Matayo 5 - KITAWO MALEŊ

Fonji wi Got

¹ Yesu oneno kitipa ji, to idho wi got, aka munyo otieko bedo piny, jofonjirok pere jobino bonge;

² aka ocako fonjo jo.

Kisangala mar'adieri

³ Josilwany a joma candere i cuny gin, kole Ker ma polo obedo apajo.

⁴ Josilwany a joma ywak, kole ibino, kweyo cuny jo.

⁵ Josilwany a jomamwol, kole jobino lunjo piny.

⁶ Josilwany a joma nitie g'awanya madwoŋ, ma timo gima Were yenyo, kole ibino yeŋo jo.

⁷ Josilwany a joma nyutho jowoti gin wor, kole Were bino nyutho jo bende wor.

⁸ Josilwany a joma cuny gin olony, kole jobino neno Were.

⁹ Josilwany a joma kweyo piny, kole ibino lwoŋo jo ni nyithindho pa Were.

¹⁰ Josilwany a joma ilwenyo gi jo ro timo gima Were yenyo, kole Ker ma polo obedo apajo!

¹¹ Win wijosilwany ka ji joyeto win aka jolwenyo gi win, ka jowaco wac je kwoŋ win rupiri wibedo joma luwan.

¹² Yodere win aka wisangala, rupiri kemba mewin obedo m'oasere i polo. Me apaka cango jotimo kiri ri jotuci wac Were macon.

Cumbi kodi lero

¹³ Wibedo cumbi ma piny. To ka cumbi orwenyo woko cwe mere, aŋo manyalo miyo bedo mamit kendo? Lokere gim'ongoye kony; am'omiyo ikonjo woko to ji nyono gi tiendi gin.

¹⁴ Win wiŋati wibedo lero ma piny. Tindi m'oger wi tendere madwoŋ kipanere.

¹⁵ Ongoye ŋata cwinyo tala to riewo i agono; kucel go ripo ŋawo tala no malo kama nyalo miyo lero ri ji je ma ot.

¹⁶ Riameno lero mewin bende ripo menyo iye je ŋey ji jowoneni gima beyo ma witimo to jopako Bawin man polo.

Fonji kwoŋ Cik

¹⁷ Wikiri wipar nike abino ka kwanyo woko Cik pa Musa kodi fonji pa jotuci wac Were, t'abino nyutho dwoŋ mere mar'adieri ayin.

¹⁸ Adieri awaco riwin, ka polo gi piny fodi nitie, ongoye kada gimathin kosa adec m'ondhilo kwoŋ Cik m'ibino kwanyo woko, to bino bedo ama tundo kama gimoro je otieko timer'iye.

¹⁹ Am'omiyo nyatoro je m'okwer winjo kada gimoro nyaka mathin kwoŋ Cik aka ofonji joman bende timo ameno, bino bedo ŋata loyo thino i Ker ma polo. Kucel nyatoro je m'owinji Cik aka ofonji joman bende timo ameno, bino bedo ŋatadwoŋ swa i Ker ma polo.

²⁰ Am'omiyo, awaco riwin ni wikibino nyalo donjo i Ker ma polo kwanyo woko ka wibedo gi leŋo ma kalo apa jondiko kodi Jofarisayo i timo gima Were yenyo.

Fonji kwoŋ nge

²¹ Witieko winjo ni cango owaci ri ji macon ni, ikir'ineki, aka nyatoro je ma janek ibino tero go ruwaŋ jathum banja.

²² To pama onyo awaco riwin ama: Ŋat'omaki nge g'omin bino bedo jabanja kapido. Ŋat'otim roro kwoŋ omin ibino tero go ruwaŋ jothumi banja, aka ŋat'oyeti omin ni, mamiŋ ma bukony, ibino bolo go i mac makitho.

²³ Am'omiyo k'onwaŋo itero mic perin ri Were i wi migam to gikenyo ipoyo nike omerin nitie gi dhaw kodin,

²⁴ weyi mic perin i nyim migam kenyo, kutho ikidhi iyiki wac g'omin in aka nyaka idwoki imiy Were mic perin.

²⁵ Ka dhano nigi wac moro kodin aka mito terin kapido, yik gine wac no ma fodi hongo nitie, kafodi wikitundo kapido. Ka winotundi kenyo, go bino bolin i cingi jathum banja, ma bino kethin i cingi jolweny ma katwec t'itweyin.

²⁶ Ibino bedo kenyo, awaco rin, cuka inocul kiri pesa macowe m'othumi rin.

Fonji kwoŋ turo cik ma nywomirok

²⁷ Witieko winjo paka cango owaci ni, Ikir'itim cot.

²⁸ To pama awaco riwin ama: Ŋata ŋiyo dhako moro aka cunye wanya go, meno otieko timo gine cot gi i cunye.

²⁹ Am'omiyo k'inen waŋin maracuc miyin timo gimarac, goli woko ibol woko! Kole ber ikeŋ adec moro ma delkwoŋin loyo nwaŋo delkwoŋin gipi t'ibolo i mac makitho.

³⁰ K'inen cingin maracuc miyin timo gimarac, ŋondi ibol woko! Rupiri ber iremi cingin acel loyo delkwoŋin gipi kidho i mac makitho.

Fonji kwoŋ riemo dhako

³¹ Cango con owaci ni nyatoro ma riemo woko cege ripo miyo go balwa ma riemo go i ndiko.

³² To pama awaco riwin ni: Nyatoro je m'oriem cege ri wac moro je ma k'obedo wac ma kidakana, meno go miyo cege donjo i cot. Aka ŋata nywomo dhako ma pameno, meno bende timo gine cot.

Fonji kwoŋ kwoŋirok

³³ Witieko winjo paka cango con owaci ni ikir'ikwoŋere ma twodo, to tim gim'ikwoŋere timo ruwaŋ Rwoth.

³⁴ To pama awaco riwin ni: Ikir'ikwoŋere kada mathin k'itimo cikirok, ikir'ikwoŋere gi polo, rupiri meno kom pa Were,

³⁵ kosa gi piny, rupiri meno ka ywomo tiende, kosa gi Yerusalem, rupiri meno obedo tindi pa Kere madwoŋ;

³⁶ Odoko ikir'ikwoŋere gi wiyin, rupiri ikinyal loko kada yer acel matar wobedi macol kosa macol wobedi matar;

³⁷ Waci nyaka ni, “Ey.” Kosa “Be.” Gima kalo kenyo man m'inowaci meno wok bongi Ŋatarac.

Fonji kwoŋ culo kwor

³⁸ Witieko winjo cango con paka owaci ni, waŋ culo kwor gi waŋ, lak bende gi lak.

³⁹ To onyo pama awaco riwin ni: Ikir'iculi kwor kwoŋ ŋata timo rin marac. Ka nyatoro ogoyo lembin maracuc g'adhoŋ, weyi wogoyi lembin maracam bende.

⁴⁰ Aka ka nyatoro oterin i kapido ro yenyo sati perin, weyi go woter kiri kot perin bende.

⁴¹ Aka ka nyatoro oromin woth mayiro acel, woth gine mayiro ario.

⁴² Ka dhano okwayin gimoro, miy go, aka ka nyatoro mito gimoro m'ociko culo, miy go.

Maro jokwor

⁴³ Witieko winjo cango con paka owaci ni mari mere perin, aka dakere kodi jakwor perin.

⁴⁴ To onyo pama awaco riwin ni, mari win jokwor mewin, odoko kway win ri joma timo riwin marac,

⁴⁵ aka nyaka wibino bedo nyithindho pa Bawin manitie i polo; kole go miyo ceŋ pere liel ri ji mareco kodi mabeyo marom, aka go miyo jomabeyo gi joreco je koth.

⁴⁶ Raŋo ma di wigen ni womiy win kemba ka wimaro ji ma bende jomaro win won kende? Jocoki misolo bende jokitim ameno?

⁴⁷ To ka wimothere wiwegi gi wegi, meno witimo ye aŋo m'opokere kodi gima ji man jotimo? Jopath bende jokitim ameno?

⁴⁸ Bedi win maleŋ paka Bawin manitie i polo leŋ.