Malaki 1 - KITAWO MALEŊ

Mar pa Rwoth ri Isiraili

¹ Me wac ma Rwoth omiyo Malaki waco ri Joisiraili.

² Rwoth waco ri ji pere ni, “Atieko maro win, to wipenjo ni, ‘Imaro wan nedi?’ Kucel amaro Yakobo gi nyikwaye

³ t'adak Esau gi nyikwaye; atieko reyo woko piny pere matendere aka ajwango lowo pere ri ogwaŋe madudi.”

⁴ Ka nyikway Esau Joedom jowaco ni, “Orey woko tindin mawan, to wabino geto kendo.” Rwoth pa lwak jolweny waco ni, “Jonyalo rigin geto kendo, t'abino yeco piny, cuka ji jolwoŋ jo ni piny m'odakana, ji ma Rwoth omako nge gi jo kicutho.”

⁵ Ji ma Isiraili jobino neno gime gi waŋ gin wegi, aka jobino waco ni, “Rwoth dwoŋ, kalo kiri kew ma Isiraili.”

Rwoth pusa jocway ri Were i wi migam

⁶ Rwoth pa lwak jolweny waco ama: Nyathi majayac miyo bamere dwoŋ, aka ŋeca miyo jadwoŋ pere dwoŋ. To k'inen abedo bawin, nikune dwoŋ paran? Aka k'abedo jadwoŋ mewin raŋo wikilworan? Win, jocway ri Were i wi migam, wibwono nyingan; aka kucel wipenjo ni, “Wabwono nyingin nedi?”

⁷ Gi kelo ran cemo ma bukony i wi migam paran. Nyaka to wipenjo ni, “Nger aŋo ma wakwero miyin'iye wor.” Gi paro ni migam pa Rwoth bende inyalo bwono.

⁸ Ka wikelo ran ogwaŋe ma waŋ gin otho kosa ma jotwo kosa m'oŋol, wiparo ni ongoye gimarac gi gino? Tem win miyo nger ogwaŋe no ri gavana mewin! Go nyalo kisangala gi win kosa nyutho win ŋono?

⁹ Rwoth pa lwak jolweny waco ni, “Onyo win jocway ri Were i wi migam, tem win kwayo wor pa Were, ŋey go wonyuthi wan bero. Gi nger mic no wok i cingi win, go onyali nyutho win bero.”

¹⁰ Rwoth pa lwak jolweny waco ni, “Kabedi nitie acel kwoŋ win manyalo cego thigo ma ot ma lamo to geŋo win moko mac ma bukony i wi migam paran. Akisangala gi win, aka akibino jolo mic m'owok i cingi win.

¹¹ Ji wok i thenge ma piny tundo i gike jomiyo nyingan dwoŋ. Kisi kamoro jowaŋo ran buban aka jomiyan cowirok t'ajolo. Joje jomiyo nyingan dwoŋ, Rwoth pa lwak jolweny waco.

¹² To wibwono nyingan ka wiwaco ni meza pa Rwoth koc aka ka wimiyo mic ma cemo manyinge wibwono.

¹³ Wiwaco ni, ‘Nga waol gi gime.’ Widienyo ran um win. Paka mic mewin, wikelo ran gim'okwany gi maker, m'oŋol kosa ma two. Wiparo ni anojoli wok i cingi win! Rwoth pa lwak jolweny waco.

¹⁴ Akwoŋo jakwo ma nigi wod rombo kwoŋ mwendi pere, m'ociko miyan, aka miyo Rwoth ma bukony; kole abedo Kere madwoŋ aka nyingan ilworo i dier nonin. Rwoth pa lwak jolweny waco.”