Kitawo mar'abic mapa Musa m'ilwoŋo ni Cik 4 - KITAWO MALEŊ

Musa miyo or ri Joisiraili bedo joma winjo

¹ Onyo win, Isiraili, winji win, fonji kodi cik m'afonjo win me, kethi win i tim, ŋey winyal kwo, to widonjo lunjo lowo ma Rwoth Were pa kwarere mewin miyo win.

² Wikiripi medo kosa kwanyo woko wac kwoŋ or m'amiyo win, to kur win or pa Rwoth Were mewin m'amiyo win.

³ Witieko neno gi waŋ win gima Rwoth otimo ro wac pa Bal Pewor, kole cwo je ma joluwo Bal Pewor, Rwoth Were mewin oreyo woko jo i dier win.

⁴ Aka win ma wicwire kwoŋ Rwoth Were mewin fodi wikwo konon me.

⁵ Neni, atieko fonjo win or kodi cik paka Rwoth Were paran omiyan or; ŋey winyal kuro i lowo ma wicegin donjo bed'iye.

⁶ Wiripo kuro kodi timo, kole obedo rieko mewin kodi niaŋ mewin ruwaŋ nonin ma jowinji kwoŋe, aka jolawaco ni, “Adieri nono madwoŋ me obedo ji ma joriek aka joniaŋ.”

⁷ To nono madwoŋ mene kendo manitie gi were manitie cegin gi jo paka Rwoth Were mawan kisi ka walwoŋo go?

⁸ Aka nono madwoŋ mene manitie gi or kodi cik paka cik me je m'aketho ruwaŋ win konon?

⁹ To kure win aka wigwokere, ŋey wicwil okir omaki win gi gigipiny ma witieko neno, kosa wiwey joworweny i paro mewin i kwo mewin je. Miy win nyithindho mewin kodi nyikway win ŋeyo,

¹⁰ ndelo ma wicung'iye ruwaŋ Rwoth Were mewin i Horeb, ma Rwoth owaco ran ni, “Coki ran ji, aka alamiyo jo winjo wac paran, ŋey jowofonjere lworan i kwo pajo je i piny, aka ŋey jowofonji nyikway jo.”

¹¹ Wicore cegin aka wicungo i tiendi got aka got oliel mac tundo kiri i polo, i dier pondeponde macol.

¹² Rwoth oluwo gi win wok i mac. Wiwinjo derino ma wac pere to wikineno cal pere, nyaka obedo dwondi go.

¹³ Go owaco riwin cikirok pere, m'omiyo win or kuro, meno Or Apar, aka ondiko i telin mapando ario.

¹⁴ Aka Rwoth omiyan or i hongo no fonjo win or kodi cik, ŋey winyal kuro i lowo ma wicegin donj'iye lunjo.

Gwoko ji kwoŋ lamo cal

¹⁵ Riameno gwokere win, kole wikineno cal pere munyo Rwoth oluwo gi win i Horeb i dier mac;

¹⁶ ŋey wikiri witim gir'amien gi timo cal, i nger moro je, ma jacwo kosa madhako.

¹⁷ Cal mar'ogwaŋ moro je i piny, kosa ma winyo maay i koyo,

¹⁸ cal ma gimoro je ma yware gi kore i lowo, cal ma rec ma pi i pendi piny.

¹⁹ Kosa ka witiŋo waŋ win malo i polo to wineno waŋceŋ, dwe, kodi micalin, kodi lwak ma i polo, wikiri wirweny to wikule piny rijo kodi tiyo rijo, gigipiny ma Rwoth Were mewin omiyo nonin je manitie i pendi polo.

²⁰ To Rwoth okwanyo win to wodho win wok i mac m'okur, wok i Misir, bedo ji pere won, paka wibedo pama.

²¹ Rwoth omako nge kodan kwoŋbedo win, aka okwoŋere nike akiripi ŋado Yordan kodi donjo i lowo maber ma Rwoth Were mewin miyo win paka gir'alunja.

²² Kole aripo tho i lowo me, akiripi ŋado Yordan, to wilaŋado loka, lunjo lowo maber no.

²³ Riameno gwokere win, wicwil okir omaki win gi cikirok ma Rwoth Were mewin otimo gi win, aka wikiri witim cal ma gimoro je ma Rwoth Were mewin otieko kwero riwin.

²⁴ Kole Rwoth Were mewin obedo mac ma reyo woko jo, Were ma janyeko.

²⁵ Ka wilimo nyithindho kodi nyikway win, to wiyindira i lowo no, ka amien omaki win to witimo cal ma gimoro je, aka winotim reco ruwaŋ Rwoth Were mewin, kwinyo nge pere,

²⁶ alwoŋo polo kodi piny bedo jokony kwoŋ win konon nike wilarere woko mayot wok i lowo ma wiŋado Yordan lunjo. Wikilabed'iye ma hongo mabor, to wilarere woko kicutho.

²⁷ Rwoth lakedho win i dier nonin, aka manok kwoŋ win ama jolaboth i dier nonin kama Rwoth oter win'iye.

²⁸ Koro wilatic ri werin man, tic ma cingi ji, m'otimi gi mbawin kodi telin, ma jokinyal neno, winjo, cemo, kosa ŋweyo.

²⁹ Gi koro wilarango Rwoth Were mewin, aka wilanwaŋo go ka winorangi go gi cuny win je kodi adundo mewin je.

³⁰ I litho mewin, ka gime je otieko timere riwin i hongo ma bino, wilagik bongi Rwoth Were mewin to wiwinjo go.

³¹ Kwoŋbedo Rwoth Were mewin obedo Were ma jakisa, go kilajwango win kosa reyo woko win, wiye k'owil gi cikirok m'otimo gi kwarere mewin m'okwoŋere rijo.

³² Kole pama penji win oro ma cen, munyo fodi wingoye, wok i ndelo ma Were cwey ji i piny; penji win wok i gike acel ma polo tundo i man: Nitie gimadwoŋ paka me m'otieko timirok kosa ma cale gine m'otieko winjirok?

³³ Nitie ji ma jotieko winjo dwondi were moro luwo i mac, paka witieko winjo, to jomedo kwo?

³⁴ Kosa nitie were m'otieko temo kadho kwanyo nono wok i piny man rigo won, gi tem, gi ranyuth kodi gir'aura, gi lweny, gi cinge ma meni, gi thoyamo, paka Rwoth Were mewin otimo i Misir ka wineno gi waŋ win.

³⁵ To riwin, onyuthi win, ŋey wiyey nike Rwoth obedo Were, aka ongoye man kendo.

³⁶ Wok i polo, omiyo win winjo dwonde ma tiro win. I piny, onyutho win mac pere madwoŋ, kareno wiwinjo wac pere wok i mac.

³⁷ Aka kwoŋbedo go omaro kwarere mewin, oyero nyikway jo. Go owodho win wok i Misir gi bedo pere, gi meni pere madwoŋ,

³⁸ oriemo woko nonin madongo kendo jomeni loyo win ruwaŋ win, kelo win, miyo win lowo paka gir'alunja, paka obedo konon.

³⁹ Riameno yey win konon aka kethi win i cuny win, nike Rwoth obedo Were i polo malo kodi i piny ka, ongoye man kendo.

⁴⁰ Kur win cik kodi or pere, m'amiyo win or kwoŋe konon me, ri bero mewin kodi nyikway win; ŋey winyal bedo ma hongo mabor i lowo ma Rwoth Were mewin miyo win ma cil gi cil.

Tindin madongo ma pondo yuwok ceŋ ma Yordan

⁴¹ Kenyo Musa oketho gicen yuwok ceŋ ma Yordan tindin madongo adek

⁴² ŋey ŋat'oneko nyawote ma k'ogendera nyalo ring'iye both neki, k'oyido jok'obedo jokwor.

⁴³ Bezer i thim i lowo m'obipere ri nono pa Ruben, Ramoth i Giliad ri nono pa Gad, kodi Golan i Basan ri nono pa Manase.

Yikirok ma miyo cik pa Were

⁴⁴ Me cik ma Musa oketho ruwaŋ Joisiraili.

⁴⁵ Me cik, or kodi fonji ma Musa owaco ri Joisiraili munyo jowok i Misir,

⁴⁶ kalo Yordan i milelo m'oŋiyere gi Beth Pewor, i piny pa Kere Sihon pa Joamor, m'odhumo i Hesibon, ma Musa kodi Joisiraili jokengila munyo jowok i Misir.

⁴⁷ Jomako lowo pere kodi lowo pa Kere Og ma Basan, kerin ario pa Joamor m'oyido jobedo yuwok ceŋ ma Yordan:

⁴⁸ Wok i Arower, manitie i gike ma milelo ma malawa Arinon, tundo kiri i Got Sirion (meno Hamon)

⁴⁹ kanyacel gi Araba gibe yuwok ceŋ ma Yordan tundo kiri i Nam ma Araba, i tiendi Got Pisiga.