Yeremia 18 - KITAWO MALEŊ Catholic

Yeremia i Ot pa jacwec degi

¹ Wac m'obino ri Yeremia wok bongi Rwoth:

² “Ay malo, i lori yupiny i ot pa jacwec degi, aka kenyo alayeyin winjo wac paran.”

³ Ameno t'aloro yupiny i ot pa jacwec degi, aka kenyo go oyido timo tic pere i wi telin ario ma dwanyo degi.

⁴ Atawo m'oyido go cweyo gi lowo nyamasiga onyekere, to ŋinyo meno woko to cako cweyo man, m'osangala go.

⁵ Kenyo to wac pa Rwoth bino ran ama:

⁶ Akinyali timo gi win, awi ot pa Isiraili, paka jacwec degi me otimo? Rwoth penjo. Paka lowo nyamasiga i cingi jacwec degi, ameno bende apaka winitie i cingan, awi ot pa Isiraili.

⁷ Ndelo moro alatuco kwoŋ gima mako nono kosa ker, ni alafudho woko, t'aŋinyo woko, kendo t'areyo woko,

⁸ to ka nono no, ma mako kwoŋ gim'atieko luwo kwoŋe, owey timo reco, abino wiro paro paran mako kwoŋ teko m'oyido apiro kelo kwoŋe.

⁹ Aka i hongo man alatuco mako kwoŋ nono kosa ker m'abino geto t'apidho.

¹⁰ To k'otimi gimarac m'aneno, k'okwer winjo dwondan, kenyo nyaka alawiro paro paran ma mako kwoŋ bero m'oyido amito timo rigo.

¹¹ Onyo, riameno, waci ri ji ma Yuda kodi joma bedo i Yerusalem: Rwoth waco ama: Neni, an ajacwec degi apayo gimarac kwoŋ win aka atimo can kwoŋ win. Wire win pama, wijoje wok kwoŋ tim mewin marac, wiwir tim mewin gi kula mewin.

¹² To jolawaco ni, “Mar'aŋo, wak'otim! Walaluwo can mawan wawegi, aka kisi dhano kwoŋ wan latimo gimoro cungo kwoŋ wictek ma gimarac ma cunye oro go.”

Ji jokwero Rwoth

¹³ Riameno Rwoth waco ama: Penji win i dier nonin: Ŋa m'otieko winjo ye gima cale ama? Ji ma Isiraili jotieko timo gima kiwacere.

¹⁴ Pe ma Lebanon bende nyalo weyo jondijo ma joidho got? Pi ma got bende cwiyo pi ma mol maŋic?

¹⁵ Kucel ji paran wiy jo owil kodan, jowaŋo mic ri gima k'adieri; Jotieko kitangatanga i royin pajo, i royin pajo macene, jotieko luwo i ger, makiweno i ngudo madwoŋ.

¹⁶ Jotieko loko lowo pajo opalipat, gim'ila cayo cil gi cil. Joma joluw'iye je jobino bwok gi gima joneni; to joyengo wiy gin idhier.

¹⁷ Paka koyo ma wok yuwok ceŋ, alakedho jo ruwaŋ jokwor pajo. Alanyutho jo dieŋeyan, makiweno nyiman, i ndelo ma kidamba pajo.

Camo tiendi Yeremia

¹⁸ Kenyo to ji jowaco ni, “Biye win watim gimoro ri Yeremia! Kole wak'ocandi jacway ri Were i wi migam ma fonjo wan, jomariek ma miyo wan rieko, kodi jotuci wac Were ma tuco mikwenda pa Were. Biye win, weyi wakel kwoŋe banja, aka weyi wakiri wawinji wac pere moro je.”

¹⁹ Ameno t'akwayo ni, “Winjan, awi Rwoth, aka iwinji gima jokwor paran jowaco!

²⁰ Gimarac bende i oro i kabedo pa bero? Kucel jotieko kunyo ran bur. Poyi paka cango acungo ruwaŋin ma luwo bero rijo, ma miyin ikir'imaki nge gi jo.

²¹ Riameno weyi kec woneki nyithindho pajo; konji woko jo ri tho. Weyi mon pajo jowongoye gi nyithindho aka jowolokere mon tho. Weyi cwogi jo jowotho tho two nundu, soye pajo woneki jo g'abor kama lweny ogunj'iye.

²² Weyi ywak ma kidamba wowinji wok i udi pajo, ka inokel jokinyaga abwap kwoŋ jo! Kole jotieko kunyo bur ni apodh'iye, aka jotieko yaro bwo ma makan.

²³ Kucel in, awi Rwoth, iŋeyo can pajo je ma nekan. Ikir'icwaki reco pajo, ikir'icwaki reco pajo ruwaŋin. Weyi wokengila jo ruwaŋin; tiyi gi jo ka nge omakin.”