Rieko pa Yesu wod pa Sirak 49 - KITAWO MALEŊ Catholic

Yosia

¹ Rapoy pa Yosia mit paka ŋwece kur pa buban m'oruw maber, mit paka mo kic k'ibilo, paka wer i kalima ma vini.

² Yosia otimo gim'otire gi wiro tim pa ji, kodi kwanyo woko amien ma kidakana.

³ Go omwole kicutho ma winjo Rwoth; to ridho dini mar'adieri i hongo ma kidakana no.

⁴ Kerin je, kwanyowoko Daudi, Hezekia kodi Yosia, oyido jobedo joreco ma kiwacere, rupiri jojwango cik pa Jamalo Swa; to kerin ma Yuda jorumo.

⁵ Jomiyo meni pajo ri joman, gi dwoŋ pajo ri nono makicar,

⁶ ma jocwinyo mac i tindi madwoŋ m'oyer ma kamaleŋ, to jomiyo ijwango royin mere, paka Yeremia oyido otieko waco.

⁷ Oyido otiek cando Yeremia, kad'oyido otiek yero go paka jatuci wac Were mafodi k'onywol go, ma fudho gi ywayo piny, ma reyo gi ma kikengila kodi bende ma geto gi ma pidho.

Ezekiel

⁸ Obedo Ezekiel m'onyuth menyirok madwoŋ, ma Were onyutho go i wi cawila kodi cwec makwo ma jobwombi gin.

⁹ Go bende oluwo kwoŋ jatuci wac Were Yobu, ma noknok otimo gim'otire.

Jotuci wac Were apar g'ario

¹⁰ Weyi cokin pa jotuci wac Were apar g'ario wokel kwo manyen wok kamoro je ma joŋare iye, rupiri jodiyo cuny Joisiraili to botho jo gi geno ma miseni.

Zerubabel gi Yosuwa

¹¹ Wanopaki nedi Zerubabel? Go oyido cale atego i cingi Rwoth maracuc,

¹² paka oyido obedo Yosuwa wod pa Yehozadak. Jogeto kendo Ot pa Rwoth maleŋ, m'oyik wok con ri dwoŋ ma cil gi cil.

Nehemia

¹³ Rapoy pa Nehemia bende dwoŋ. Go ogeto kendo kor udi m'osika ma Yerusalem, to ketho waŋkace gi nywenye. Go ogeto kendo pecin mawan m'oyido jobedo gundin.

Kwarere mawan

¹⁴ Otiek cweyo ji manok i piny ma jocale Enoka, rupiri oter go i polo wok piny.

¹⁵ Ongoye bende ŋat'otiek nywolo ma cale Yozefu; kiri cokin pere okwonga.

¹⁶ Sem, Seth kodi Enoka omiy jo dwoŋ, to maloyo giman je m'ocwey makwo oyido obedo Adam.