2 Kerin 17 - KITAWO MALEŊ

Kere Hoseya ma Isiraili

¹ I oro mar'apar g'ario ma dhum pa Ahaz kere ma Yuda, Hoseya wod pa Ela obedo kere ma Isiraili, aka odhumo i Samaria ma oro abuŋwen.

² Otimo reco ruwaŋ Rwoth, to ki paka kerin ma Isiraili ma jopen dhum rigo.

³ Kere Salimanesa ma Asiria ocako lweny gi Hoseya, Hoseya otiŋo cinge malo rigo, to cako culo go misolo kisi oro.

⁴ To oro acel, Hoseya ooro jomikwenda bongi kere So ma Misir, aka oweyo culo misolo ri Siria. Munyo Salimanesa oŋeyo gime omako Hoseya to ketho go i katwec.

Podho pa Samaria

⁵ Kenyo Salimanesa omonjo Isiraili aka othoko Samaria ma oro adek.

⁶ I oro mar'abuŋwen ma dhum pa Hoseya, kere ma Asiria omako Samaria, aka otero Joisiraili i Asiria paka jotwec lweny. Oketho jo bedo i tindi madwoŋ Hala, megi cegin gi malawa Habor iy'adec ma Gozan, aka megi i tindin madongo ma Madiya.

⁷ Samaria opodho kwoŋbedo Joisiraili oyido jotimo reco ruwaŋ Rwoth Were pajo, m'obotho jo wok i cingi Farawo kere ma Misir to wodho jo wok i Misir kam'oyido jolamo iye werin man.

⁸ Oyido joluwo kwer pa ji man ma Rwoth oyido oriemo jo woko ruwaŋ Joisiraili, kodi kwer ma kerin ma Isiraili oyido jocako.

⁹ Joisiraili jotimo gigipiny ma Rwoth Were pajo okwero rijo. Jogeto kalamo werin man i kisi tindi pajo, wok kwoŋ calin mathindho tundo kwoŋ tindin madongo loyo.

¹⁰ Joketho sirin ma tele kodi cal pa were madhako Asera i wi tendere je kodi i tiendi yen madongo.

¹¹ Jowaŋo buban i wi migam manyakafir je, ka joluwo tim pa ji ma Rwoth oriemo woko i lowo no. Jokwinyo nge pa Rwoth gi tim pajo ma kidakana,

¹² aka jok'oluwo Or pa Rwoth ma waco nike ikir'ilam cal.

¹³ Kucel Rwoth oyido ooro jomikwenda pere kodi jotuci wac Were gwoko Joisiraili kodi Joyuda ni, “Wire win kwoŋ tim mewin mareco aka wikuri Or paran kodi cik paran, cungo kwoŋ cik je m'amiyo kwarere mewin, kodi m'amiyo win luwo kwoŋ jotuci wac Were.”

¹⁴ To jok'onyalo winjo, kwanyo woko jobedo gi wictek paka kwarere pajo, ma jok'oyeyo i Rwoth Were pajo.

¹⁵ Jocayo cik pa Rwoth, kodi cikirok m'otimo gi kwarere pajo aka jokwero winjo fonji pere. Jolamo cal ma bukony aka wegi bende jolokere ji ma bukony, to joluwo kwer pa nonin m'othoko jo, ma Rwoth oyido owodho or nike jokiri jowotimi paka jo.

¹⁶ Joturo cik pa Rwoth Were pajo aka jotimo cal ma rwath ario gi nyweny to jolamo, jo bende jotimo cal pa were madhako Asera, jolamo micalin, to jotiyo ri were m'ilwoŋo ni Bal.

¹⁷ Jomiyo nyithindho pajo paka mic awaŋa ri werin manyakafir, jothiedho, aka jomiyere kicutho timo reco ruwaŋ Rwoth, to jokwinyo nge pere.

¹⁸ Riameno Rwoth omako nge gi Isiraili to kwanyo jo woko ruwaŋe aka oweyo keri ma Yuda kende.

¹⁹ To ji ma Yuda bende jok'okuro Or pa Rwoth Were pajo, joluwo kwer ma Joisiraili jocako.

²⁰ Rwoth ojwango Joisiraili je, omiyo jo gir'acula, to miyo jo i cingi jokwor mager cuka okwanyo jo woko ruwaŋe.

²¹ Munyo Rwoth otieko tiako woko Isiraili kwoŋ Yuda, oketho Yerobowam wod pa Nebat bedo kere pajo. Yerobowam omiyo jo kwero Rwoth, to miyo jo timo reco madwoŋ.

²² Joisiraili jotimo reco ma Yerobowam oyido timo,

²³ cuka Rwoth okwanyo jo woko ruwaŋe, paka oyido owaco luwo kwoŋ ŋecin pere jotuci wac Were. Ameno oter Joisiraili bedo jowiloka i Asiria kama fodi jobed'iye.

²⁴ Kere ma Asiria okelo ji wok i tindin madongo, Babilon, Kuth, Iva, Hamath, kodi Sefavayim to joloko tindin madongo i Samaria apajo makiweno Joisiraili.

²⁵ Munyo nyaka jocako bedo kenyo, jok'olamo Rwoth, aka Rwoth odhiro simbwore m'oneko megi kwoŋ jo.

²⁶ Ameno t'iwaco ri kere ma Asiria nike ji m'oketho i tindin madongo i Samaria jokuya cik pa were ma lowo no, aka riameno were odhiro simbwore m'oyido neko jo.

²⁷ Kere ma Asiria owodho or nike wodwoki acel kwoŋ jocway ri Were i wi migam m'oyido jotero paka jatwec wobedi kenyo ka fonjo ji cik pa were ma lowo no.

²⁸ Ameno acel kwoŋ jacway ri Were i wi migam m'oyido jotero obino to bedo i Bethel, aka ofonjo nger ma lworo Rwoth.

²⁹ To ji m'oyido jobedo i Samaria jomedere timo cal, aka joketho i sawin ma Joisiraili oyido jogeto. Kisi kitipa jotimo cal i tindin madongo m'oyido jobed'iye.

³⁰ Ji ma Babilon jotimo cal pa were Sukoth Benoth, ji ma Kuth jotimo cal pa Nagal, ji ma Hamath jotimo cal pa Asima,

³¹ ji ma Iva jotimo cal pa Nibihaz kodi Tartak, aka ji ma Sefavayim jomiyo nyithindho pajo paka cowirok ma mic awaŋa ri werin pajo Adramelek kodi Anamelek.

³² Jome oyido jolamo Rwoth, aka joyero ji m'opokere bedo jocway ri Were i wi migam i kalamo pajo manyakafir kodi miyo cowirok rijo kenyo.

³³ Ameno jolamo Rwoth, to bende jolamo werin pajo cungo kwoŋ kwer pajo ma piny ma jowok'iye.

³⁴ Kiri konon me fodi joluwo kwer pajo macon. Jokilam Rwoth aka jokiluwi cik kodi Or pere m'omiyo nyikway Yakobo, m'ocwoko nyinge ni Isiraili.

³⁵ Rwoth oyido otimo gi jo cikirok aka omiyo jo or ni, “Wikiri wilam werin man, wikiri wikule piny rijo kosa wotiy rijo kosa wimiy jo cowirok.

³⁶ Wiripo winjan, Rwoth, m'owodho win wok i Misir gi dwoŋ kodi meni; wiripo kule ran piny to wimiyan cowirok.

³⁷ Wiripo luwo cik kodi Or m'andiko riwin. Wikiri wilwor werin man,

³⁸ aka wiwin wokiri wowil gi cikirok m'atimo gi win.

³⁹ Wiripo winjan, Rwoth Were mewin, aka abino botho win kwoŋ jokwor mewin.”

⁴⁰ To jono jok'onyalo winjo, aka jomedere luwo kwer pajo macon.

⁴¹ Ameno jono jolamo Rwoth, to bende jolamo cal pajo, aka kiri konon nyikway jo jomedere timo gimoro acel.