Zabuli 140 - KITAWO MALEŊ Catholic

Kwayo ma kikwonga

¹ Bothan, Awi Rwoth, kwoŋ ji mareco; kuran maber kwoŋ jogwayo,

² ma jocano reco i cuny jo, to jotugila lweny noknok.

³ Jotimo lew jo mabith paŋini lew thwol, aka dhok jo nitie kwir ma cal apa malasaŋ.

⁴ Kwonga an, Awi Rwoth kwoŋ cingi jokidakana; kwonga an kwoŋ ji magway, ma jotieko timo can ma camo tiendan gi piny.

⁵ Jogero jotieko ciko an g'apor malo, jotieko ciko bwo ma makan i thengi royo.

⁶ Awaco ri Rwoth ni, “Ibedo Were paran; ciki ithin iwinji ywak paran, Awi Rwoth!”.

⁷ Awi Rwoth, Rwoth paran, jaboth paran ma jameni, iŋat'iumo wiyan i hongo ma lweny.

⁸ Ikir'iwinji, Awi Rwoth, awanya pa jokidakana; ikir'iyey jowomedere gi can pajo mareco.

⁹ Jono ma jothokan jotiŋo wiy gin malo, weyi paro ma colo manitie i dhok jo wogiki rijo.

¹⁰ Weyi cuk mac m'odheth wopodhi kwoŋ jo, weyi jowoyikere i bur, jokiri jowocerino kendo.

¹¹ Weyi jar'awaca nyingi jokiri jowokwo i piny; weyi reco wokengila jogwayo i yoto.

¹² Aŋeyo ni Rwoth thielo ŋata nitie i litho, aka thumo banja gi tiro ri jacandi.

¹³ Adieri jom'otire jolafoyo nyingin; ji mabeyo jolabedo ruwaŋin.