Kitawo mar'abic mapa Musa m'ilwoŋo ni Cik 29 - KITAWO MALEŊ

¹ Me wac ma cikirok ma Rwoth omiyo Musa or nike wotim gi Joisiraili i lowo ma Mowab, medo i wi cikirok m'oyido otieko timo gi jo i got Horeb ma bende obedo got Sinai.

Cewo cikirok i Mowab

² Musa olwoŋo Joisiraili je kanyacel aka owaco rijo ni, “Witieko neno gi waŋ win gima Rwoth otimo i lowo ma Misir, ri Farawo kodi ŋecin pere kodi lowo pere je.

³ Thoyamo madongo ma wineno gi waŋ win, ranyuth kodi gir'aura madongo no.

⁴ To Rwoth fodi k'omiyo win paro ma niaŋ, kosa waŋ win ma neno, kosa ithi win ma winjo, kiri konon.

⁵ Atieko telo win oro piero aŋwen i thim, to nangin mewin fodi k'oyec, aka war mewin ma tiendi win fodi k'oti.

⁶ Kole fodi wikicamo mugat, kosa madho vini kosa medho makec, ŋey wiŋey ni An Abedo Rwoth Were mewin.

⁷ Munyo wibino i kabedo me, Kere Sihon ma Hesibon kodi Kere Og ma Basan jobino lweny gi wan, to wakengila jo.

⁸ Wamayo jo lowo pajo aka wamiyo ri nono pa Ruben, Gad kodi adec nono pa Manase paka lim pajo.

⁹ Riameno kur win wac je ma cikirok me, aka witim gi kinen, ŋey winwaŋ bero i gima witimo.”

¹⁰ “Wicungo wicokere konon, wijoje, ruwaŋ Rwoth Were mewin, jotel ma nonin mewin, jodongo, jodhum, cwo je ma Isiraili.

¹¹ Nyithindho mewin, mon mewin, jopath ma jobedo i kambi mewin, jokiranda mbawin mewin kodi jokulo pi riwin.

¹² Konon widonjo i cikirok pa Rwoth Were mewin, i kwoŋirok, ma Rwoth Were mewin timo gi win konon;

¹³ ŋey go wokethi win konon paka ji pere, aka go wobedi Were mewin, paka ociko win kodi paka okwoŋere ri Abraham, ri Isaka kodi ri Yakobo.

¹⁴ Akitim cikirok me, i kwoŋirok gi win kende ma wicungo ka konon ruwaŋ Rwoth Were mawan,

¹⁵ to gi kisi ŋata nitie ka gi wan m'ocungo konon ruwaŋ Rwoth Were mawan, kodi jono ma jongoye ka gi wan konon.

¹⁶ Kole wiŋeyo nger ma wakwo i lowo ma Misir, kodi nger ma wabino ka luwo i dier nonin ma wiluw'iye.

¹⁷ Witieko neno gir'amien ma jotimo, cal ma mbawo kodi telin, ma feza gi zahabu, m'oyido nitie i dier jo.

¹⁸ Wokiri wobedi i dier win jacwo kosa dhako, kosa peco kosa nono, ma cunye owire woko kwoŋ Rwoth Were mawan tiyo ri werin man mapa nonin no. Meno nyalo cale paka fuc ma nyak olemo manitie gi kwir kodi makec.

¹⁹ Ŋata winjo wac ma lam me to miyere silwany, gi paro i cunye ni, ‘Siem ran alaluwo cay ma cunyan.’ (Meno nyalo kelo teko kwoŋ ji marac kodi maber je).

²⁰ Rwoth kilayeyo cwako ri nger ŋato, kole nge pa Rwoth kodi nyeko pere laliel kwoŋe. Lam je m'ondiki i kitawo me laluwo go, aka Rwoth lareyo woko nyingi go wok i pendi polo.

²¹ Rwoth ladimo go wok i nonin je ma Isiraili ri teko, cungo kwoŋ kwoŋirok ma cikirok m'ondiki i kitawo me ma cik.”

²² “Luse ma rumacen, nyithindho mewin ma joluw win jolawaco, kodi japath ma wok i piny mabor swa, jolaneno thoyamo ma lowo no, kodi two ma Rwoth ocando gine.

²³ Lowo mere je owaŋ woko gi mac kodi cumbi, m'ongoye gim'inyalo pidh'iye, ongoye gima twi i iye, ongoye gima nyal dong'iye, paka i rerok pa Sodom, Gomora, Adima kodi Zeboyim ma Rwoth oreyo woko i nge pere kodi i keme pere.

²⁴ Nonin je jolaluwo kwoŋ gima Rwoth otimo ri lowo me ka jopenjere ni, ‘Aŋo m'okelo nyutho nge m'oliel me?’

²⁵ Wegi joladwoko ni, ‘Kwoŋbedo joweyo cikirok ma Rwoth Were pa kwarere pajo otimo gi jo munyo owodho jo wok i lowo ma Misir.

²⁶ Joluwo to jotiyo ri werin man, jolamo werin ma fodi jokuya, ma Rwoth oyido k'omiyo jo.

²⁷ Nge pa Rwoth oliel kwoŋ lowo me to kelo kwoŋe lam je m'ondiki i kitawo me.

²⁸ Rwoth ofudho jo wok i lowo pajo i nge, gero kodi keme madwoŋ, to bolo jo i lowo man paka nitie konon.’ ”

²⁹ “Gigipiny m'opanere obedo apa Rwoth Were mawan, aka gigipiny m'omenyere obedo mawan kodi nyikway wan cil gi cil, timo wac je ma cik me.”