Jogalasia 6 - KITAWO MALEŊ Catholic

Tiŋi bieto pa nyawotin

¹ Wutmera, k'omaki moro munyo timo reco moro, win ma wimaro gima nyacuny witir go; to witim ameno gi mwolo. Aka wiwegi gwokere win, ŋey wikiri widonji i karatem bende.

² Konyere win gi tiŋo bieto ma jowoti win nitie gine, rupiri ameno aka wibino mako cik pa Kristo.

³ Ka moro paro ni go gimoro, ma to go ongoye gi dwoŋ moro meno won miŋere.

⁴ Dhano je won ripo kikaŋasa kite. Ka ber, won nyalo yumirok gi i cunye, ma k'opima kodi gima ŋatiman otieko timo.

⁵ Kole dhano je won ripo tiŋo bieto ma go nitie gine.

⁶ Ŋat'ifonjo wac pa Were ripo poko ye gi jafonji pere gigipiny mabeyo je ma go nitie gine.

⁷ Wikiri wiwondere, ongoye ŋata nyalo miŋo Were. Dhano je keco gima go ocwoyo.

⁸ Ka go ocwoyo i ndelo mar'awanya pa del pere, go bino keco kenyo tho; ka go ocwoyo i ndelo ma Cuny, wok kwoŋ Cuny Maleŋ go bino keco kwo makirum.

⁹ Am'omiyo, wakiri waol gi timo bero; kole ka wakijok timo ameno, ndir bino tundo ma wabino kec'iye gima nyak.

¹⁰ Am'omiyo, hongo je ma wanitie gi thwolo waripo timo bero ri dhano je, to tektek ri joma jobedo jowoti wan i yeyo.

Fonji gi moth macowe

¹¹ Neni win nyikuta madongo m'andiko gine riwin gi cingan won!

¹² Joma jotemo romo win nike withumere meno joma jomito kwoto gi pakirok kwoŋ gigipiny manyadel. Ato jotimo ameno nike aka wokiri wolwenyi gi jo ro yeyo musalaba pa Kristo.

¹³ Kole kada jom'othumere wegi bende jokimaki Cik! Onyo jomito withumere aka ŋey jowoyumere nike wiyeyo tim manyadel no.

¹⁴ To an, abino yumirok gi musalaba pa Rwodhiwan Yesu Kristo kende; kole gi musalaba pere aneno pa piny otho ran aka abende atho ri awanya ma piny.

¹⁵ Ki wac moro kosa dhano othumere kosa be. Kole gimadwoŋ a lokirok cwec manyen ayin.

¹⁶ Siem gi ŋono wobedi ri joma jobino mako tiendi wac me i kwo pajo, kodi ri ji pa Were je!

¹⁷ Macowe, moro wokiri odoko wojokan; kole waŋpoyo manitie kwoŋan ka nyutho nike abedo ŋeca pa Yesu.

¹⁸ Weyi nema pa Rwodhiwan Yesu Kristo wobedi kodi wijoje, wutmera gi nyimera. Ameno.