Tobit 1 - KITAWO MALEŊ Catholic

¹ Kitawo me luwo kwoŋ kigana ma kwo pa Tobit. Tobit obedo wod pa Tobiel, nyakwar Ananiel, aka nyakwar Aduwel. Ba Aduwel oyido obedo Gabael; aka kwari mere oyido obedo Rafaili; aka kwarkwar mere oyido obedo Raguel, m'oyido obedo janono pa Asiel, adec ma nono pa Nafital.

² I hongo ma Salimanesa oyido kere ma Asiria, oteran paka jatwec i tindi ma peco paran ma Thisbe, manitie yumalo ma Galili, yupiny ma Kades i Nafital, yumalo ma yupodho waŋceŋ ma Hazor, aka yumalo ma Pogor.

Kwo pa Tobit ma thino

³ An Tobit, atimo gir'adieri kodi tiro hongo je ma kwo paran. Atimo tic kweth ma miyo ri wade paran kodi ri ji paran m'oyido jokadho kodan i wiloka i Ninivi i piny pa Joasiria.

⁴ Munyo oyido anitie i piny paran won, i lowo ma Isiraili, munyo fodi abedo jayac, nono gibe apa kwara Nafital joweyo nono pa Daudi kodi tindi Yerusalem. Tindi madwoŋ me oyido oyer wok kwoŋ nonin je ma Isiraili, kama nonin ma Isiraili je joripo miy'iye cowirok kodi kama Ot pa Were, kabedo pa Were, oyido okethi gicen t'icako ri luse je cil gi cil.

⁵ Wade paran je kodi ot pa kwari wan Nafital jomiyo cowirok ri rwath m'oleny ma kere Yerobowam ma Isiraili oyido ogeto i Dan kodi wi gote je ma Galili.

Miyirok pa Tobit ri dini pere

⁶ To an kendan won oyido noknok akidho i Yerusalem ma timo kalimin manyadini, paka cik pa Musa owodho or ri Joisiraili je ni jowotimi. Oyido anyalo kwakere kidho i Yerusalem gi ranyak marapena ma cemo kodi nyithindhi dhok ma mwendi marapena, acel wiy apar ma dhok, kodi yer rombo marapena m'oliel.

⁷ Oyido amiyo gigipiny me ri jocway ri Were i wi migam, wot Aron, i wi migam; kodi acel wiy apar ma cemo manyinge, vini, mo oliv, pomo, makuyu, kodi olemo man m'odoŋ ri wot Levi ma jotiyo i Yerusalem. Ri oro aucel bende oyido akano ario ma wi apar ma pesa t'akidho t'apoko i Yerusalem.

⁸ Adek ma wi apar oyido amiyo nyithindho kic kodi mon ma cwogi gin jotho kodi joma jowire m'oyido joriwere gi Joisiraili. Oyido akelo t'amiyo jo i oro mar'adek, aka oyido wacamo cungo kwoŋ gima cik pa Musa waco kodi cungo kwoŋ fonji pa Debora, min baba Tobiel, rupiri baba oyido otieko tho to weyan nyathi kic.

Genirok pa Tobit i wiloka

⁹ Munyo ategino anywomo dhako, janono paran won, t'anywolo gine nyathi majayac ma cwoko nyinge ni Tobia.

¹⁰ Rumacen omakan t'iteran paka jatwec i Asiria t'akidho paka jatwec i Ninivi, kisi wat paran kodi ji paran jocamo cemo pa Jokafir,

¹¹ to anakwero camo cemo pa Jokafir.

¹² Rupiri oyido aparo kwoŋ Were gi cunyan je,

¹³ Jamalo Swa omiyan ŋono gi cungo matek gi Salimanesa, aka oyido anyewo rigo kisi gimoro je ma go omito.

¹⁴ Mafodi kere Salimanesa k'otho oyido amaro kidho Mediya nyewo rigo gigipiny koro. Munyo anitie i piny ma Mediya aweyo mugowe ma pesa ma romo talenta apar ri Gabael, omin Gabria, ni wokan ran.

¹⁵ To munyo Salimanesa otho, to wode Senakerib lunjo waŋe, to ngudin madongo ma donjo Mediya jolokere ma kiber aluwa t'aweyo kidho koro.

Tobit yiko jom'otho

¹⁶ I hongo pa Salimanesa atimo tic ma miyo kony ri wade paran, jono ma jobedo jonono paran.

¹⁷ Oyido amiyo cemo paran ri joma kec neko jo kodi nangin paran ri joma nitie nono; aka k'oyido aneno delkwoŋ ji paran ma jotho obol woko yuŋey kor udi ma Ninivi, oyido ayiko jo.

¹⁸ Ayiko bende moro je ma Kere Senakerib oneko munyo go obino gi ŋwec wok i Yuda i hongo no ma thumo banja ma kere ma i polo oyimo kwoŋe kwoŋbedo luwo pere marac kwoŋ Were. Rupiri i nge pere go oneko Joisiraili kweth; to oyido akwanyo delkwoŋ jom'otho manyaliŋliŋ t'ayiko jo. Ameno munyo Senakerib orango jo go k'onyalo nwaŋo jo.

¹⁹ Kenyo to Janinivi moro kidho to waco ri kere kwoŋan, ni oyido ayiko jo; kenyo t'apondo. To munyo atieko niaŋ ni kere oyido otieko ŋeyan aka oyido raŋo nekan, lworo omakan t'aringo woko.

²⁰ Kenyo t'imako gigipiny paran je; ongoye gim'owey ran ma k'oteri i kakan pesa pa kere kwanyo woko dhako paran Ana kodi wodan Tobia.

Wod omin Tobit botho go

²¹ To mafodi k'oromo ndelo piero aŋwen wot Senakerib ario joneko go, to joŋweco i gote ma Ararat, to wode Esarhadon lunjo waŋe. Go oketho Ahikar, wod omin an Hanael bedo jatel ma gima mako pesa je ma ker pere, to bedo gi meni i kisi gimoro je ma timere.

²² Ahikar opido ran, t'agik Ninivi. I hongo no Ahikar am'oyido obedo jatiŋ agwata madwoŋ, jakur ma gima ridho ni gim'ondiki owok bongi kere, kodi jadwoŋ ma gima timere ma mako kwoŋ pesa m'obedo apa Kere Senakerib ma Asiria; ameno to Esarhadon doko to ketho go i dwoŋ. Ahikar oyido obedo wod omin an aka ameno wat ma k'osunga.