Yeremia 1 - KITAWO MALEŊ

¹ Kitawo me mako kwoŋ gima Yeremia wod pa Hilikia owaco, acel kwoŋ jocway ri Were i wi migam ma tindi ma Anathoth iy'adec pa Benyamin.

² Rwoth oluwo gi Yeremia i oro mar'apar g'adek ma dhum pa Yosia wod pa Amon, kere ma Yuda.

³ Rwoth oluwo gine kendo munyo wod pa Yosia m'ilwoŋo ni Yehoyakim oyido obedo kere ma Yuda, tundo i gike ma oro mar'apar g'acel ma dhum pa Zedekia wod pa Yosia. I dwe mar'abic ma oro no ji ma Yerusalem oter jo i piny pa Jopath.

Lwoŋo pa Yeremia

⁴ Rwoth owaco ran ni,

⁵ “Mafodi akicweyin i ici, aŋeyin, aka mafodi k'onywolin ayerin ni ibedi jatuci wac Were ri nonin.”

⁶ T'adwoko ni, “Awi Rwoth Were, kole akuya luwo fodi abedo soye.”

⁷ To Rwoth waco ran ni, “Ikir'iwaci ni fodi ibedo soye, to kadhi bongi ji m'aorin bongi jo, aka iwaci rijo kisi gimoro je m'aorin waco.

⁸ Ikir'ilwor jo, rupiri alabedo kodin ma kikwonga in,” Rwoth ama luwo.

⁹ Rwoth otelo cinge, ogeyo dhokan, to waco ran ni, “Eno atieko ketho wac paran i dhokin.

¹⁰ Konon amiyin meni kwoŋ nonin kodi kerin ma fudho gi turo piny, ma reyo gi kikengila, ma geto kodi pidho.”

Menyirok ario

¹¹ Wac pa Rwoth obino ran to penjan ni, “Yeremia ineno aŋo?” Adwoko ni, “Jangi yath mapera.”

¹² Rwoth owaco ran ni, “Itire, aka onyo akuro neno ni wac paran otundo i kare.”

¹³ Kenyo Rwoth oluwo kodan kendo. Openjo ni, “Ineno aŋo man?” T'adwoko ni, “Aneno dak ma walo yumalo, aka cegin ŋile yu kome.”

¹⁴ To Rwoth waco ran ni, “Rerok kidho walo wok yumalo kwoŋ ji je ma jobedo i lowo me,

¹⁵ rupiri alwoŋo nonin ma yumalo.” Apaka Rwoth waco. “Jolabino to jojengo adhumbe pajo i waŋkace ma Yerusalem kodi i kor udi mere thoko, kodi thoko tindin madongo ma Yuda je.

¹⁶ Alamiyo ji paran gir'acula rupiri jotieko timo reco; jotieko jwangan, aka jotieko miyo cowirok ri werin man, jotieko timo cal to jolamo tic ma cingi jo.

¹⁷ Tweyi pierin, Yeremia; kidhi iwaci rijo kisi gimoro je m'aorin waco. Ikir'ilwor jo, rupiri anyalo lokin malwor ruwaŋ jo.

¹⁸ An konon alokin paka tindi madwoŋ m'otinda, siro ma nyweny, gi kor ot ma ywel, i wi lowo je, ri kerin ma Yuda, jotel mere, jocway ri Were mere, kodi ji ma piny.

¹⁹ Jolalweny kodin; to jok'onyalin, rupiri anitie kodin, Rwoth ama luwo, go ma bothin.”