2 Kerin 24 - KITAWO MALEŊ Catholic

¹ I hongo ma dhum pa Yehoyakim, kere Nebukadineza ma Babilon omonjo Yuda, aka ma oro adek Yehoyakim obedo pere; to rumacen gwenyere kwoŋe.

² Rwoth ooro jolweny ma Babilon, Siria, Mowab, kodi Amon monjo Yehoyakim joworey woko Yuda paka Rwoth oyido owaco luwo kwoŋ ŋecin pere jotuci wac Were.

³ Adieri gime opodho kwoŋ Yuda luwo i cik pa Rwoth, ŋey wokwany woko ji ma Yuda ruwaŋe, ro reco ma kere Manase oyido otimo,

⁴ kodi tektek mere kwoŋbedo oneko ji ma bubanja. Rwoth k'onyalo cwako Manase ro gino.

⁵ Gigipiny man je ma Yehoyakim otimo ondiki i kitawo ma kigana mako kwoŋ kerin ma Yuda.

⁶ Yehoyakim otho, aka wode Yehoyakin olunjo go paka kere.

⁷ Kere ma Misir kodi jolweny pere jok'owok Misir kendo kwoŋbedo kere ma Babilon oyido otieko mako adec je m'oyido obedo apa kere ma Misir, wok i malawa Yufrete tundo i kew gi Misir.

Kere Yehoyakin ma Yuda

⁸ Yehoyakin obedo kere ma Yuda munyo jaoro apar g'aboro, aka odhumo i Yerusalem ma dwe adek. Yokimere oyido obedo Nehusita nyar Elinathan ma Yerusalem.

⁹ Yehoyakin oluwo kite pa bamere, to timo reco ruwaŋ Rwoth.

¹⁰ I hongo ma dhum pere ama Nebukadineza otelo jolweny ma Babilon kwoŋ Yerusalem to jothoko.

¹¹ I hongo ma thoko tindi Yerusalem, Nebukadineza won gipi obino i Yerusalem,

¹² aka kere Yehoyakin, min, wote, jodhum pere, kodi jodhum ma cel pa kere jotiŋo cingi gin ri Jobabilon. I oro mar'aboro ma dhum pa Nebukadineza otero Yehoyakin paka jatwec.

¹³ Nebukadineza otiŋo lim je ma Ot pa Rwoth kodi ma cel pa kere, oturo gigipiny ma zahabu ma kere Solomon oyido otimo aora i Ot pa Rwoth, paka Rwoth oyido otieko waco.

¹⁴ Nebukadineza otero ji ma Yerusalem paka jotwec, jodhum ma Yerusalem, cwo ma jotel je, kanyacel 10,000. Okadho gi cwo ma jondijo je, kiri gi jokidonya cumin, to weyo nyaka jocandi loyo i Yuda.

¹⁵ Nebukadineza otero Yehoyakin paka jatwec i Babilon, kanyacel gi min, mon pere, jodhum pere kodi jotel ma Yuda je.

¹⁶ Nebukadineza otero cwo ma jonitie gi cwe je i Babilon, joje 7,000 kodi jondijo 1,000 kiri gi jokidonya cumin. Me je oyido cwo ma jobad gin aka jocwiny ma lweny.

¹⁷ Kenyo Nebukadineza oketho ner Yehoyakin m'ilwoŋo ni Matania bedo kere ma Yuda aka owiro nyinge ni Zedekia.

Kere Zedekia ma Yuda

¹⁸ Zedekia obedo kere ma Yuda munyo jaoro piero ario g'acel, aka odhumo i Yerusalem ma oro apar g'acel. Yokimere oyido obedo Hamutal nyar Yeremia ma wok i Libina.

¹⁹ Kere Zedekia otimo reco kwoŋ Rwoth paka kere Yehoyakin oyido otimo.

²⁰ Rwoth omako nge gi ji ma Yerusalem kodi Yuda aka okwanyo woko jo ruwaŋe. Aka Zedekia ogwenyere kwoŋ kere ma Babilon.