Yowel 3 - KITAWO MALEŊ Catholic

Rwoth lathumo banja ri nonin

¹ Kole i ndelin no kodi hongo no, m'abino dwoko silwany pa Yuda gi Yerusalem;

² Alacoko nonin je kanyacel, t'akelo jo piny i milelo pa Yekosafat. Alathumo banja rijo kenyo, ro ji paran kodi alunja paran Isiraili, kwoŋbedo jotieko kedho jo i dier nonin, jopoko Isiraili lowo paran.

³ Jobolo kwir ri ji paran, jotana yac paran ri malayin, to jotana nyir ri vini, ŋey jowomedhi.

⁴ Wibende wibedo aŋo ran, awi Tire kodi Sidon, g'adec je ma Filistia? Wiculan ma gimoro? Ka wiculan, aladwoko cul mewin, kwoŋ wiwegi ma dwir kendo ma piyo.

⁵ Kole witieko kwanyo feza gi zahabu paran, aka witieko tero lim paran maber i ot pa were mewin.

⁶ Witieko kitana ji ma Yuda kodi ji ma Yerusalem ri ji ma Gris, ŋey witer jo bor g'adec pajo won.

⁷ Kole acegin kitugila jo, wok i kabedo ma witieko kitan'iye jo, aka kenyo alawiro tim mewin wogiki kwoŋ win.

⁸ Alakitana wot win kodi nyiki win, luwo i cingi ji ma Yuda, aka jolakitana jo ri Josabin, ri nono mabor koro, kole Rwoth otieko luwo.

Thumo banja i milelo pa Yekosafat

⁹ Tuci gime i dier nonin, yik lweny, tugila jolweny, weyi jowocore cegin, weyi cwo ma jolweny je, jowokadhi malo.

¹⁰ Goy win kwe mewin ma fur wolokere abor, aka musalauyo mewin jowolokere abore; weyi ŋata nyap wowaci ni, “Abedo jalweny.”

¹¹ Redi wibin, awi nonin je thoko, cokere win kenyo. Keli piny jolweny perin, awi Rwoth.

¹² Weyi wotugila jo, weyi nonin je jowokadhi malo i milelo pa Yekosafat; kenyo alabedo thumo banja, ri nonin je thoko.

¹³ Lwogi ringa, inyar jo paka ikeco. Biye nyon jo paka idhiŋo vini, ma poŋ de jooy i nywero, kole kidakana pajo oasere.

¹⁴ Lwak ji kodi lwak ji, i milelo ma thumo banja! Kole ndelo pa Rwoth orikere, i milelo ma thumo banja.

¹⁵ Waŋceŋ kodi dwe jolokere macol, aka micalin joweyo liel.

Were lamiyo ji pere silwany

¹⁶ Rwoth lakihola wok i Zayon, to miyo dwonde winjirok wok i Yerusalem, polo kodi piny jolayengere. To Rwoth obedo kabwok ri ji pere, kodi kapondo ri Joisiraili.

¹⁷ Wilaŋeyo nike An, Rwoth Were mewin, abedo i Zayon, got ma leŋo paran. Yerusalem labedo Kabedo Maleŋ, aka jokicar jok'oluw'iye kendo.

¹⁸ I ndelo no, gote jolathono vini mamit, tendere jolamol gi cak, aka jwombe je ma Yuda jolamol gi pi; pi ma mol lakitula wok i Ot pa Rwoth to dhieko milelo ma Sitim.

¹⁹ Misir lalokere kam'ojwangi, aka Edom thim m'ojwangi, ro gwayo m'otimi ri ji ma Yuda, ma i lowo pajo jooyo remo pa ji ma bubanja.

²⁰ To Yuda labedo cil gi cil, kodi Yerusalem i luse gi luse.

²¹ Alaculo kwor ri remo pa ji m'oneki, aka ak'owey jobanja m'akimiyo jo gir'acula, kole Rwoth bedo i Zayon.