Yeremia 19 - KITAWO MALEŊ Catholic

Jagi m'obare

¹ Rwoth owaco ran ama: Kidhi inyew jagi pa jacwec degi ma lowo nyamasiga. Kidhi gi jotel pa ji mogo kodi jocway ri Were i wi migam ma jotieko tic hongo m'oromo,

² aka iwok gi milelo pa wod Hinom i kama donjo i waŋkac pa Potcad, aka ititi kenyo mikwenda m'abino waco rin.

³ Rwoth owaco ran ni awaci ama: Winji win wac pa Rwoth, win kerin ma Yuda kodi ji ma bedo i Yerusalem. Rwoth pa lwak jolweny, Were pa Isiraili waco ama: Akidho kelo kidamba ma kiwacere kwoŋ kabedo me ma ithi kisi dhano m'owinji kwoŋe bino cwowo gi litho.

⁴ Akidho timo gime kwoŋbedo ji jojwangan, aka jotieko koco kabedo me gi miyo mic ri werin man i iye ma jo, kwarere pajo kosa kerin ma Yuda fodi jokuya; kodi kwoŋbedo jotieko poŋo kabedo me gi remo pa ji m'oneki jo m'ongoye gima jotimo marac,

⁵ aka jotieko geto migame ri Bal ma waŋo nyithindho pajo i mac paka mic awaŋa ri Bal, m'akiwaco rijo kendo akiyere gine, kosa k'obino kada i paro paran.

⁶ Riameno, adieri hongo bino, Rwoth waco, ma kabedo me doko k'olwoŋ ni Tofeth, kosa milelo pa wod Hinom, to milelo ma neki.

⁷ I kabedo me can pa Joyuda kodi ji ma Yerusalem moro je ma jotimi latho gaya. Alaweyo jokwor pajo wokengila jo to joneko jo kama lweny ogunj'iye, kodi i cingi jono ma jodwaro kwo pajo. Alamiyo mulambin pajo paka cemo ri winyin ma koyo kodi ri ogwaŋe mager ma piny.

⁸ Alakelo rerok ma kiwacere kwoŋ tindi madwoŋ me ma kisi ŋat'okadhi je bino dhier to bwok.

⁹ Alamiyo jo camo delkwoŋ nyithindho pajo, aka joje jolacamo delkwoŋ wadi jo k'okar jo, kodi i litho ma jokwor pajo kodi jono ma jodwaro kwo pajo jomiyo jo.

¹⁰ Kenyo ibino ŋinyo jagi ka jono ma jokadho kodin joneno,

¹¹ aka ibino waco rijo ni: Rwoth Were pa lwak jolweny waco ama: “Ameno apaka bende alaturo ji me kodi tindi madwoŋ me, paka dhano ŋinyo gima jacwec degi ocweyo gi lowo nyamasiga, m'odoko kinyal mwono. I Tofeth, jolayikere to kabedo ma yikirok rumo.

¹² Ameno apaka alatimo bende ri kabedo me, Rwoth waco, aka ri ji ma jobed'iye, k'aloko tindi madwoŋ me paka Tofeth.

¹³ Udi ma Yerusalem kodi udi pa kerin ma Yuda ibino koco paka kabedo ma Tofeth, kodi i dier udi je ma wi kisul pajo otiek waŋ'iye buban ri micalin kodi kam'otiek konj'iye woko vini paka mic ri werin man.”

¹⁴ Munyo Yeremia odwoko wok Tofeth, kam'oyido odhir'iye go tuco wac pere, ocungo i kapido ma Ot pa Rwoth to waco ri ji je ni:

¹⁵ Rwoth pa lwak jolweny, Were pa Isiraili waco ama: “Pama onyo akelo kwoŋ tindi madwoŋ me kodi kwoŋ tindin mere je kidamba m'atieko tuco kwoŋe, rupiri wiy jo tek, jokwero winjo wac paran.”