Yobu 38 - KITAWO MALEŊ Catholic

Rwoth dwoko Yobu

¹ Kenyo Rwoth odwoko Yobu wok iy'asur.

² Meno ŋa ma umo rieko, gi wac nono m'okuya?

³ Ridhi pierin paka jacwo, alapenjin, aka iladwokan.

⁴ In oyido initie kune munyo ageto kindi piny? Waci ran k'initie gi niaŋ.

⁵ Ŋa m'omiyo rapim ma piny, aka ŋa m'ocero bol mere, iŋeyo radwok ma penji me je?

⁶ Iŋeyo kama pendi piny okuny'iye, kosa iŋeyo ŋat'oketho telin ma sondin mere?

⁷ I hongo no micalin m'odikin jowero kanyacel, aka cwec ma polo jokoko ro kisangala.

⁸ Ŋa m'ocego nam gi thigin, munyo omwoc wok i pendi piny?

⁹ Aŋat'aumo nam gi pondeponde, t'aumo gi mudho m'opoto.

¹⁰ Aŋat'aketho kew ri nam, t'acego gi petin kodi thigin.

¹¹ Awaco ri nam ni, “Ilagik ka, aka ikilakalo ka, aka asur perin lagik gi ka.”

¹² Yobu, i kwo perin je, itieko ye wodho or ni piny woyuthi to yawere,

¹³ Itieko wodho or ri odikin woumi piny, aka jokidakana jowoyengere i kapondo pajo?

¹⁴ Odikin wire paka lowo m'omwon'iye cingi jo, aka cungo m'oruwo rangi paka law.

¹⁵ Lero pa jokidakana ngoye woko, aka cingi jo lokere manyap timo akaka.

¹⁶ Itieko ye donjo i waŋ pi ma nam, kosa itieko wotho i dier wakawaka?

¹⁷ Itieko neno waŋkac ma tho, kosa itieko neno waŋkace ma piny pa jom'otho?

¹⁸ Itieko ŋeyo laco ma piny gibe? Dwokan, k'inen iŋeyo gime je.

¹⁹ Nitie kune royo ma kidho kama lero wok'iye, kodi kama mudho caker'iye gine?

²⁰ Inyalo tero jo i kabedo pajo, kosa inyalo nyutho jo royo ma dok?

²¹ Adieri iŋeyo, kwoŋbedo itegino, aka oro perin thoth.

²² Itieko ye donjo i kakan ma tor, kosa itieko neno kakan ma pe?

²³ Akano jo ri hongo ma teko, ri ndelo ma lweny gi gorok.

²⁴ Nitie kune royo ma kidho kama lero poker'iye gine, kosa kama koyo ma yuwok ceŋ kedher'iye i piny?

²⁵ Ŋa m'okunyo fereji ma koth cw'iye gine, aka ŋa m'obaro royo ri mwoc koth?

²⁶ Ŋa ma miyo koth cwe kama ji jokibed'iye, i thim, kam'ojwangere?

²⁷ Ŋa ma dhieko piny kam'othwo gi thim?

²⁸ Koth nitie gi bamere, kosa nitie ŋat'onywolo thoyo ma thon?

²⁹ Pi m'omakere owok i iy ŋa, aka ŋa m'onywolo tor ma wok i polo?

³⁰ Pi lokere matek paka tele, aka ŋico wi nam.

³¹ Inyalo tudo kanyacel micalin abirio m'ilwoŋo ni Pileyades, kosa gonyo thol ma mako kanyacel kitipa ma micalin m'ilwoŋo ni Orion?

³² Inyalo telo micalin to joneno i hongo pajo m'otire, kosa inyalo telo arara gi nyithindhe?

³³ Iŋeyo cik ma dhumo polo, aka inyalo oro cik pajo i piny?

³⁴ Inyalo koko gi dwondin malo ri pondeponde, t'imiyo dhiekin gi pi kweth?

³⁵ Inyalo wodho or ri lithkoth pilin, to bino waco rin ni, “An e?”

³⁶ Ŋa m'ocweyo rieko to ketho kam'opanere, aka ŋa m'omiyo paro niaŋ?

³⁷ Ŋa manitie gi rieko ma kwano pondeponde, kosa ŋa manyalo kigela pien pi ma i polo,

³⁸ koth ma coko fukefuke i kidhur, aka cwodho makere kanyacel.

³⁹ Inyalo dwaro cemo ri simbwor, kosa yeŋo nyithindhi simbwor ma kec neko,

⁴⁰ kareno jopondo i od jo, kosa munyo joriere jokiyo gimoro i od simbwor.

⁴¹ Ŋa ma miyo agak cemo, ka nyithindhe joywak ri Were, aka jolera ro ngoye pa cemo?