Tobit 8 - KITAWO MALEŊ Catholic

Iriemo jwogi

¹ Munyo jotieko cemo gi medho, jomito ywomirok; ameno jokwanyo jayac no to jorwako go i kisika.

² Kenyo Tobia opoyo wac pa Rafaili, okwanyo cuny rec g'adundo mere wok i mugowa kam'oyido oketh'iye jo to ketho i buban maliel.

³ Ŋwece rec onyalo riemo woko jwogi to ŋweco iy'adec ma kakende ma Misir. Rafaili oriemo go, to tweyo go kenyo cinge gi tiende.

Kwayo pa Tobia

⁴ Munyo jonywol oyido jotieko wok woko to jocego thigo ma kisika, Tobia oay i wi kitanda to waco ri Sara ni, “Ay malo nyamera, aka weyi wakway to wapido gi Rwoth Were mawan ni go wonyali miyo wan ŋono to kwonga wan.”

⁵ Ameno to Sara ay malo to jocako kwayo aka jopido ni Were wokwonga jo. Tobia ocako ka kwayo ni, “Were wofoy, Were pa kwarere mawan, aka wofoy nyingin i luse je cil gi cil. Weyi polo gi cwec gibe jowofoy nyingin.

⁶ Icweyo Adam t'imiyo go dhako pere Eva paka jakony pere kodi jathiel. Jolokere jonywol pa ji je. Iwaco ni, ‘Kiber ri dhano bedo kende. Alamiyo go jakony ma ripo gine.’

⁷ Pama onyo atero dhako ma wat paran me, kareno k'obedo ni ajanyacwo, to g'adieri. Mondo maki gi wan wor aka imiy wadongi to wati kanyacel.”

⁸ Kenyo to joje jodwoko ni “Obedi ameno, obedi ameno.”

⁹ Munyo jocowo to jokadho nindo wor. Rumacen ma wor no, Raguel olwoŋo ŋecin pere, to joje jowok woko kidho kunyo bur,

Cuny jonywol oŋawere

¹⁰ kwoŋbedo Raguel oparo ni, “Tobia kono miti bende latho, to lokere rijo ginyero g'awaca nyingi.”

¹¹ Munyo jotieko kunyo bur, Raguel ogik i ot to waco ri dhako pere ni,

¹² “Dhiri acel kwoŋ ŋecin manyako wonen kinen Tobia fodi kwo. K'inen go otho, wabino yiko go mafodi ongoye ŋat'oŋeyo.”

¹³ Ameno to jodhiro ŋeca manyako ni womok tala madwoŋ; oyawo thigo; to nwaŋo joje jotoŋo nindo.

¹⁴ Kenyo ŋeca no owok woko to waco rijo ni Tobia kwo aka oyido ongoye gimarac.

¹⁵ Kenyo to Raguel foyo Were ma i polo, owaco ni, “Ijasilwany, awi Were, gi kisi silwany moro je macil; weyi ji perin je m'oyer jowopakin. Weyi jowofoyin cil gi cil.

¹⁶ Ijasilwany kwoŋbedo itieko miyan kisangala. K'obedo paka oyido ageno, to itieko tic gi wan cungo kwoŋ ŋono perin madwoŋ.

¹⁷ Waripo pakin awi Rwoth; kwoŋbedo itimo ŋono ri nyaka nyithindho ario me, nyaka nyithindho ario won kende apa jonywol pajo. Wakwayin imiy jo ŋono perin aka ikwonga jo. Miy jo kwo ma kisangala kodi mar.”

¹⁸ Kenyo to waco ri ŋecin pere yiko bur mafodi ŋamba k'oriedo.

Kalima ma nywomirok

¹⁹ Rumacen to Raguel waco ri dhako pere ni wotedi cemo m'oromo; okidho i cel to kelo thwondhe ario gi wot rombo aŋwen to wodho or ri ŋecin pere ni jowothumi i yikirok ma timo kalima ma nywomirok.

²⁰ Go olwoŋo Tobia to kwoŋere ni Tobia k'owey go ma sabiti ario. Owaco ri Tobia ni, “Bedi ka, walacemo to wamedho kanyacel.” “Bino kweyo cuny nyaran, nyaran m'oyido otieko limo candirok ma kiwacere.

²¹ Kenyo inyalo kwanyo acel wiy ario ma gigipiny manitie gine t'idok m'ongoye teko bongi benin; adec man labedo aperin ka dhako paran Edina gi an watieko tho. Bedi miseni nyathi paran. Abedo benin aka Edina obedo yokin, aka wabedo aperin kanyacel gi dhako perin pama kodi noknok. Bedi miseni, nyathi paran.”