2 Samwiri 16 - KITAWO MALEŊ Catholic

Daudi romo gi Ziba

¹ Munyo Daudi okalo ye wilwindi ma got, oromo gi Ziba, ŋeca pa Mefiboseth. Ziba oyido nitie gi punde ario ma jotiŋo mugat 200 kayego 100 ma nyingi vini m'othwo, ngota 100 mar'olemo ma nyaka ofon, gi pien vini.

² Aka kere openjo Ziba ni, “Ikidho timo aŋo gi gime je?” Ziba odwoko ni, “Punde no jobedo aperin gi peco perin ma gweyo, aka mugat gi ranyak obedo apa cwo perin acama, aka vini mere obedo amadha ka jool i thim.”

³ Kere openjo Ziba ni, “Nikune Mefiboseth, nyakwar Saulo jadwoŋ perin?” Ziba odwoko ni, “Panen, go odoŋ Yerusalem, rupiri go paro ni Joisiraili joladwoko rigo ker pa Saulo kwari mere.”

⁴ Kere owaco ri Ziba ni, “Panen, kisi lim m'oyido obedo apa Mefiboseth je pama aperin.” Ziba odwoko ni, “Abedo ŋeca perin, aka weyi asangala in noknok jadwoŋ!”

Daudi gi Simey

⁵ Munyo kere otundo i tindi Bahurim, acel kwoŋ wade pa Saulo m'ilwoŋo ni Simey wod pa Gera, owok romo gi Daudi; aka paka go obino, okwoŋo Daudi.

⁶ Simey ocako dwiro Daudi gi jodhum pere gi telin makada nende cwo pa Daudi gi jokur pere oyido jothoko go.

⁷ Simey okwoŋo go kanyo waco ni, “Kadhi! Kadhi! Ijanek! Aka ibu kony!

⁸ Imayo Saulo ker pere, aka onyo pama Rwoth miyin gir'acula ma neko ji kweth wok i peco pa Saulo. Rwoth womiy wodin Absalom ker, aka in irere, rupiri ijanek.”

⁹ Abisay, wod pa Zeruya owaco ri kere ni, “Jadwoŋ, raŋo iyeyo gwok m'otho me kwoŋin? Yeyan akidhi aka aŋadi woko ŋute!”

¹⁰ To kere waco ri Abisay gi omin go Yowab ni, “Meno gima kimaki kwoŋ win. K'inen go kwoŋan rupiri Rwoth owaco rigo, ŋa manitie gi dwoŋ ma penjo go atoŋa mere?”

¹¹ Daudi omedere waco ri Abisay gi cwo pere ni, “Neni, wodan won rango kwo paran; t'onyo raŋo wibwok ka janono pa Benyamin me bende timo amanago! Rwoth owaco rigo ni wokwoŋan, riameno weyi win go wokwoŋan.

¹² Kono Rwoth bino neno litho paran, aka Rwoth oculan bero i waŋ lam me.”

¹³ Ameno Daudi gi cwo pere jomedere i yo pajo. Simey omedere luwo jo kanyo wotho i wi tendere tirtir gi jo, ka kwoŋo Daudi, aka odwiro go gi tele to dunyo kwoŋe fukefuke.

¹⁴ Kere gi cwo pere oyido jool munyo jotundo i malawa Yordan, aka joywomere kenyo.

Absalom i Yerusalem

¹⁵ Absalom gi Joisiraili m'oyido nitie gi go jobino i Yerusalem, aka Ahithofel oyido nitie gi jo.

¹⁶ Munyo Husay, mere pa Daudi m'ogenere oromo gi Absalom, okoko ni, “Yindira kere! Yindira kere!”

¹⁷ Absalom openjo go ni, “Aŋo m'otimere gi wor perin ri mere perin? Raŋo ikikadho gi go?”

¹⁸ Husay odwoko ni, “Be; ri ŋata Rwoth, gi ji, gi cwo ma Isiraili joyero, ama alabedo apere, aka aladoŋ apere.

¹⁹ Rupiri ŋa man m'abedi ŋeca pere, ka k'obedo wod pa jadwoŋ paran! Paka oyido abedo ŋeca pa benin, apaka bende abino bedo ŋeca perin.”

²⁰ Kenyo Absalom owire bongi Ahithofel aka openjo go ni, “Miy rieko perin; watim aŋo?”

²¹ Ahithofel odwoko ni, “Kadhi inindi gi mon pa benin ma gi thenge ma go oweyo kuro cel pa kere. Kenyo nyaka kisi nyatoro i Isiraili bino ŋeyo ni benin terin paka jakwor pere, aka ji ma joluwin jobino limo meni.”

²² Ameno oger ri Absalom wema i wi cel pa kere, aka Absalom okidho to nindo gi mon pa bamere ma gi thenge odieceŋ par ma kisi nyatoro je neno.

²³ Rieko moro je ma Ahithofel oyido miyo i ndir no oyido iyere gine paŋini oyido obedo wac pa Were won; aka Daudi kiri gi Absalom je oyido joluwo.