Tobit 4 - KITAWO MALEŊ Catholic

Tobit miyo rieko ri wode Tobia

¹ I ndelo acel no won Tobit opoyo pesa ma go oyido oweyo gi Gabael i Rages i Mediya.

² To go won luwere ni, “Pama atieko kwayo tho. Raŋo akilwoŋ wodan Tobia atiti rigo gima mako kwoŋ pesa mafodi akitho?”

³ Kenyo to lwoŋo wode Tobia, aka munyo Tobia obino bonge go owaco rigo ni, “Wodan, k'atho, iyikan maber. Iwor yokin aka ikir'ijwangi go hongo je ma kwo pere. Itimi kisi gimoro ma sangala go, aka ikir'iŋedhi cunye i kisi gimoro.

⁴ Poyi go, wodan, kwoŋbedo go oneno teko kweth ro in munyo initie i iye. Ka go otho, yik go ruŋetan i kaliel acel.”

⁵ “Ilwori Rwoth i hongo perin je, wodan, aka ikwer timo gimarac kendo ikir'ibenga kwoŋ or pere. Bedi mitere hongo je ma kwo perin, aka Ikir'itim gikomo.

⁶ Bedi jar'adieri, aka kisi gimoro je m'inotim bino kadho rin maber. Ri jono je ma jotimo gitiro

⁷ konyo jocandi gi gim'initie gine, aka ikir'iyey waŋin woŋwelaŋwela gi mic k'imiyo. Ikir'ipan waŋin kwoŋ ŋatimoro je ma jacandi, aka Were k'opan rin waŋe.

⁸ Miy paka initie gine. Paka initie gi mathoth, apaka bende iripo miyo mathoth. Kad'initie gi nyaka mathin, iripo miyo gimoro.

⁹ Ameno apaka ibino jengo cwe maber ri kwo perin i hongo ma teko.

¹⁰ Rupiri konyo jocandi botho jo kwoŋ tho aka geŋin donjo i mudho.

¹¹ Adieri, konyo jocandi, ri jono je ma jotimo, obedo mic maber tektek i nyim Jamalo Swa.”

¹² “Gwokere wodan, kwoŋ nindirok kicar. Marapena, nywom dhako wok kwoŋ nyikway kwarere perin. Ikir'inywom dhako ma jakicar, ma k'obedo janono pa benin; kwoŋbedo wabedo nyikway jotuci wac Were. Poyi wodan, ni Nowa, Abraham, Isaka kodi Yakobo, kwarere mawan macon, joje jokwanyo mon wok kwoŋ wade pajo. Were omiyo jo silwany i nyithindho pajo, aka nywodo pajo jolalunjo piny.

¹³ Onyo pama, wodan, miti wade perin, aka ikir'ikwer wade perin gi i cunyin, nyithindho pa ji perin, gi kwero nywomo dhako wok i dier jo. Rupiri i kwoto nitie rerok gimienirok madwoŋ. I dhiekirok m'ongoye gimoro m'itimo, nitie iye keŋ gi candi matar, kwoŋbedo i dhiekirok m'ongoye gimoro m'itimo ama kelo kec.”

¹⁴ “Cul jotic perin misara pajo kisi ndelo; aka iculi jo dicel. K'itiyo ri Were ibino limo kemba. Gwokere wodan, i kisi gimoro je m'itimo, aka bedi jakula maber itimi perin.

¹⁵ Aka gim'ikimiti, Ikir'itim ri ŋatimoro. Ikir'imadhi vini kweth, aka ikir'iyey mero wokengila in.

¹⁶ Miy cemo perin moro ri joma kec neko jo, kodi nangin perin ri joma wotho kinyoro. Ikony jocandi, aka waŋin wokiri woŋwel gi gim'imiyo jacandi.

¹⁷ Kethi mugat perin i kaliel pa jatiro, ikir'imiy joreco.

¹⁸ Rangi rieko wok bongi kisi dhano mariek aka ikir'icay fonji ma dicwe m'imiyin.”

¹⁹ “I hongo je foy Rwoth Were, aka kway go ni kisi gimoro je m'itimo wokadhi rin maber. Rupiri ongoye nono manitie gi niaŋ, to Rwoth won gipi ama lamiyo jo rieko maber; to ka go oyer nger man, to bolin piny milelo i piny pa jom'otho. Riameno, wodan, poyi or me, aka wiyin wokiri wowil gi jo.”

²⁰ “Aka onyo pama wodan Tobia, weyi atiti rin ni aweyo talenta apar ma feza bongi Gabael wod pa Gabria, i Rages i piny ma Mediya.

²¹ Lworo wokiri womakin, wodan, kwoŋbedo watieko lokere jocandi. Initie gi ŋaŋo kweth ka inolwor Were aka i gwokere kwoŋ timo gimarac moro je t'itimo gimaber ruwaŋ Rwoth Were perin.”