1 Timothe 6 - KITAWO MALEŊ

¹ Ŋecin je joripo tero rwodhe pajo paka joma ripo amiya dwoŋ, aka nyaka moro k'oluwi marac kwoŋ nyingi Were kodi fonji mawan.

² Ŋecin ma rwodhe pajo joyeyo Kristo jokiripi cayo jo, rupiri jobedo jom'oyeyo jowot jo. Kucel joripo tiyo rijo maber loyo, rupiri joma limo kony kwoŋ tic pajo jobedo jom'oyeyo m'omar. Iripo fonjo gi tito gigipiny me.

Fonji ma twodo kodi ŋaŋo mar'adieri

³ Ŋata fonjo fonji m'opokere aka kiyere gi wac m'otire mapa Rwodhiwan Yesu Kristo kodi fonji kwoŋ lworo Were,

⁴ meno opoŋ gi pakirok kende, aka ongoye gim'oŋeyo. Go nitie g'awanya ma kiber ma piem gi dhaw kwoŋ wac, aka me kelo nyeko, tiakirok, nyeko nyingi jo, kodi ŋico kicar,

⁵ gi laro gigipiny i dier ji ma paro pajo kitiy aka jongoye kodi adieri. Joparo ni tic pa Were obedo royo ma limo ŋaŋo.

⁶ Kole nitie kemba madwoŋ ri dhano i lworo Were kodi i tero gima go nitie gine paka romo go,

⁷ rupiri ongoye gima wakelo i piny, aka ongoye gima wabino kwanyo wok i piny ka.

⁸ Am'omiyo, ka wanitie gi cemo kodi ruk, meno won ripo romo wan.

⁹ To joma jomito ŋaŋo jopodho i karatem to jomoko i bwo pa awanya. Aka jodonjo iy'awanya ma miŋo ma kelo litho, ma tero ji i nyekirok kodi i rerok woko.

¹⁰ Kole maro pesa ama wok'iye reco ma nger je. Jomegi jobedo g'awanya mathoth ri pesa am'omiyo jopodho woko i yeyo aka jokelo gut madwoŋ i cuny gin.

Paulo oro Timothe

¹¹ To in, dhano pa Were, eye kwoŋ gigipiny no je. Lweny ri tiro, lworo Were, yeyo, mar, ciro teko, kodi mwolo.

¹² Tem paka inyalo lwenyo lweny maber ma yeyo, aka inolimi kwo makirum, kole me a kwo ma Were olwoŋin'iye munyo ituco maber yeyo perin ruwaŋ jom'oneno mathoth.

¹³ Ruwaŋ Were ma miyo gimoro je kwo, kodi Kristo Yesu m'otuco maber yeyo no ruwaŋ Ponsio Pilato, aorin

¹⁴ winjo gi kuro m'olony or pa Were ma bu raco, cuka Ndelo ma Rwoth Yesu Kristo omenyer'iye.

¹⁵ Menyirok pere no Were won bino kelo i ndir pere, Were ma Jasilwany odoko won a Jadhum kende, Kere pa kerin, kendo Rwoth pa rwodhe.

¹⁶ Go kende ama kitho, go bedo i lero ma moro kinyal core cegin gine. Ongoye ŋata fodi oneno go, odoko ongoye ŋata nyalo neno go. Ri go dwoŋ wobedi kodi meni ma cil gi cil. Ameno.

¹⁷ Or jom'oŋaŋ i kwo ma piny me ni kiri jowokwoti, kosa ketho geno pajo kwoŋ gigipiny ma kigenere paka ŋaŋo, to kwoŋ Were ayino, ma poko wan gimoro je ma kisangala mawan.

¹⁸ Or jo timo gima beyo, jowoŋaŋ i tic mabeyo, jowobedi jomiyo munyo jopoko gigipiny gi joman.

¹⁹ Ameno aka jobino coko ŋaŋo ma bino konyo jo i hongo ma bino, ŋey jowonyal limo kwo mar'adieri.

²⁰ Timothe, kuri maber gim'okethi i cingin kuro. Eye i luwo ma kimakere gi Were kodi piem kwoŋ “Ŋeyo wac.” Gimoro ma miŋo paka jomoro jolwoŋo ameno ma twodo,

²¹ rupiri jomegi joŋoyo ni jonigine, to gim'owok'iye jorwenyo woko gi royo ma yeyo. Nema wobedi gi win.