Tobit 7 - KITAWO MALEŊ Catholic

I ot pa Raguel

¹ Munyo Tobia kodi malaika Rafaili jodonjo Ekibatana, Tobia owaco ri Rafaili ni, “Omera Azaria, teran tirtir bongi omin wan Raguel.” Ameno to Azaria tero go i ot pa Raguel, kama jonwaŋ'iye go obedo i ŋeti thigo ma diedipo. Jopen m'otho go to Raguel dwoko ni, “Moth mayom cuny, wutmera; ber neno win aka kwoŋ win wokwe.!” Kenyo to rwako jo i ot pere.

² Raguel owaco ri dhako pere Edina ni, “Nga nyathi majayac me cale gi wat paran Tobit!”

³ Kenyo to Edina openjo jo ka waco ni, “Wiwok yukune wutmera?” Jodwoko ni, “Wabedo nyikway Nafital ma jobedo jowiloka i tindi madwoŋ Ninivi.”

⁴ Edina openjo jo ni, “Wiŋeyo wat mawan Tobit?” To jodwoko ni, “Ey waŋeyo go.” Kenyo to Edina penjo jo ni, “Go ber?”

⁵ Jodwoko ni, “Go kwo aka ber.” Tobia to medo ni, “Go obedo baba!”

⁶ Gikenyo Raguel opor malo, ocwiyo go to ywak.

⁷ Raguel bende oluwo gi Tobia ama: “Were womiyin silwany nyathi paran, wod pa jal maber aka kere! Awi, nga obedo gimarac swa ni nger jal m'otire aka jamiyo no, onyo waŋ'otho!” Kenyo to Raguel podho i kor wat pere Tobia to ywak.

⁸ Dhako pere Edina bende to ywako go, to nyar jo Sara bende to ywak.

⁹ Kenyo to Raguel neko wod rombo wok i sidwol to jolo jo gi kisangala madwoŋ. Munyo jotieko lwoki to jokadho cemo, Tobia to waco ri Rafaili ni, “Omera Azaria, kway Raguel womiyan wat paran Sara.

Nywomirok pa Tobia kodi Sara

¹⁰ To kere Raguel owinjo to waco ri Tobia ni, ‘Cemi aka imedhi, aka yodere wor me. Kole ongoye ŋatiman, kwanyowoko in, omin an, manitie gi meni ma nywomo nyaran Sara. Bende angoye gi meni ma miyo go ri jal moro je kwanyowoko in, rupiri ibedo wat paran ma k'osunga. To yeyan atiti rin adieri ma gigipiny i thutho, nyathi paran.

¹¹ Atieko miyo go ri cwo abirio kwoŋ wade, aka joje jotho i wor ma jodonjo i kisika pere. To onyo pama, nyathi paran, cemi aka medhi, aka Rwoth latimo riwin tic.’ ” To Tobia waco ni, “Ak'ocem kosa ak'omadhi gimoro je cuka inoyiki gigipiny je ma makan.”

¹² Ameno Raguel to waco ni, “Alatimo ameno. Amiyin go cungo kwoŋ cik manitie i kitawo pa Musa, aka ocan wok i polo ni womiyin go. Kadhi gi dhako ma wat perin; wok konon kadho malo ibedo omin go aka go obedo nyamin. Amiyin go wok konon tundo cil gi cil. Weyi Rwoth ma i polo, wodan, wotelin aka wokonyin wor me je to miyin ŋono kodi siem.”

Kalima ma nywomirok

¹³ Kenyo Raguel olwoŋo nyare. Munyo go odonjo, go omako cinge to miyo Tobia gi silwany pere, “Ter go wobedi dhako perin cungo kwoŋ fonji manitie i cik pa Musa. Kadhi gine maber i ot pa benin. Weyi Were ma i polo womiy win kwo ma kisangala kanyacel.”

¹⁴ Raguel olwoŋo dhako pere Edina ni wokel rigo pien nyajwaya ma k'ondiki iye ŋey go wonyali ndik'iye cikirok ma nywomirok. Edina okelo rigo pien nyajwaya, to Raguel ndik'iye cikirok, ka waco ni omiy Tobia Sara cungo kwoŋ fonji manitie i cik pa Musa.

¹⁵ Munyo otiek timo cikirok to jocako cemo gi medho.

¹⁶ Raguel olwoŋo dhako pere Edina to waco rigo ni, “Nyamera, yik kisika man mere ca aka iter'iye Sara.”

¹⁷ Edina opedho kanindo paka Raguel oyido otieko waco rigo. Kenyo otero Sara i kisika, to Sara cako ywak. Edina oyweyo pigi waŋe to waco rigo ni,

¹⁸ “Ikir'irembi Sara. Anitie gi ridho ni Rwoth ma i polo lamiyin kisangala i hongo me makiweno kumo. Riameno mondo sangala.” Kenyo to Edina wok woko.