Rieko pa Yesu wod pa Sirak 50 - KITAWO MALEŊ Catholic

Simon wod pa Onia

¹ Jatel pa wutmin kodi delok pa ji pere oyido obedo jadwoŋ pa jocway ri Were i wi migam Simon wod pa Onia m'oyiko Ot pa Were.

² Go am'oketho tiendi ot ri kor udi ario m'oŋawere, kodi cel ma Ot pa Were.

³ I hongo pere okuny kacoko pi, madwoŋ paka pipa ma ywel.

⁴ Go otimo can nger ma botho ji pere kwoŋ kisika, to goyo cel to thoko gine tindi madwoŋ kwoŋ monji.

⁵ Go oyido nitie gi dwoŋ marom nedi kareno ji jothoko go, munyo owok i Kabedo Maleŋ Swa!

⁶ Go oyido cale paka sulwe m'odikin i dier pondeponde, paka dwe m'oŋinere i ndir ma kalima;

⁷ paka waŋceŋ maliel i ot pa Jamalo Swa, paka lifudo ma minyin i dwoŋ ma pondeponde,

⁸ paka mawuwa rosi i hongo ma ranyak marapena, paka yath lili ma thengi pi, paka withi yath ma nyaka gulo wi Lebanon i hongo ma ceŋ.

⁹ Paka buban maliel, paka atawo ma zahabu m'oodi aka oyiki, maŋon gi nger telin ma welo moro je.

¹⁰ Paka yath oliv m'olemo ojaŋ'iye, paka yath lwiyo m'olile.

¹¹ Munyo Simon oruko nanga pere ma welo to kidho malo i wi migam maleŋ kareno orukere i dwoŋ ma malo swa, go omiyo diedipo ma Ot pa Were dwoŋ.

¹² Munyo ojolo adece ma cowirok wok i cingi jocway ri Were i wi migam, kareno ocungo i thengi migam gi wutmin ma jokony pere jothoko go paka mawuwa, go oyido cale yath sida ma nyaka ay ma Lebanon ma kor thith othoko.

¹³ Nyikway Aron je i dwoŋ pajo jotiŋo mic pa Rwoth i cingi jo ruwaŋ kacokirok je ma Isiraili.

¹⁴ Munyo otieko timo tic ma migam, gi cano mic ri Jamalo Swa, Jameni Je,

¹⁵ otelo cinge to kwanyo agwata to konjo mic amadha pigi olemo; go okonjo woko i tiendi migam, ma ŋwece kur mere sangala Jamalo Swa, kere pa gi je.

¹⁶ Kenyo wot Aron, jokudho gwara pajo ma feza m'oodi. Jokoko gi dwondi jo ma malo ma Jamalo Swa onyalo winjo.

¹⁷ Kenyo to ji je kanyacel piyo piyo jogore piny gi nyim jo ma lamo Rwoth, Jameni Je, Were ma Jamalo Swa.

¹⁸ Kenyo to jower jocako wer pak pere gi dwondi jo mamit ma malo.

¹⁹ Ji pa Rwoth Jamalo Swa jomiyo kwac pajo ruwaŋ ŋata Jawor, cuka can ma lamo Rwoth orumo, to jocowo tic ma lamo Rwoth.

²⁰ Kenyo to Simon loro piny wok i wi migam, orieyo cinge i wi cokirok je ma Isiraili, to miyo ji silwany to nwaŋo dwoŋ i nyinge.

²¹ To jokulo wiy jo piny i lamo madirio, ma jolo silwany wok bongi Jamalo Swa.

Silwany

²² Onyo riameno, pak win Were ma polo gi piny, go ma kisi kamoro timo tic madongo ma gir'aura, go m'amiyo wan dongo wok i thino, aka tiyo gi wan gi wor pere.

²³ Weyi go womiy wan kisangala ma cuny, aka weyi siem wobedi i hongo mawan i Isiraili, paka i hongo macene.

²⁴ Weyi go womedere gi nyutho ŋono pere riwan, aka weyi go wobothi wan i hongo mawan.

Nonin adek ma kimiti

²⁵ Nitie nonin ario m'adak, aka mar'adek mere ma kiripi kada lwoŋo ni nono:

²⁶ Me obedo Joedom, joma bedo i tindin madongo ma Filistia, kodi jomamiŋ ma Samaria.

Rieko pa Yesu wod pa Sirak

²⁷ An, Yesu wod pa Sirak, nyakwar Eliazar ma Yerusalem, aketho rieko paran je i ndiko kitawo me ma miyo fonji gi ŋeyo ri joman.

²⁸ Jasilwany a ŋata ciko ithe ri fonji me. Ŋata ketho fonji me i pal cunye bino lokere mariek.

²⁹ Ŋat'okwo gi fonji me bino bedo matek ri kisi gimoro, kwoŋbedo lworo Rwoth obedo dhoyo pajo.