2 Jothesalonika 1 - KITAWO MALEŊ Catholic1 Balwa m'owok bongi Paulo, Silvano kodi Timothe. Ri kitipa pa jom'oyeyo ma Thesalonika ma jobedo apa Were Bawan kodi Rwoth Yesu Kristo. 2 Weyi Were Bawan kodi Rwoth Yesu Kristo jowomiy win nema gi siem. Thumo banja ka Kristo odwoko 3 Waripo foyo Were riwin hongo je, wutmin wan! Obedo riwan gim'otire timo ameno, rupiri yeyo mewin medo dongo swa aka mar ma kisi dhano kwoŋ win nitie gine ri nyawote onyo medere. 4 Am'omiyo, wawegi wayumere gi win i dier kitipa pa jom'oyeyo Were. Wayumere gi kite ma wimedere gine ciro teko gi bedo kodi yeyo, i lweny je kodi i candirok ma win'iye. 5 Me a gima nyutho ni thumo banja pa Were otire, aka gima wok'iye, ibino kwano win paka joma ripo gi Ker pa Were, ma wicandere rigo. 6 Kole bedo gim'otire ka Were okelo candirok ri joma miyo wicandere, 7 aka bino kelo ywomirok riwin ma pama wicandere, kodi riwan bende. Gino latimere ameno munyo Rwoth Yesu onenere wok i polo gi jomalaika pere ma jomeni, 8 gi mac maliel, ma miyo joma kuya Were kodi joma kiwinji Wac Manyen Maber mapa Rwoth Yesu gir'acula. 9 Jobino limo gir'acula ma rerok woko cil gi cil munyo okwany jo woko ruwaŋ Rwoth kodi meni pere ma didwoŋ, 10 munyo go bino Ndelo no limo dwoŋ wok bongi ji pere maleŋ je, kodi nwaŋo wor bongi jom'oyeyo je. Wibende wibino bedo i dier jo, rupiri witieko yeyo mikwenda ma wakelo riwin. 11 Me am'omiyo wakwayo riwin noknok, ni Were mawan wokonyi win winyal ripo gi kwo m'olwoŋ'iye win. Aka gi meni pere, woyeŋi cuny win iy'atoŋa maber ma winigine, kodi tic ma witimo wok kwoŋ yeyo. 12 Meno aka nyingi Rwodhiwan Yesu bino limo dwoŋ bongi win, aka win bende bonge, gi nema pa Were mawan kodi Rwoth Yesu Kristo. |
Dhopadhola DC Bible © Bible Society of Uganda, 2018.
Bible Society of Uganda