Tobit 11 - KITAWO MALEŊ Catholic

Woth ma dok peco

¹ Munyo jotundo cegin gi Kaserin, kama ŋiyere gi Ninivi, Rafaili owaco ri Tobia ni,

² “Iŋeyo paka waweyo benin.

³ Weyi waringi yuwiy dhako perin wayiki ot kafodi jonitie i yo.”

⁴ Paka jonywako yo kanyacel, Rafaili owaco ri Tobia ni, “Yik kedhino rec kicutho.” Gwok pa Tobia oluwo jo cen.

⁵ I kare no Ana obedo piny ka ŋiyo swa royo ma wode owok gine.

⁶ Munyo oneno go bino, owaco ri Tobit ni, “Neni, wodin bino, kodi jal m'okwaŋo go!”

⁷ Rafaili owaco ri Tobia munyo fodi k'ocore cegin gi bamere ni, “Aŋeyo ni waŋan layawere.

⁸ Reyi kedhino rec i waŋe; yath no lamiyo gimatar m'othon othon wojwici to mukere woko wok i waŋe, aka benin bino neno kendo to neno lero.”

⁹ Kenyo Ana oyombere bongi wode to bolo cinge kwoŋe ka waco ni, “Paka onyo atieko nenin, nyathi paran, atieko yikere ri tho.” To ywak ri kisangala.

Tobit both

¹⁰ Kenyo Tobit oay malo to bino ma tangatanga; owok gi thigo ma diedipo. Tobia okidho bonge,

¹¹ gi kedhino rec i cinge, kareno omako go ma kiyengere, okudho i waŋe ka waco ni, “Bedi miseni baba.” Gi gime oketho yath i waŋ Tobit,

¹² to loko jo m'olony.

¹³ Ma luwo, gi cinge je ogweno woko gimatar m'othon othon wok i thengi waŋ Tobit. Kenyo to Tobit neno wode to bolo cinge kwoŋ Tobia.

¹⁴ Tobit oywaki to waco ri Tobia ni, “Anenin nyathi paran, lero ma waŋan!” Omedere waco ni, “Were wopak, aka nyinge madwoŋ wopak, aka wopak jomalaika pere je maleŋ. Weyi nyinge maleŋ wopak, i luse je.

¹⁵ Kada go omiyan litho, go otieko mako kodan wor. Pama onyo aneno wodan Tobia!” Ameno to Tobit donjo ka sangala ka pako Were gi dwonde ma malo. Tobia owaco ri bamere ni woth pere okadho maber ka ni, go k'okelo pesa kende to bende onywomo Sara nyar Raguel, aka ni adieri Sara oyido nitie i royo bino cegin swa gi waŋkac ma Ninivi.

Sara tundo

¹⁶ Kenyo to Tobit, gi forok kodi pako Were, owok woko romo gi ciwode i waŋkac ma Ninivi. Munyo ji ma Ninivi joneno go bino, kareno wotho gi derino aka kareno ongoye ŋat'omako cinge ma nyutho go royo, jobwok swa.

¹⁷ Ruwaŋ joje, Tobit oyeyo ni Were otimo rigo ŋono aka omiyo go neno kendo. Munyo Tobit oromo gi Sara cipa wode Tobia, omiyo go silwany ka waco ni, “Donji nyaran, aka afoyo gi nenin. Were perin wofoy go m'okelin bongi wan, nyaran. Onyo donji peco perin, aka afoyo nenin, gi foyo kodi yom cuny. Donji nyaran.” Ameno i ndelo no obedo kisangala i dier Joyuda je m'oyido jonitie Ninivi.

¹⁸ Ahikar kodi wod omin Nadab oyido bende olwoŋi jo riwirok i kisangala pa Tobit.

¹⁹ Gi forok jotimo kalima ma nywomirok pa Tobia ma ndelo abirio, aka jomiyo Tobia mic kweth.