Kwan 36 - KITAWO MALEŊ

Gir'alunja pa mon ma jonywomere

¹ Jotel ma pecin ma nonin pa nyikway Giliad wod pa Makir aka nyakwar Manase, janono pa Yozefu, jowok to joluwo ruwaŋ Musa kodi jotel ma pecin ma Isiraili.

² Jowaco ni, “Rwoth owodho or ri jadwoŋ mawan miyo Joisiraili lunjo lowo gi bolo kwir, aka Rwoth owodho or ri jadwoŋ mawan miyo gir'alunja p'omin wan Zelofehad ri nyiki go.

³ To ka jonywomere i nono ma Isiraili man, kenyo gir'alunja pajo ilakwanyo woko wok i gir'alunja pa kwarere pajo t'imedo i gir'alunja ma nono ma jonywomer'iye, aka alunja mawan lamojere.

⁴ Ka oro ma piero abic otundi, kenyo ilamedo gir'alunja pajo i nono ma jonywomer'iye, aka ilapoko woko kwoŋ gir'alunja ma nono pa kwarere mawan.”

⁵ Kenyo Musa owodho or ri Joisiraili cungo kwoŋ wac pa Rwoth ka waco ni, “Nyikway Yozefu jotire i gima jowaco.

⁶ Me apaka Rwoth owodho or kwoŋ nyir pa Zelofehad, ‘Weyi jowonywomere gi ŋata joparo nike ber; kende joripo nywomirok i nono pa bajo.

⁷ I nger no wongoye gir'alunja pa Joisiraili m'ilakodo wok i nono man kadho i nono man. Kole Joisiraili je joripo doŋ gi gir'alunja ma nono pa kwarere pajo.

⁸ Kisi nyathi manyako m'olunji lim i nono moro je ma Isiraili ripo nywomere gi janono pa bamere, ŋey Joisiraili jowomedere lunjo lim ma nono pa kwarere pajo.

⁹ Ongoye lim m'ilakodo wok i nono man kadho i nono man. Kole kisi nono ma Isiraili ladoŋ gi lim pere won.’ ”

¹⁰ Nyir pa Zelofehad jotimo paka Rwoth owodho or ri Musa.

¹¹ Mala, Tiriza, Hogla, Milika kodi Nowa, nyithindho pa Zelofehad jonywomere gi wot wutmin bajo.

¹² Jonywomere i nonin pa nyikway Manase wod pa Yozefu, aka lim pajo odoŋ i nono pa bajo.

¹³ Me or kodi cik ma Rwoth owodho or luwo bongi Musa ri Joisiraili i kam'obipere ma Mowab i thengi malawa Yordan i Yeriko.