1 Samwiri 24 - KITAWO MALEŊ

Daudi kwero neko Saulo

¹ Munyo Saulo odwoko wok i lweny gi Jofilistia, owaci rigo ni Daudi oyido nitie i thim Engedi.

² Saulo oyero cwo 3,000 kwoŋ cwo pere, to jokidho rango Daudi gi cwo pere yuthenge ma got diegi dudi.

³ Daudi gi cwo pere oyido jonitie i ŋungu tele cegin gi sidwol rombo dho royo. Kenyo bende ama Saulo obino to donjo iye konyirok.

⁴ To cwo pa Daudi jowaco rigo ni, “Me ndelo ma Rwoth owaco rin ni, ‘Neni, abino ketho jokwor perin i cingin t'itimo gi jo gima cunyin mito.’ ” To Daudi rweta to ŋado tiendi law pa Saulo ma Saulo k'oŋeyo.

⁵ Rumacen cuny Daudi ocako podho, rupiri go oŋado tiendi law pa Saulo.

⁶ To Daudi waco ri cwo pere ni, “Rwoth wogeŋan timo gimarac ri jadwoŋ paran; ŋati ma go oyero paka kere! Akiripi timo gimarac rigo kada mathin, rupiri Rwoth am'oyero go.”

⁷ Ameno Daudi odwoŋo cwo pere gi wac me, aka k'oyeyo jo monjo Saulo. Saulo oay malo to wok i ŋungu tele to kadho.

⁸ Daudi owok aka olwoŋo Saulo, “Jadwoŋ paran kere!” Aka munyo Saulo owire to ŋiyo yuŋeye, Daudi obwonere rigo to kulo wiye piny.

⁹ Daudi owaco ri Saulo ni, “Raŋo iwinjo wac pa ji ma jowaco rin ni amito nekin?

¹⁰ In won bende neni gi waŋin ni konon me Rwoth oyido omiyan in i cingan i ŋungu tele. Cwo paran man jowaco ran ni anekin t'akwero. Awaco ni, ‘Akibino ketho cingan kwoŋ jadwoŋ paran; rupiri in iŋati Rwoth owiro gi mo bedo kere.’

¹¹ Neni, baba, neni oselo law manitie i cingan me; dinyo anekin, to aŋado tiendi law perin. Me ma nyuthin ni, angoye gi gimarac aka akiwire rin. Ongoye gimarac m'atieko timo rin kada nende irango nekan.

¹² Weyi Rwoth wothum ran kodin banja. Rwoth womiyin gir'acula ro gim'itimo ran; to an akibino timo rin gimarac kada mathin.

¹³ Iŋeyo ageca ma waco ni, ‘Tim marac wok bongi jomarac.’ Riameno akibino timo rin gimarac.

¹⁴ Neni gima kere ma Isiraili mito neko! Neni gima go riemo! Gwok m'otho, lwaŋino me.

¹⁵ Weyi Rwoth wothum ran kodin banja, aka wowaci ŋatarac. Weyi go wonen wac me, wogwokan, aka wobothan wok i cingin.”

¹⁶ Munyo Daudi otieko luwo, Saulo openjo Daudi ni, “Meno dwondin won, wodan Daudi?” Aka Saulo otiŋo dwonde malo to goyo ndur.

¹⁷ Saulo owaco ri Daudi ni, “Itire loyan; rupiri inyuthan bero t'atimo rin gimarac.

¹⁸ Konon inyuthan bero perin ran, rupiri ikinekan, makada nende Rwoth omiyin an i cingin.

¹⁹ Didi ma nyatoro mako jakwor pere to weyo go kadho ma k'otimo rigo gimarac? Rwoth womiyin silwany ro gim'itimo ran konon.

²⁰ Onyo pama, panen, anitie gi ridho ni ilabedo kere ma Isiraili, aka ker ma Isiraili bino doŋ i cingin.

²¹ To kwoŋere ran i nyingi Rwoth ni k'anotho ikibino neko nyikwayan, aka ikibino reyo woko nyingan i ot pa baba.”

²² Daudi okwoŋere ri Saulo. Saulo odok peco to Daudi gi yac pere jogik kam'oyido jopond'iye.