Kwan 8 - KITAWO MALEŊ

Ketho talin

¹ Rwoth oluwo gi Musa, ka waco ni:

² “Luw gi Aron aka iwaci rigo ni, ka ketho talin abirio bino miyo lero joripo ŋiyo yunyim raŋaw tala.”

³ Aron otimo ameno; oketho talin miyo lero ruwaŋ raŋaw tala, paka Rwoth oyido otieko miyo Musa or.

⁴ Ama apaka otim raŋaw tala, wok kwoŋ zahabu m'oodi gi nyundu. Wok i pende tundo i mawuwin mere, obedo tic m'oodi gi nyundu; cungo kwoŋ nger ma Rwoth oyido otieko nyutho Musa, ameno go otimo raŋaw tala.

Lonyo gi miyo Jolevi tic

⁵ Rwoth oluwo gi Musa, ka waco ama:

⁶ Kwany Jolevi wok i dier Joisiraili aka ilony jo.

⁷ Ama apaka ibino timo rijo, ma lonyo jo: Ikiri pi maleŋ kwoŋ jo, imiy jo lielo delkwoŋ jo gi kamweso to jolwoko nangin pajo, ameno jolalony.

⁸ Jobino kwanyo rwath kodi mic ma kodhi mere ma moko m'onuŋere m'oruw gi mo, aka wibino kwanyo rwath man ri mic mareco.

⁹ Ibino kelo Jolevi ruwaŋ Wema ma romo, t'icoko kweth gibe ma Isiraili.

¹⁰ K'ikelo Jolevi ruwaŋ Rwoth, Joisiraili je jobino ketho cingi jo kwoŋ Jolevi,

¹¹ aka Aron bino ketho Joisiraili ruwaŋ Rwoth paka mic m'itiŋo malo wok bongi Joisiraili, ŋey jowonyal timo tic pa Rwoth.

¹² Jolevi jobino ketho cingi jo i wi thwondhe, aka ibino miyo acel ri mic ma cwako reco aka man ri mic awaŋa ri Rwoth, ma timo ŋuto ri Jolevi.

¹³ Kenyo ibino miyo Jolevi cungo ruwaŋ Aron kodi wote, aka ibino miyo jo paka mic m'itiŋo malo ri Rwoth.

¹⁴ Ibino poko Jolevi kwoŋ Joisiraili man, aka Jolevi jobino bedo aparan.

¹⁵ Rumacen mere Jolevi jonyalo donjo to jotimo tic i Wema ma romo, kareno itieko lonyo jo t'iketho jo paka mic atiŋa malo.

¹⁶ Jobedo aparan wok i dier Joisiraili; atieko kwanyo jo ri an won, i kabedo pa kisi nyathi makayo ma kisi ici, nyithindho makayo pa Joisiraili.

¹⁷ Kole nyithindho makayo ma Isiraili je jobedo aparan, ji kodi ogwaŋe. I ndelo m'anek'iye nyithindho makayo je i piny ma Misir aloko jo maleŋ ri an won.

¹⁸ T'atieko kwanyo Jolevi i kabedo pa nyithindho makayo je i dier Joisiraili.

¹⁹ Medo kwoŋ meno, atieko miyo Jolevi paka mic ri Aron kodi wote wok i dier Joisiraili, ma timo tic ri Joisiraili i Wema ma romo, kodi ma timo ŋuto ri Joisiraili, ŋey thoyamo wokiri wobedi i dier Joisiraili ro corok cegin gi Kabedo Maleŋ.

²⁰ Musa kodi Aron gi kweth je mapa Joisiraili jotimo ameno gi Jolevi; Joisiraili jotimo gi Jolevi paka Rwoth oyido otieko miyo Musa or ma mako kwoŋ jo.

²¹ Jolevi jolonyo kwo pajo kwoŋ reco to jolwoko nangin pajo; kenyo to Aron miyo jo paka mic atiŋa malo ruwaŋ Rwoth, to Aron timo kwer ma cwako reco pajo.

²² Rumacen mere Jolevi jodonjo timo tic pajo i Wema ma romo ma kuro Aron kodi wote. Paka Rwoth oyido otieko miyo Musa or ma mako Jolevi, apaka jotimo gi jo.

²³ Rwoth oluwo gi Musa ka waco ama:

²⁴ Me a gima mako kwoŋ Jolevi: Cako oro piero ario g'abic kadho malo jobino cako timo tic ma Wema ma romo;

²⁵ aka cako i oro piero abic, jobino ywomere i tic to jobedo ma jok'otiyo kendo.

²⁶ Jonyalo konyo wutmin jo i Wema ma romo i timo tic pajo, to wegi jokiripi tic. Ameno apaka itimi kodi Jolevi i tic pajo.