Jothum Banja 1 - KITAWO MALEŊ Catholic

Yuda kodi Simeo jomako Adonibezek

¹ Rumacen ma tho pa Yosuwa, Joisiraili jopenjo Rwoth ni, “Ŋa ma latelo kadho lweny riwan gi Jokanan?”

² Rwoth odwoko ni, “Yuda ama latelo kadho. Neni atieko miyo lowo i cingi go.”

³ Yuda owaco ri omin go Simeo ni, “Kadhi malo kodan iy'adec paran, aka weyi walweny gi Jokanan; an bende alakadho kodin iy'adec perin.” Ameno Simeo okadho gi Yuda.

⁴ Yuda okadho malo aka Rwoth omiyo Jokanan kodi Joperiz i cingi jo; to joneko ji 10,000 kwoŋ jo i Bezek.

⁵ Jonwaŋo Adonibezek i Bezek, jolwenyo gi go, aka jokengila Jokanan kodi Joperiz.

⁶ Adonibezek oringo, to joriemo go aka jomako go to jothumo lwet cinge ma thwon kodi lwet tiende ma thwon.

⁷ Adonibezek owaco ni, “Kerin piero abirio gi lwet cingi jo ma thwon kodi lwet tiendi jo ma thwon m'othumi woko oyido jodimo ŋinjeŋinje i tiendi meza paran. Paka atieko timo, ameno Were otieko culan.” Jokelo go i Yerusalem to tho kenyo.

Yuda mako Yerusalem kodi Hebron

⁸ Ji ma Yuda jolwenyo gi Yerusalem aka jomako. Joneko ji mere g'abor to jocwinyo gi mac.

⁹ Rumacen ji ma Yuda jokadho piny lweny gi Jokanan m'oyido jobedo i piny matendere, i yupiny, kodi i milelo.

¹⁰ Yuda omonjo Jokanan m'oyido jobedo i Hebron (nyingi Hebron con mere oyido obedo Kiriath Arba) aka jokengila Sesay, Ahiman kodi Talmay.

Othiniel mako tindi madwoŋ Debir

¹¹ Yuda owok kenyo to monjo ji m'oyido jobedo i Debir, nyingi Debir con mere oyido ilwoŋo ni Kiriath Sefer.

¹² Kaleb owaco ni, “Ŋat'omonji Kiriath Sefer to mako, alamiyo Akisa, nyaran paka dhako pere.”

¹³ Othiniel wod pa Kenaz, aka omin Kaleb mathin, omako Debir Sefer, to Kaleb miyo Othiniel nyare Akisa paka dhako.

¹⁴ Munyo Akisa obino bongi Othiniel, okwayo ni go wokway bamere lowo. Munyo Akisa loro wok i wi punde, Kaleb openjo go ni, “Kwac perin aŋo?”

¹⁵ Akisa odwoko ni, “Miyan silwany; kole itieko miyan lowo ma yupiny, miyan bende waŋ pi. Kaleb omiyo go waŋ pi ma malo kodi ma piny.”

Loyo pa Yuda kodi Benyamin

¹⁶ Nyikway Kena, or Musa, jokadho malo wok i tindi madwoŋ ma yen thith kanyacel gi nyikway Yuda i thim ma Yuda, manitie i yupiny cegin gi Aradi, aka jobedo i dier jono.

¹⁷ Yuda okadho gi omin go Simeo, aka kanyacel jokengila Jokanan m'oyido jobedo i Zefath, joreyo woko kicutho to jolwoŋo ni Horima.

¹⁸ Yuda omako Gaza gi adec mere je, Asikelon gi adec mere je, Ekiron gi adec mere je.

¹⁹ Rwoth oyido nitie gi Yuda, go omako piny matendere, to k'onyalo riemo woko ji m'oyido jobedo i milelo kwoŋbedo oyido jonitie gi cawilin ma nyweny.

²⁰ Omiy Kaleb Hebron paka Musa oyido owaco, aka Kaleb oriemo woko kenyo wot Aneki adek.

²¹ Nyikway Benyamin jok'oriemo woko Joyebus m'oyido jobedo i Yerusalem; to Joyebus jobedo kanyacel gi nyikway Benyamin i Yerusalem tundo konon me.

Yozefu mako Bethel

²² Nyikway Yozefu bende jomonjo Bethel; aka Rwoth oyido nitie gi jo.

²³ Jooro jopendo i Bethel. (Nyingi Bethel con mere oyido obedo Luz)

²⁴ Munyo joneno jacwo moro wok i tindi madwoŋ, jowaco rigo ni, “Mondo nyuthi wan kadonjo i tindi madwoŋ, aka walanyuthin wor.”

²⁵ Jacwo no onyutho jo kadonjo i tindi madwoŋ, joreyo woko tindi madwoŋ g'abor, to joweyo jacwo no kodi peco pere kadho.

²⁶ Jacwo no okadho i lowo pa Johiti, ogeto tindi madwoŋ kenyo to cwoko nyinge ni Luza, paka fodi ilwoŋo kiri konon.

²⁷ Manase k'oriemo woko ji m'oyido jobedo i Bethsan gi calin mere, Tanak gi calin mere, Dor gi calin mere, Ibilim gi calin mere, Megido gi calin mere, to Jokanan jomedo bedo i lowo no.

²⁸ To munyo Joisiraili jolokere matek, jomiyo jo timo tic arom, ma jok'oriemo jo woko kicutho.

²⁹ Efrayim bende k'oriemo woko Jokanan m'oyido jobedo i Gezer, to Jokanan jomedere bedo i dier jo i Gezer.

³⁰ Zebulun k'oriemo woko ji m'oyido jobedo i Kitron, kosa ji m'oyido jobedo i Nahalal, to Jokanan jobedo i dier jo, aka jotimo tic arom.

³¹ Aser k'oriemo woko ji m'oyido jobedo i Ako, Sidon, Alab, Akizib, Helba, Afik, kodi Rehob.

³² To jo Asera jobedo i dier Jokanan, ji m'oyido jobedo i lowo no, kole jok'oriemo woko jo.

³³ Nafital k'oriemo woko ji m'oyido jobedo i Bethsemes kodi i Beth Anath, to jobedo i dier Jokanan m'oyido jobedo i lowo no. Kwanyo woko ji ma Bethsemes kodi ji ma Beth Anath jotimo rijo tic arom.

³⁴ Joamor jomiyo nyikway Dan diyirok wi got; kole jok'oyeyo jo loro piny i milelo.

³⁵ Joamor jomedere bedo wi got Heres, i Ayijalon, kodi i Salibim. Kucel nyikway Yozefu joloyo jo gi meni aka jomiyo jo tic arom.

³⁶ Kew pa Joamor wok kama Akirabim idho malo, wok i Sela kadho malo.