¹⁶ Idwaran gi miseni paka simbwor, aka itimo gir'aura perin gi miyan candirok.

¹⁷ Imedo timo gigipiny ma medo litho paran, imedo nge perin kwoŋan, aka itimo can manyen ma monjan.

¹⁸ Raŋo iweyan anywole? Kabedi oyido atho mafodi ongoye ŋat'onenan.

¹⁹ Dinyo ocale paŋini akinywole, wok i ici kadho i bur.

²⁰ Ndelo ma kwo paran kinok? Weyere kodan, ŋey anyal yomo cunyan,

²¹ mafodi akikadho kama ak'odwok'iye, i piny ma rem gi mudho mapek.

²² Piny ma tipo gi nywowirok, kama lero cal mudho.