Tobit 3 - KITAWO MALEŊ Catholic

Kwayo pa Tobit

¹ Kenyo gi geregere kweth gi litho mar'adundo aywak, aka gi dwanyirok acako kwayo:

² “Itire, awi Rwoth, aka tim perin je otire; tim perin je obedo ma ŋono kodi adieri; ithumo banja ri piny.

³ Aka onyo pama, awi Rwoth poyan aka nenan gi wor. Ikir'imiyan gir'acula ro reco paran kodi ri gigipiny mareco m'atimo m'akiŋeyo kodi reco je ma kwarere paran jotimo ruwaŋin. Jotimo reco kwoŋin,

⁴ to jocayo or perin. Ameno iweyo wan t'inyaga wan, bedo jowiloka gi tho, walokere luwo, gir'awaca, kodi giwickwot ro tim mawan marac i dier nonin m'ikedho wan i dier jo.

⁵ Aka onyo pama, itieko thumo banja noknok ri kwarere paran ro reco pajo t'imiyan gir'acula ro reco paran. Kole wakikuro or perin aka wakibedo g'adieri ruwaŋin.

⁶ Ameno pama tiyi kodan paka iyenyo; kwany woko kwo paran ŋey anyal gonyirok wok i piny t'alokere fukefuke. Kole ber atho loyo bedo gi kwo, kwoŋbedo atieko winjo yet m'akuya tiende gi wiye, aka anitie gi kumo madwoŋ. Wodhi or awi Rwoth, wonyali gonyan i teko me; gonyan akidhi i peco ma cil gi cil aka ikir'ium ran waŋin awi Rwoth. Kole ber atho loyo neno candirok kweth i kwo paran gi winjo yet.”

Teko pa Sara

⁷ I ndelo no won, i tindi madwoŋ ma Ekibatana i Mediya, otimere bende ni Sara, nyar Raguel, acel kwoŋ ŋecin pa bamere manyako oyeto go.

⁸ Kwoŋbedo go oyido otieko nywomere gi cwo abirio, to jwogi ma jakidakana Asimodewo oyido otieko neko kisi moro kwoŋ jo mafodi jok'obedo gine paka ripo ri mon. Ameno to ŋeca manyako no waco ri Sara ni, “Iŋat'ineko cwogin! Neni, itieko nywomirok gi cwo abirio aka ongoye kad'acel m'itieko nywolo rigo nyathi.

⁹ Raŋo igoyo wan? Kwoŋbedo cwogin jotho? Kadhi gi jo! Weyi wakiri wanen wodin kosa nyarin!”

¹⁰ I ndelo no cunye oŋedhere to ywak. Munyo otieko idho malo i kisika pa bamere ma malo, otemo derok. Oparo kwoŋe to waco ni, “Jok'oyetin baba, ka jowaco rigo ni, ‘Oyido initie gi nyarin m'imaro acel kende, to go odere kwoŋbedo kidamba pere.’ Nger ywak no nyalo miyo baba ioro pere ma tegino tho i kumo i piny pa jom'otho. Kiber adere, t'akwayo Rwoth ni anyal tho makiweno winjo yet me kendo.”

Kwayo pa Sara

¹¹ I hongo acel no won, gi cinge m'oyare yu dirisa, Sara okwayo ka waco ni, “Ijasilwany, Were ma jaŋono! Nyingin wofoy cil gi cil; weyi cwec perin je jowopakin cil gi cil.

¹² Aka pama, Rwoth, aŋiyin, atiŋo waŋan yu bongin.

¹³ Wodhi or wonyali gonyan wok i piny aka akir'awinji nger yet no kendo.

¹⁴ Iŋeyo, awi Rwoth, ni ongoye gim'atimo marac kocirok mogo je gi jacwo.

¹⁵ Fodi akikelo ri nyingan lifol, kosa nyingi baba i piny ma wiloka me. Abedo nyathi pa baba acel g'acel; go doko ongoye gi nyathi man m'obedi misika pere, go ongoye kodi wat ma k'osunga kosa wat moro m'anyalo kuro kwo paran rigo paka dhako. Cwogan abirio je jotieko kiri tho. Onyo fodi amedi kwo raŋo? To ka kisangala in, awi Rwoth, ma kwanyo kwo paran, ikir'iyeyan awinji yet no kendo.”

Were winjo kwayo pa Tobit kodi Sara

¹⁶ I hongo no won, kwayo pa Tobit kodi Sara owinji i dwoŋ ma kabedo pa Were.

¹⁷ Ameno t'idhiro Rafaili botho joje: Ri Tobit, kwanyo gim'othon othon m'oyido nitie i waŋe, ŋey wonyali neno lero pa Were gi waŋe kendo. Ri Sara nyar Raguel, miyo go i nywomirok gi Tobia wod pa Tobit, gi gonyo go woko kwoŋ Asimodewo jwogi m'odakana. Kwoŋbedo Tobia oyido ripo bedo gine mafodi joman je jok'ogomba nywomo go. I hongo no won ma Tobit odwoko wok i diedipo ma ot pere, Sara nyar Raguel to loro wok i kisika pere ma malo.