2 Samwiri 19 - KITAWO MALEŊ

Loyo lweny lokere kumo

¹ Owaci ri Yowab ni Daudi oyido biyo pi waŋe aka ywak ri Absalom.

² Ameno loyo lweny to lokere ywak ri ji je; rupiri jowinjo ni kere oyido ywako wode.

³ Aka jolweny jogik i tindi madwoŋ liŋ pa jolweny ma wickwot opoŋ kwoŋ jo rupiri joringo wok i lweny.

⁴ Kere oumo waŋe aka ogoyo ndur to ywak ni, “Awi wodan! Wodan Absalom! Absalom wodan!”

⁵ Yowab okidho i ot pa kere aka owaco rigo ni, “Konon me ikwoto wi cwo perin; cwo ma jobotho kwo perin gi kwo pa wotin, nyikin, kiri gi mon perin kodi mon perin ma gi thenge.

⁶ Ikiyere kodi ji ma jomarin, t'ithielo jono ma jodakin. Rupiri inyutho kamaler konon me ni jomituka jolweny perin gi ŋecin perin je bukony rin; rupiri gime nyuthan ni kabedi Absalom kwo, aka wajoje watho konon me, d'osangala in.

⁷ Onyo riameno, ay malo ikadhi ifoy jolweny perin. Rupiri akwoŋere rin i nyingi Rwoth ni k'ikikidho, tundo dikin odikin ongoye kad'acel kwoŋ jo ma ladoŋ kodin. Aka meno bino bedo rin kidamba loyo candirok perin je i kwo perin.”

⁸ Kenyo kere oay malo, aka okidho to bedo i kom pere i waŋkac ma tindi madwoŋ. Cwo pere jowinjo ni go oyido obedo kenyo, aka jobino to jocokere thoko go. Kareno Joisiraili je oyido joringo to jodok pecin pajo.

Daudi cako dok i Yerusalem

⁹ Aka jocako kiŋunyaŋunya i dier jo wegi ka jowaco ni, “Kere Daudi obotho wan wok i cingi jokwor mawan, aka obotho wan wok i cingi Jofilistia; aka onyo pama go oringo oweyo piny kwoŋbedo Absalom.

¹⁰ To Absalom m'oyido wayero paka kere otieko tho. Onyo riameno raŋo wakidwoki Daudi wobedi kere mawan?”

¹¹ Wac m'oyido Joisiraili joluwo otundo ri Daudi. Ameno go ooro jocway ri Were i wi migam, Zadok gi Abiatha kidho penjo jotel ma Yuda ni, “Raŋo wiŋati wibedi macowe konyo kere dwoko i cel pa kere pere?

¹² Wibedo wade paran, delkwoŋan aka remo paran; raŋo wiŋati wibedi macowe dwokan?”

¹³ Daudi bende ooro jo waco ri jacwo m'ilwoŋo ni Amasa ni, “Ibedo wat paran. Wok pama me kadho yuwaŋe, akethin bedo jamituka jolweny paran lunjo waŋ Yowab. Weyi Were wonekan k'akitimo ameno!”

¹⁴ Aka wac pa Daudi oywayo cuny cwo je ma Yuda, aka jodhiro rigo wac ni wodwoki gi jodhum pere je.

¹⁵ Munyo go nitie i yo dok, oromo gi cwo ma Yuda m'oyido jobino Gilgal kwaŋo go woŋadi malawa Yordan.

¹⁶ I hongo acel no won, Simey janono pa Benyamin aka wod pa Gera ma wok i tindi Bahurim, bende oredo loro gi cwo ma Yuda romo gi kere Daudi.

¹⁷ Simey oyido nitie gi cwo gana acel ma jonono pa Benyamin. Aka Ziba, ŋeca ma peco pa Saulo bende obino gi wote apar g'abic kodi ŋecin pere piero ario, aka jotundo i malawa Yordan ruwaŋ kere.

¹⁸ Aka joŋado malawa kwaŋo kere gi jopeco pere, aka jotimo gima go owaco je. Munyo kere oyido yikere ŋado malawa, Simey oriewere ruwaŋ kere

Daudi nyutho Simey wor

¹⁹ aka owaco ni, “Jadwoŋ, mondo wiyin wowil gi raco ma ndelo no atimo munyo iringo weyo Yerusalem. Ikir'imaki i cunyin, aka doko ikir'ipar kada kwoŋe.

²⁰ Aŋeyo jadwoŋ, ni atimo reco; aka am'omiyo an a marapena kwoŋ Joisiraili je bino romo kodin jadwoŋ.”

²¹ Abisay wod pa Zeruya oluwo malo ni, “Simey ripo woneki rupiri okwoŋo ŋata Rwoth oyero bedo kere.”

²² To Daudi waco ri Abisay gi omin go Yowab ni, “Ŋa m'openjo paro mewin? Wimito kelo ran teko? Aŋat'abedo kere ma Isiraili pama, aka ongoye Jaisiraili m'ibino neko konon.”

²³ Aka kere owaco ri Simey ni, “Amiyin wac paran nike kilanekin.”

Daudi nyutho Mefiboseth wor

²⁴ Kenyo Mefiboseth nyakwar Saulo oloro bino romo gi kere. Wok cuka kere ngoye Yerusalem tundo kama kere odwok'iye i siem, Mefiboseth oyido kilwoki tiende, kiliel ye tike, aka kilwoki nangin pere.

²⁵ Munyo Mefiboseth otundo wok Yerusalem romo gi kere, kere openjo go ni, “Raŋo ndelo no ikikadho kodan?”

²⁶ Mefiboseth odwoko ni, “Paka iŋeyo, jadwoŋ paran, aŋol. Awaco ri ŋeca paran ni wogwey punda paran ŋey akadhi kodin, to go wondan.

²⁷ Go otieko nyeko nyingan bongin jadwoŋ paran, to in icale malaika pa Were, riameno tim gim'otire rin.

²⁸ Kole oyido iripo neko jopeco pa baba je jadwoŋ, to iyeyan cemo kodin kanyacel. Aŋo man doko m'anokwayin jadwoŋ!”

²⁹ Kere odwoko ni, “Kiripi doko iwaci giman je. Atieko yere ni in gi Ziba wibino poko lim pa Saulo.”

³⁰ Mefiboseth odwoko ni, “Weyi Ziba wodoŋ gine je. Dwoko perin peco i siem won roman.”

Daudi nyutho Barzilay wor

³¹ Barzilay ma wok i Giliad, bende oyido oloro wok Rogelim kwaŋo kere woŋadi malawa Yordan.

³² Barzilay oyido oti swa, aka jaoro piero aboro. Go oyido oŋaŋ swa, aka oyido bin miyo kere cemo munyo kere oyido bedo Mahanayim.

³³ Kere owaco rigo ni, “Biye wakadhi i Yerusalem, aka abino kurin.”

³⁴ To Barzilay dwoko kere ni, “Kwo paran cek; raŋo akadhi kodin i Yerusalem jadwoŋ?

³⁵ Pama ajaoro piero aboro, aka ongoye gima miyan siem doko. Akiwinji mito ma gim'acamo kosa amadho, aka akinyali winjo kiri dwondi ji ma wero. Alabedo rin bieto jadwoŋ.

³⁶ Akiripi kodi kemba madwoŋ paka ameno. Riameno alakwaŋin nyaka kalo malawa Yordan.

³⁷ Akwayin iyeyan adoki peco atho cegin gi liendi jonywol paran. Wodan Kimham ee, kadhi gi go aka bino bedo ŋeca perin jadwoŋ, aka tim rigo gim'iparo ni ber.”

³⁸ Kere odwoko ni, “Alakadho gi go, aka alatimo rigo gimoro je m'inomiti.”

³⁹ Kenyo Daudi gi cwo pere joŋado malawa Yordan. Daudi ocwiyo lembi Barzilay, aka omiyo go silwany, aka Barzilay odok peco.

Joyuda gi Joisiraili jopiemo ri kere

⁴⁰ Munyo kere otieko ŋado, kareno ji je ma Yuda kodi adec Joisiraili jokwaŋo go, okidho Gilgal, aka Kimham okidho gi go.

⁴¹ Kenyo Joisiraili jokidho bongi kere aka jopenjo go ni, “Jadwoŋ, raŋo wutmin wan, cwo ma Yuda, joparo ni joripo kadho kodin aka jowokwaŋin, jopeco perin, gi cwo perin yuthenge ma Yordan?”

⁴² Cwo ma Yuda jodwoko ni, “Watimo ameno rupiri kere obedo acel kwoŋ wan. Riameno raŋo gime womiy win nge? Go fodi k'onyewo riwan cemo, kosa miyo wan gimoro.”

⁴³ Joisiraili jodwoko ni, “Wanitie gi atoŋa dipar loyo mewin kwoŋ kere, makada nende go obedo acel kwoŋ win. Raŋo wicayo wan? Wiy win wokiri wowil ni waŋati wabedo marapena luwo kwoŋ dwoko kere!” To wac pa cwo ma Yuda oyido gway loyo apa cwo ma Isiraili.