Jogalasia 1 - KITAWO MALEŊ

¹ An Paulo jamoor, ma lwoŋo pere k'owoki bongi dhano kosa kwoŋ dhano, to bongi Yesu Kristo kodi Were Bawan, m'ocerino go kwoŋ jom'otho.

² Jom'oyeyo je ma jo ni ka joriwere kodan dhiro moth ri kweth pa jokristo ma Galasia.

³ Weyi Were Bawan kodi Rwoth Yesu Kristo womiy win nema gi siem.

⁴ Kristo omiyo kwo pere ro reco mawan, ŋey wobothi wan kwoŋ ndir marac ma pama, i mito pa Were mawan ma Bawan.

⁵ Dwoŋ wobedi ri Were cil gi cil! Ameno.

Wac Manyen Maber nitie acel

⁶ Adhier kwoŋ win! I hongo macek won onyo wijala ŋat'olwoŋo win i nema pa Kristo, aka onyo wiluwo wac man ayino,

⁷ ma k'obedo kiri “Wac Manyen Maber!” Nenere paka nitie jomoro ma joruwo paro mewin aka jotemo wiro woko Wac Manyen Maber pa Kristo.

⁸ To kad'obedi wan kosa malaika m'owok i polo am'ofonji win wac man m'opokere kodi ma watieko fonjo win, weyi wothum rijo banja ma kidho i mac makitho!

⁹ Watieko waco gime con, aka onyo odoko awaco kendo: Ka nitie nyatoro ma fonjo win wac man m'opokere kodi ma witieko jolo, weyi wothum rigo banja ma kidho i mac makitho!

¹⁰ Onyo wiparo ni atemo dwaro foy pa ji, kosa apa Were ayin? Kosa wiparo ni atemo kisangala ji? Bedi fodi atemo kisangala ji d'akibedo jatic pa Kristo be.

Paka Paulo olokere jamoor

¹¹ Amito ni wiŋey gime, wutmera: Wac Manyen Maber ma afonjo dhano ama k'ocwogo.

¹² Akinwaŋo wac me kwoŋ dhano, dhano ama k'ofonjan; to, Yesu Kristo won ama onyuthan.

¹³ Kole witieko winjo paka kwo paran oyido nitie munyo oyido amoko i dini Manyayuda, paka alwenyo gi kitipa pa jom'oyeyo Were m'ongoye wor, aka atemo i royo je reyo woko jo.

¹⁴ Onwaŋo atelo Joyuda mathoth ma luse paran i mako dini Manyayuda. Aka onwaŋo aloyo jo gi ridho kula pa kwarere mawan.

¹⁵ To Were won, gi nema pere am'oyeran denge mafodi k'onywolan, to lwoŋan tic rigo.

¹⁶ Aka munyo oridho nyuthan Wode, ŋey afonji Jopath Wac Manyen Maber kwoŋ go, akikidho bongi nyatoro rango rieko,

¹⁷ odoko akikidho Yerusalem neno joma jotelo bedo ran jomoor. T'akidho i piny pa Jowarabu mayot, aka nyaka adwoko Damasiko.

¹⁸ Munyo oro okadho adek, aka nyaka akidho Yerusalem wendo ri Petero, to acowo bonge ndelo apar g'abic.

¹⁹ Akineno jomoor man kwanyo woko Yakobo, omin Rwoth.

²⁰ Aridho riwin ruwaŋ Were ni gim'andiko riwin me k'obedo twodo.

²¹ Rumacen akidho iy'adec ma Siria kodi Silisia.

²² I hongo no je kitipa pa jom'oyeyo i Yuda oyido fodi jokuya an odoco.

²³ Oyido jotieko winjo nyaka gima joman jowaco kende ni, “Jal ma yado lwenyo gi wan onyo pama fonjo yeyo ma go oyido otemo reyo woko!”

²⁴ Gikenyo jopako Were ro wac ma jowinjo kwoŋan.