Jogalasia 5 - KITAWO MALEŊ Catholic

Thwolo ma timo gimoro ma jokristo jonitie gine

¹ Kristo otieko gonyo wan i twec to miyo wan siem! Riameno cungi win, paka ji man siem, aka wikiri wiyey lokirok ŋecin kendo.

² Winji win! An Paulo awaco riwin gime: Ka wiyeyo thumirok, meno nyutho ni Kristo ongoye gi kony moro riwin.

³ Amito medo waco kendo ri dhano je ma yenyo ni wothum ni go onyo ripo luwo Cik je.

⁴ Win ma wiyenyo nike wokethi win i tiro gi Were cungo kwoŋ Cik kole witieko pokirok kodi Kristo; aka witieko kiri podho gi eye kwoŋ nema pa Were.

⁵ To wan gi geno ni Were bino ketho wan i tiro gi go, gi meni pa Cuny Maleŋ pa Were ma tiyo i yeyo mawan; aka meno a gima wakuro.

⁶ Kole i Kristo Yesu, thumirok kosa weyo ma k'othumere kikel pokirok moro; gimadwoŋ obedo yeyo ayino ma nyuthere i mar.

⁷ Kole onwaŋo wiŋweco maber, to ŋa m'odoko ociero win winjo adieri? Ŋato odwoŋo win nedi?

⁸ Kiti adwoŋa no kiwoki kwoŋ ŋat'olwoŋo win be.

⁹ Kole nyaka thow manok won ama miyo moko gipi kwot paka iwaco.

¹⁰ Aka fodi aridho ni wik'obedi gi paro man m'opokere, to ŋato, kada bedi ŋa, ma ruwo wiy win no, bino wodho cul mere.

¹¹ To an, wutmera, kere raŋo ma fodi ilwenyo kodan k'inen adieri fodi afonjo ni thumirok yenyere? Kole meno nyutho ni fonji paran kwoŋ musalaba pa Kristo di kikwiny jomoro be.

¹² Ayenyo ni joma jokwinyo win no jowomedere gine; weyi jowomedere gi thumirok.

¹³ To win, wutmera, olwoŋi win ni wibedi i siem. To siem me wokiri wolokere riwin gigoŋirok ma yeyo awanya ma del dhumo win. Kucel, konyere win cungo kwoŋ mar mewin.

¹⁴ Kole Cik gibe oloki macek i or acel ni, “Mari nyawotin paka iwon imarere.”

¹⁵ To ka cale pa wikayere aka wicamere p'ogwaŋe meno kere kure win; ameno winyalo rere woko kicutho.

Cuny kodi kula pa del

¹⁶ Me a gim'awaco: Woth win i Cuny aka wik'otim gim'awanya pa del mito.

¹⁷ Kole awanya pa del lwenyo gi Cuny aka Cuny bende lwenyo kodi awanya pa del; jario me jobedo jokwor, aka gino miyo ikinyal timo gim'iyenyo ni itimi.

¹⁸ Ka Cuny ama telin, meno nyutho ni ikitudere i luwo Cik.

¹⁹ Gima kula pa del timo neno kamaler: Neno i kidakana, koc, kodi i tim ma kiripi;

²⁰ i lamo cal makicar kodi yido, bedo i kwor gi dhano, laro dwoŋ, timo nyeko, mako ŋonge, gwondo, dhawirok, tiakirok,

²¹ awanya ri gipa dhano, mero, timo woro, kodi timo gigipiny man ma cale gi me. Anyutho win kicutho paka atieko timo con, joma timo gigipiny me jok'odonji i Ker pa Were.

²² To Cuny Maleŋ nyak gigipiny me: Mar, kisangala, siem, diyo cuny, wor, bero, genirok,

²³ mwolo, kodi kuro cuny. Ongoye cik ma piemo gi gigipiny paka me!

²⁴ Aka joma jobedo apa Kristo Yesu jotieko neko woko kula pajo ma del, kodi icirok mere kodi awanya mere.

²⁵ Ka wakwo gi meni pa Cuny, meno bende ber wawothi i kwo manyacuny.

²⁶ Wakiri wabedi ma waparo ni wawegi wacowere, kosa watim kisinye kosa watim nyeko gi joman.