2 Kerin 3 - KITAWO MALEŊ

Lweny i dier Isiraili kodi Mowab

¹ I oro mar'apar g'aboro ma dhum pa kere Yehosafat ma Yuda, Yehoram wod pa Ahab obedo kere ma Isiraili i Samaria, aka odhumo ma oro apar g'ario.

² Otimo reco ruwaŋ Rwoth, makada nende k'obedo marac paka bamere kodi min Yezebel; oturo woko cal pa Bal ma bamere oyido lamo.

³ Kucel paka kere Yerobowam wod pa Nebat m'otelo dhum rigo, omiyo Isiraili timo reco ma k'onyalo weyo.

⁴ Onyo kere Mesa ma Mowab oyido kuro rombo aka kisi oro oyido miyo kere ma Isiraili wot rombo 100,000 kodi pien rombo 100,000.

⁵ To munyo kere Ahab ma Isiraili otho, Mesa ogwenyere kwoŋ kere ma Isiraili.

⁶ Ameno kere Yehoram oeye Samaria i hongo no to coko jolweny ma Isiraili je kanyacel.

⁷ Odhiro wac ri Yehosafat kere ma Yuda ni, “Kere ma Mowab otieko gwenyirok kwoŋan, inoriwere kodan lweny gi go?” Yehosafat odwoko ni, “Ey, ayere aka kiri cwo paran kodi kayinin paran.

⁸ Royo mene ma wabino luwo?” Yehoram odwoko ni, “Gi yuthim ma Edom.”

⁹ Ameno kere ma Isiraili okadho gi kere ma Yuda kodi kere ma Edom. Aka munyo jotieko ŋanjo ma ndelo abirio, pi orumo rijo amadha ri cwo pajo kodi ogwaŋe pajo.

¹⁰ Kenyo kere ma Isiraili owaco ni, “Kidamba! Rwoth olwoŋo kerin adek me miyo jo i cingi Jomowab!”

¹¹ Yehosafat openjo ni, “Jatuci wac Were ongoye ka ma wanyalo penjo Rwoth luwo i go?” Jatel pa jolweny pa Yehoram acel odwoko ni, “Elisa wod pa Safat m'okonjo pi i cingi Elia nitie ka.”

¹² Kere Yehosafat owaco ni, “Go obedo jatuci wac Were m'otire.” Ameno kerin adek joloro bongi Elisa.

¹³ Elisa openjo kere ma Isiraili ni, “Raŋo akonyin? Kadhi bongi jotuci wac Were ma benin kodi yokin jopenjo.” Yehoram odwoko ni, “Be, obedo Rwoth ama olwoŋo kerin adek me miyo jo i cingi Jomowab.”

¹⁴ Elisa odwoko ni, “Paka Rwoth pa lwak jolweny m'atiyo rigo kwo, ka bedi oyido akiwor kere Yehosafat ma Yuda, dinyo angoye gi gir'atima kodin.

¹⁵ Onyo keli ran jawer.” Aka munyo jawer tuko tongol pere, meni pa Rwoth obino kwoŋ Elisa,

¹⁶ aka owaco ni, “Rwoth waco ni, ‘Abino miyo jwombe me poŋ gi pi.’

¹⁷ Kole Rwoth waco ni, ‘Wikibino neno koyo kosa koth, to pi bino poŋ i jwombe ŋey win, dhok mewin, kodi ogwaŋe mewin wimadhi.’

¹⁸ Me gima sisiri ruwaŋ Rwoth, go bende bino miyo Jomowab i cingi win,

¹⁹ aka wibino mako kisi tindi madwoŋ m'otinda, wiredhi kisi yen maber, wicegi waŋ pi je to wiloko gunda kisi adec lowo maber ka wiumo gi telin.”

²⁰ Yawere odikin, i hongo ma miyo cowirok noknok, pi owok yuthenge ma Edom to umo piny.

²¹ Munyo Jomowab jowinjo nike kerin adek jobino monjo jo, olwoŋi cwo je ma jonyalo lwenyo wok kwoŋ madongo tundo kwoŋ mathindho t'iketho jo i kew.

²² Munyo jocewi yawere odikin, waŋceŋ oyido liel wi pi, to miyo cale pa remo.

²³ Jomowab jowaco ni, “Manago remo! Kerin adek jolwenyo wegi to jonekere. Onyo weyi wakadhi wanyaga kambi pajo.”

²⁴ To munyo jotundo i kambi pa Joisiraili, Joisiraili joay aka jomonjo Jomowab, cuka joringo kwoŋ jo. Joisiraili jomedere riemo Jomowab ka joneko jo

²⁵ kodi reyo tindi pajo madongo. Aka i kisi adec lowo maber kisi Jaisiraili obolo iye tele cuka oumere. Joculo woko waŋ pi to jotoŋo yen maber. Nyaka tindi madwoŋ Kiri Heres ama odoŋ aka josumulo jothoko to jomonjo.

²⁶ Munyo kere ma Mowab oneno nike k'oloy lweny, okwanyo cwo pere 700 ma jonitie g'abor to temo rirok i dier jokwor ringo bongi kere ma Siria to k'onyalo.

²⁷ Ameno okwanyo okayo pere m'oyido ripo lunjo jo paka kere, to miyo paka cowirok ri were ma Mowab i wi kor ot ma tindi madwoŋ. Joisiraili jobwok aka jogik wok i tindi madwoŋ to jodok i piny pajo.