Tobit 5 - KITAWO MALEŊ Catholic

Yikirok ma woth

¹ Kenyo to Tobia dwoko bamere Tobit ni, “Alatimo kisi gimoro je m'itieko waco ran, baba.

² T'anonwaŋ pesa nedi wok bongi Gabael, paka go okuya an aka an bende akuya go? Anomiy go gima ridho aŋo ŋey wonyali ŋeyo to genan, to miyan pesa? Medo kwoŋ meno, akuya royin ma kidho Mediya, kosa nger ma tundo korago.”

³ Kenyo to Tobit dwoko wode Tobia ni, “Gabael omiyan cikirok pere, t'amiyo go aparan. Apoko apere dirio; kisi dhano kwoŋ wan okwanyo adec acel, t'aketho acel gi pesa. Onyo oro piero ario otieko kadho cuka awey pesa me ri Gabael. Onyo riameno, wodan, nwaŋ jal moro m'igeno wokwaŋin, aka wibino culo go misara cuka winodwoki. T'iripo fudho pesa no kwoŋ Gabael.”

Tobia romo gi Rafaili

⁴ Ameno to Tobia kadho raŋo jal m'okwaŋ go Mediya, ŋati m'oŋeyo royo maber. Owoki woko to nwaŋo malaika Rafaili m'oyido ocungo ruwaŋe; to go k'oniaŋ ni oyido obedo malaika pa Were.

⁵ To Tobia penjo go ni, “Iwok yukune jayac?” To Rafaili dwoko ni, “Kwoŋ wade perin, Joisiraili, aka abino ka tic.” Kenyo to Tobia penjo go ni, “Iŋeyo royo ma kidho Mediya?”

⁶ Rafaili odwoko ni, “Ey, aŋeyo. Atieko kidho koro hongo m'oromo; aŋeyo maber, aka aŋeyo royin je. Atieko riwin Mediya, aka amaro bedo gi wat mawan Gabael ma bedo i tindi ma Rages i Mediya. Obedo woth ma ndelo ario wok i tindi madwoŋ Ekibatana tundo Rages; rupiri Rages ŋare iy'adec ma gote, aka Ekibatana nitie i dier kam'obipere.”

⁷ Kenyo to Tobia waco ri Rafaili ni, “Kuran, jayac, adonji awaci ri baba; kwoŋbedo amito ikwaŋan, aka abino culin misara perin.”

⁸ Rafaili odwoko ni, “Kala, alakurin; t'ikir'igal.”

⁹ Ameno Tobia odonjo to waco ri bamere Tobit, to waco rigo ni, “Nyaka awok romo gi jal moro m'obedo Jaisiraili wat mawan won ma k'osunga!” Tobit odwoko ni, “Lwoŋ go i iye ka, wodan, ŋey anyal penjo go kwoŋ peco pajo kodi nono pere, kodi k'inen go obedo ŋata genere ma kwaŋin.”

Tobit romo gi Rafaili

¹⁰ Kenyo Tobia owok woko to lwoŋo Rafaili. Owaco rigo ni, “Jayac, baba lwoŋin.” Ameno to donjo bonge, to Tobit pen m'otho go. Rafaili to dwoko ni, “Moth ma kisangala rin!” To Tobit dwoko ni, “Kisangala aŋo m'odoŋ ran kendo? Abedo jal ma waŋ'otho; akinyali neno lero ma i polo. Aŋare i mudho paka jom'otho ma jokinyal neno lero kendo. Kada fodi akwo, anitie i dier jom'otho. Awinjo ji to akinyali neno jo.” To jayac no waco rigo ni, “Bedi miseni; hongo cegin ri Were ma bothin; bedi miseni.” Kenyo to Tobit waco rigo ni, “Wodan, Tobia mito kidho Mediya. Inyalo kwaŋo go t'inyutho go royo? Alaculo misara perin, omera.” Rafaili odwoko ni, “Anyalo kadho gi go aka aŋeyo royin je, kwoŋbedo atieko riwin i Mediya aka atieko ŋado kam'obipere mere je, aka onyo atieko ŋiyo gi gote mere kodi royin mere je.”

¹¹ Kenyo to Tobit waco ri Rafaili ni, “Omera, iwok peco pa ŋa kodi i nono mene? Waci ran omera.”

¹² Rafaili openjo ni, “Raŋo imito ŋeyo nono paran?” To Tobit dwoko ni, “Amito bedo gi ridho, omera, ni ibedo wod pa ŋa kodi nyingin.”

¹³ Rafaili odwoko ni, “Abedo Azaria, wod pa Hanania madwoŋ, acel kwoŋ wade perin.”

¹⁴ Kenyo to Tobit waco rigo ni, “Afoyo nenin! Were wobothin omera. Nge wokiri womakin kodan, omera, rupiri oyido amito bedo gi ridho kwoŋ nywolirok perin. Olokere ni ibedo wat, maber aka ma k'osunga. Kwoŋbedo oyido aŋeyo Hanania kodi Nathan, wot Semelia. Oyido jomaro kadho kodan i Yerusalem to jolamo kodan koro, aka k'orweny jo. Wade perin jobedo ji mabeyo; iwok i kolo maber. Ber nenin!”

¹⁵ Kenyo to Tobit medo ni, “Alaculin penzi acel kisi ndelo paka misara perin, kanyacel gi pesa aora rin kodi ri wodan. Riameno kadhi gi wodan.

¹⁶ Alamedo gimoro i misara perin.” Rafaili odwoko ni, “Alakwaŋo go; riameno ikir'ibedi gi lworo. Walakadho munyo kwoŋ wan okwe to wadwoko munyo kwoŋ wan okwe, kwoŋbedo royo ber.”

¹⁷ Ameno to Tobit waco ri Rafaili ni, “Silwany wobedi kodin, omera.” Kenyo to Tobit lwoŋo wode Tobia to waco rigo ni, “Wodan, yik kisi gimoro je ma mitere ri woth aka iay g'omin in. Weyi Were ma i polo woter win maber koro aka wodwoki win bongan ma kwoŋ win okwe; aka weyi malaika pere, wodan, wokwaŋ wijoje maber.” Mafodi k'owoki woko cako woth, ocwiyo bamere gi min. Kenyo to Tobit waco ri Tobia ni, “Tundi maber.”

¹⁸ To yok mere cako ywak. Openjo Tobit ni, “Aŋo m'omiyin iriemo wodan? Go k'obedo luth ma cingi wan ka go donjo kodi ka wok ruwaŋ wan?

¹⁹ Ikir'idhur pesa wi pesa, to weyi wobedi both ri nyathi mawan.

²⁰ Kole kwo ma Rwoth otieko miyo wan romo wan.”

²¹ Tobit odwoko go ni, “Ikir'irembi; nyathi mawan lakadho ma kwoŋe okwe aka ladwoko ma kwoŋe okwe. Waŋin laneno go i ndelo ma go ladwok'iye bongin ma kwoŋe okwe. Ikir'iluw kendo! Lworo wokiri womakin rijo, nyamera. Kole malaika maber lakwaŋo go; woth pere labedo maber, aka ladwoko ma kwoŋe okwe.”