3 Yohana 1 - KITAWO MALEŊ

¹ Balwa m'owok bongi Jadwoŋ. Ri Gayo nyawotan ma kacunyan, m'amaro i adieri.

² Mere paran, akwayo ni gimoro je wokidhi rin maber aka ibedi m'ilama i del, paka cunyin olama.

³ Abedo gi kisangala madwoŋ munyo jom'oyeyo moro jotundo to jowaco paka initie gi genirok i adieri kodi paka ndir je ibedo i adieri.

⁴ Ongoye gima sangala an loyo ka awinjo ni nyithindho paran joluwo adieri.

Pako Gayo

⁵ Mere paran, igenere swa i tic m'itimo ri jom'oyeyo, kada nende jobedo joma ikuya jo,

⁶ aka jotieko luwo ri kitipa pa jom'oyeyo kwoŋ mar perin. Mondo kony jo jowomedere gi woth pajo i royo ma bino kisangala Were.

⁷ Kole jocako tic ri Kristo ma jok'ojolo kony moro je wok bongi joma bu Were.

⁸ Am'omiyo, waripo konyo jome, ŋey wariwere gi jo i tic ri adieri.

Diotirefe kodi Demetro

⁹ Andiko balwa macek ri kweth pa jokristo, to Diotirefe, ma mito bedo marapena i gimoro je, kiyeny dewo kwoŋ gim'awaco.

¹⁰ Am'omiyo, k'abino, alawodho gimoro je ma go otieko timo kamaler: Gigipiny mareco ma go luwo kwoŋ wan, kodi twodo pere. To cale pa meno je kirom go, fodi go kijol jom'oyeyo ka jobino, aka go juko kiri joman ma jomito jolo jo to riemo woko jo i kweth pa jom'oyeyo.

¹¹ Mere paran, ikir'iluw ranen marac no, to luw gimaber mere ayino. Nyatoro je ma timo gimaber bedo apa Were. Aka ŋata timo gimarac meno fodi k'oŋeyo Were.

¹² Dhano je luwo maber kwoŋ Demetro. Aka gir'adieri won ama iluwo kwoŋ go. Wabende waluwo maber kwoŋ go, aka wiŋeyo nike gima wawaco obedo gir'adieri.

Moth macowe

¹³ Onwaŋo anitie gi madit awaca rin, to ak'otim ameno i kalam gi vino.

¹⁴ To ageno nenin mayot, aka nyaka wabino luwo.

¹⁵ Siem wobedi kodin. Merin perin je jodhiro rin moth. Ibende mothi riwan merin mawan je.