Rieko pa Yesu wod pa Sirak 51 - KITAWO MALEŊ Catholic

Wer ma foyo

¹ Afoyin, awi Rwoth kodi kere; t'apakin, awi Were Jaboth paran. Afoyo nyingin,

² kwoŋbedo itieko kikwonga an t'ikonyan. Itieko bothan wok itho, kodi kwoŋ twodo marac g'awaca nyingi.

³ Ikonyan i hongo ma ŋatiman oyido kinyal; i wor perin m'oasere ibothan kwoŋ teko kweth m'atieko ŋeyo, wok kwoŋ nge ma dakirok pa jokwor paran, m'oyido jomito cowo kwo paran,

⁴ wok kwoŋ yiro m'ogeŋo ŋetan to diyan m'owok kwoŋ mac m'akimoko;

⁵ wok i pendi piny pa jom'otho, wok kwoŋ lew jo m'otop gi twodo.

⁶ Awaca nyingi pa lew ma k'otire ri kere. Cunyan ocore cegin gi tho, aka kwo paran oyido nitie i thengi piny pa jom'otho.

⁷ Jokwor paran jothokan i kisi thenge. Arango ŋatimoro ni wokonyan to ngoye kad'acel.

⁸ Kenyo t'apoyo ŋono perin, awi Rwoth, kodi wor perin ma wok cene, kole ibotho jono ma jokurin t'ibotho jo i cingi jokwor pajo.

⁹ Kenyo t'adhiro kwac paran wok piny, t'akwayo ni wobothan kwoŋ tho.

¹⁰ Akwayo ama: Awi Rwoth, ibedo Baba; ikir'ijwangan i hongo ma teko, munyo angoye gi kony kwoŋ jokwor ma jodelok.

¹¹ Abino pako nyingin noknok, t'awero wer ma foyo. Iwinjo kwac paran,

¹² t'ibothan kwoŋ rerok t'ibothan i hongo ma teko. Riameno, afoyin aka apakin, aka afoyo nyingi Rwoth.

Rango rieko

¹³ Munyo fodi athin, munyo fodi akicako woth, akwayo rieko gi miseni.

¹⁴ Akidho i Ot pa Were t'akwayo go, aka alarango go tundo tho.

¹⁵ Wok i kwo paran ma soye tundo ioro paran ma tegino, go otieko bedo yodirok paran. Atieko luwo ger pere tirtir wok i thino paran.

¹⁶ Aciko ithan nyak'adec t'ajolo go, t'anwaŋo fonji mathoth ri an won.

¹⁷ Atieko noknok bedo jafonjirok aka afoyo kisi nyatoro ma fonjan.

¹⁸ Oyido atieko yere bedo mariek aka oyido amiyere ri gima bero kelo. Cunyan k'oraman.

¹⁹ Alwenyo ri rieko aka oyido akilok wac i nger m'oyido atim'iye gigipiny. Munyo akwayo, g'aŋedha cuny apusere i nger m'oyido anoki ye gi rieko.

²⁰ Aketho cunyan kwoŋe, aka gi cunyan m'olony anwaŋo go. Atieko nwaŋo rieko wok cuka anwaŋ go; aka riameno ak'obedi m'ongoye go.

²¹ Cunyan ogure ma rango go; riameno atieko nwaŋo kemba ma dicwe.

²² Rwoth omiyan lewan paka kemba, aka alapako gine go.

²³ Core win cegin kodan, wijoma wikisoma, wibedi i kafonjirok paran.

²⁴ Raŋo iyeyo ni ikuya gimoro, aka ongoye gim'itim ma mako kwoŋe?

²⁵ Aŋamo dhokan t'awaco ni, Nwaŋ win rieko ri wiwegi m'ongoye pesa.

²⁶ Kethi ŋutin i majogi mere, aka iwey cunyin wonwaŋi fonji; go nwaŋere cegin.

²⁷ Iwon nenin gi waŋin ni atieko timo tic to nyaka adec t'anwaŋo ri an won kwo m'okwe.

²⁸ Winji fonji paran to nyaka adec, aka luwo kwoŋan ilanwaŋo feza gi zahabu.

²⁹ Weyi cunyin wofore i ŋono pa Were, aka ikir'ibedi giwickwot ma pako go.

³⁰ Tim tic perin i hongo maber, aka i hongo pere won, Were bino miyin kemba perin.