Wer pa Solomon 5 - KITAWO MALEŊ Catholic

Jacwo

¹ Atieko donjo i ndelo paran, nyamin an, mweha paran, atieko coko mo maŋwe kur paran gi binzar, atieko camo mo kic paran kiri g'apede mere, atieko madho vini paran gi cak paran. Cemi win, jomitirok, aka wimedhi, cuka winomer gi mitirok.

Mon Wer mar'aŋwen Dhako

² Anindo, to cunyan k'oywomere. Awinjo jamitirok paran goyo kodi. Yaw ran, nyamin an, mweha paran, akuru paran, jamitirok paran. Wiyan odhiek gi thoyo, aka ye wiyan ŋic gi tor.

Jacwo Dhako

³ An atieko lunyo woko nanga paran, raŋo aruki kendo? Atieko lawo tiendan, raŋo akoc kendo?

⁴ Jamitirok paran otelo cinge to geyo thigo, aka cunyan owanya go.

⁵ Aay malo yawo rigo, aka cingan oyido thon gi mo maŋwe kur, aka lwet cingan oyido thon gi mo ma liw i cingi thigo, paka amidho cingi thigo.

⁶ Ayawo thigo ri jamitirok paran, to go oyido otieko kadho. Cunyan okadho rigo ma mito winjo dwonde, arango go, t'akinwaŋo go, alwoŋo go, to go k'odwokan.

⁷ Jokur m'oyido jowaya i tindi madwoŋ jonwaŋan, jogoyan to jomiyan litho, jokur ma kor ot ma tindi madwoŋ jomayan junga paran.

⁸ Cikan win, nyir ma Yerusalem, ni ka winorom gi jamitirok paran, wilawaco rigo ni atho gi mitirok.

Mon

⁹ Jamitirok perin no opokere kwoŋ jomitirok man, awi dhako maŋon loyo? Aŋo ma jamitirok perin loyo gine jomitirok man, ma waripo miyin cikirok mawan?

Dhako

¹⁰ Jamitirok paran ŋon aka go tek, go kende i dier cwo gana apar.

¹¹ Waŋe foth aka ŋon, ye wiye ominere aka col paka agak.

¹² Waŋe ŋon paka waŋ akurin ma thengi waŋ pi, akurin ma jolwokere i cak aka jocungo i thengi pi ma mol.

¹³ Pinde ber paka ndelo, m'opoŋ gi yen kodi binzar. Dhoke cal mawuwa m'ilwoŋo ni lili, m'odhiek gi mo akudha.

¹⁴ Cingi go cal zahabu m'oŋinere, m'oketh'iye thiwino thoko. Delkwoŋe cal lak liec mafoth, m'oketh'iye telin manyabululu ma welo.

¹⁵ Tiende cal siro ma telin ma welo manyabululu, m'ocan i wi zahabu. Cal pere cal gi gote ma Lebanon, gi yen sida pajo maboyo.

¹⁶ Dhok go mit, kisi gimoro ma kwoŋe ŋon ran. Me a jamitirok paran, aka me mere paran, awi nyir ma Yerusalem.