Jogalasia 4 - KITAWO MALEŊ

¹ Gim'awaco a me: Nyathi ma jacwo ma kidho lunjo lim pa bamere itero paka ŋeca kafodi go thin, kada go won oyido awon gimoro je.

² Iketho rigo joma kuro go aka jotimo tic pere cuka hongo ma bamere ocano tund'iye.

³ Wan bende munyo fodi wathindho i gigipiny manyacuny onwaŋo wabedo ŋecin pa cunyere ma polo gi piny.

⁴ To munyo hongo m'oyik otundo, Were ooro Wode won, ma dhako won bende am'onywolo, aka obedo i Cik pa Joyuda,

⁵ ŋey wogonyi jom'oyido jonitie i meni pa Cik, aka ŋey nyaka walokere nyithindho pa Were akela.

⁶ Paka wibedo wote, Were ooro Cuny Maleŋ pa Wode i cuny wan, Cuny ma koko ni, “Aba, Baba.”

⁷ Am'omiyo, onyo ikibedo ŋeca, to wode, aka paka ibedo wode, ibino lunjo lim moro je ma Were okano ri wote paka musikin.

Cuny Paulo ramo ri Jogalasia

⁸ I ndir m'okadho oyido wikiŋeyo Were, am'omiyo oyido wibedo ŋecin pa gigipiny ma jok'obedo were m'otire.

⁹ To paka pama onyo witieko ŋeyo Were; kosa weyi awaci ni paka pama onyo Were oŋeyo win, winyalo nedi gik kendo bongi cuny manyap masisiri no? Raŋo ma wimito lokirok ŋecin pajo kendo?

¹⁰ Wimiyo gigipiny moro dwoŋ paka: Ndelo megi, dwe, ndir, kodi oro!

¹¹ Kole cunyan raman, ipoyo ameno tic paran je riwin onyo otho nono.

¹² Akwayo win, wutmera, bedi win paka an, rupiri atieko bedo paka win. Fodi wikitimo ran raco moro.

¹³ Wipoyo ni gim'omiyo afonjo win Wac Manyen Maber kacako obedo two.

¹⁴ To wikicayan kosa kweran, kada two paran no oyido obedo riwin tem. Kucel wijolan paka di wijolo malaika pa Were, kosa Kristo Yesu!

¹⁵ To aŋo m'onyo odoko otimere ma to onwaŋo wisangala? Aka aridho ni onwaŋo winyalo kiri golo woko waŋ win won, bedi nyalere, to wimiyan!

¹⁶ Onyo pama atieko lokere jakwor mewin ro waco riwin adieri?

¹⁷ Jono jonyutho win mar g'atoŋa ma kiber. Gima jomito a nyaka pokan gi win, ŋey wibedi gi paro kwoŋ jo ayino, paka bende jonigi paro kwoŋ win.

¹⁸ Onyo, ber bedo gi paro kwoŋ dhano kodi atoŋa maber, aka meno apaka ripo bedo ndir je, to ki nyaka k'anitie gi win kende.

¹⁹ Nyithindho paran m'amaro swa, kendo ma awinjo gi jo malith pa dhako ma nyathi ramo cuka kiti Kristo wowoki kwoŋ win!

²⁰ An g'awanya adieri ma bedo gi win kanyacel, ni ipoyo d'awiro ye paro m'anitie gine kwoŋ win, rupiri arembo swa riwin!

Ranen pa Hagar kodi Sara

²¹ Weyi apenji win ma fodi wimito bedo ŋecin i Cik: Wikiwinji gima Cik waco?

²² Kole ondiki ni Abraham oyido nitie gi wote ario, acel m'olimo gi dhako m'obedo ŋeca kodi man m'olimo gi dhako man siem.

²³ Wod pa dhako m'obedo ŋeca onywol i yo ma kisi ndelo, to wod pa dhako man siem onywol i cikirok pa Were.

²⁴ Weyi water gime paka ageca riwan: Mon ario me jobedo paka cikirok ario, acel m'owok wi got Sinai, nyithindho pere jobedo ŋecin.

²⁵ Hagar cungo kapa Got Sinai i piny pa Jowarabu; aka go obedo gir'anena kapa Yerusalem ma pama, m'obedo ŋeca kanyacel gi nyithindho pere.

²⁶ To Yerusalem manyapolo nitie i siem, aka go a yok wan.

²⁷ Ato ndiko waco ni, “Sangala, in dhako ma kinywol ma cuka cene oyido fodi k'olimo nyithindho! Galagasa gi kisangala, in ma fodi oyido ikiwinjo ye litho ma nywol! Kole dhako m'oyido ojala onyo bino bedo gi nyithindho madit loyo dhako ma cwore k'oweyo.”

²⁸ Onyo win, wutmera, wibedo nyithindho pa Were ma cikirok pere, paka cango Isaka.

²⁹ Paka i hongo no nyathi m'onywol i yo ma kisi ndelo olwenyo kodi nyathi m'onywol gi meni pa Cuny Maleŋ; apaka bende nitie pama.

³⁰ To ndiko waco nedi? Waco ni, “Riemi woko dhako m'obedo ŋeca kiri gi wode, rupiri wod pa dhako m'obedo ŋeca k'olunji lim pa bamere kanyacel gi wod pa dhako man siem.”

³¹ Am'omiyo, wutmera, wakibedo nyithindho pa dhako m'obedo ŋeca, to apa dhako man siem ayin.