Tobit 2 - KITAWO MALEŊ Catholic

Kalima ma peco

¹ Kenyo munyo Esarhadon dhumo adoki peco, aka dhako paran Ana kodi wodan Tobia odwoki ran jo. I kalima mawan ma keco, m'obedo kalima maleŋ ma sabiti, otedi ran cemo m'othieno mamit t'akidho acamo.

² Munyo aneno paka cemo oyido nitie kweth i wi meza, awaco ri wodan Tobia ni, “Kadhi nyathi paran, aka ikeli dhano moro je ma jacandi kwoŋ ji mawan m'inyalo nwaŋo i dier jowiloka i Ninivi, ŋata paro kwoŋ Were gi cunye je, aka go bino cemo kodan kanyacel. Alakurin cuka idwoko.”

Neki i Ninivi

³ Ameno to Tobia kadho raŋo jacandi moro kwoŋ ji mawan. Munyo odwoko owaco ni, “Baba!” T'adwoko ni, “An e, nyathi paran.” Kenyo to go medere waco ni, “Neni, baba, acel kwoŋ ji mawan oneki t'ibolo i katale, aka go onyo oŋare kenyo m'odey.”

⁴ Kenyo mitego, aweyo cemo m'othieno m'akibilo kada, t'akwanyo del wok i royo t'aketho iy'acel kwoŋ kisikin cuka waŋceŋ opodho munyo anyalo yiko.

⁵ Munyo adoki, alwokere t'acamo cemo paran i kumo.

⁶ Kenyo t'apoyo gima jatuci wac Were Amos owaco, nger ma go oluw'iye kwoŋ Bethel: “Kalimin mewin ilawiro iywak, aka wer mewin je iywak ma geregere.” T'acako ywak.

⁷ Munyo waŋceŋ otieko podho, akadho t'akunyo bur t'ayiko go.

⁸ Joger paran jonyero to jowaco ni, “Fodi lworo k'omako go? Otiek raŋo go mar'aneka ro timo gime, to go ŋweco; kucel go fodi yiko jom'otho.”

Waŋ Tobit tho

⁹ Wor no won alwokere ŋey alokere m'olony, t'adonjo i diedipo paran t'anindo i thengi kor ot ma diedipo; aka oyido akiumo waŋan ro lietho.

¹⁰ Oyido akiŋeyo ni obicin oyido jonitie i kor ot. Ceth ma jopielo opodho i waŋan to joketho gimatartar. Akidho bongi jomilerwa ni jowobothan, to paka jotemo bothan gi wir, apaka waŋan omedo tho gi gimatartar, cuka waŋan otho kicutho. Ma oro aŋwen gipi akinyalo neno. Wade paran je jomako kodan wor, aka Akihar okuran ma oro ario gipi mafodi k'okadho i piny ma Elam.

Dhaw ma peco

¹¹ I hongo no bende, dhako paran Ana ocako tic ma kwoco paka mon man.

¹² Go oyido omaro dhiro gima go otimo ri wegi mere aka oyido joculo go. Ndelo acel, k'abirio ma Dusturo, go oŋado woko adec ma go oyido otieko kwoyo to dhiro ri wegi mere. Joculo go misara pere je to jomiyo go bende nyathi diel ni wocemi gine.

¹³ Munyo Ana odwoko peco gi diel, to diel cako ywak. Alwoŋo go t'apenjo go ni, “Inwaŋo kune diel me? Weyi apar ni ikikwalo, kosa be? Dwoki ri wegi mere; kwoŋbedo wakiripi camo gimoro je m'okwal.”

¹⁴ To go dwokan ni, “Omiyan paka mic medo kwoŋ misara paran.” To akinyalo yeyo go, t'awaco rigo dwoko ri wegi mere. Nge to makan gine kwoŋbedo gime. To go dwokan ni, “Nikune tim perin m'amiyo? Nikune tim perin ma tiro? Gigipiny me oŋeyin gine!”