1 Samwiri 10 - KITAWO MALEŊ Catholic

¹ Kenyo to Samwiri kwanyo mo aka okonjo i wi Saulo, ocwiyo lembe aka owaco rigo ni, “Rwoth otieko wirin gi mo paka jadhum pa Joisiraili. Ibino dhumo ji pa Rwoth aka ilabotho jo wok i cingi jokwor pajo je. Aka me a ranyuth ma bino ridho rin ni Rwoth otieko wirin gi mo dhumo ji pere Isiraili.

² K'itieko pokirok kwoŋan konon, ilaromo gi cwo ario cegin gi kaliel pa Laker i tindi Zela iy'adec pa Benyamin, aka jolawaco rin ni punde m'oyido ikidho rango otiek nwaŋo, aka benin onyo oweyo rembo kwoŋ punde onyo rembo rin ayin. Go penjo ni, ‘Anotim aŋo nyaka anwaŋ wodan?’

³ Wok kenyo k'imedere woth t'itundo i tiendi yath maleŋ i Tabor, ilaromo gi cwo adek ma jokidho lamo Were i Bethel. Acel otiŋo nyithindhi diegi, acel otiŋo mugat adek, aka acel otiŋo pien dhiaŋ m'opoŋ'iye vini.

⁴ Cwo no jolamothin to jomiyin mugat ario, m'iripo jolo wok i cingi jo.

⁵ Wok kenyo ilatundo i Kabedo Maleŋ ma lamo Were i Gibeya kama jolweny pa Jofilistia jocoker'iye. Aka ka nyaka idonjo i tindi, ilaromo gi kitipa pa jotuci wac Were ma joloro wok i kacowirok; aka jonitie gi tongol, bunde, madundo, kodi kongo jokoko malo, aka jomielo.

⁶ Piyo piyo cuny pa Rwoth bino loro kwoŋin i meni, aka in bende ibino cako koko malo ka i mielo kanyacel gi jo. Cuny pa Rwoth bino wirin to wiro kwo perin.

⁷ Ka gigipiny me je otieko timere, tim gimoro je ma ripo ni itimi rupiri Rwoth nitie kodin.

⁸ Aka ibino loro itel yuwiyan ikadhi Gilgal t'ikuran ma ndelo abirio cuka anobin rupiri abino romo kodin miyo cowirok awaŋa kodi cowirok ma siem.”

⁹ Munyo Saulo owire pokirok gi Samwiri, Were owiro adundo pere; aka gigipiny ma Samwiri owaco rigo je otundo i kare ndelo no won.

¹⁰ Munyo Saulo kodi ŋeca pere jotundo Gibeya, joromo gi kitipa pa jotuci wac Were. Kenyo won cuny pa Rwoth oloro kwoŋ go i meni to go bende cako koko malo ka mielo gi jo.

¹¹ Munyo jom'oyido joŋeyo Saulo con mere joneno paka go oyido mielo aka koko malo gi jotuci wac Were, jopenjere ni, “Aŋo m'omonjo wod pa Kisi! Saulo bende onyo ti olokere jatuci wac Were!”

¹² Jal moro ma wok iy'adec no openjo ni, “Aka jotuci wac Were me, wiŋeyo bacere pajo!” Me apaka ocaki waco ni, “Kiri Saulo je olokere jatuci wac Were!”

¹³ Munyo Saulo otieko koko malo gi miel, okidho i kacowirok.

¹⁴ Ner Saulo openjo Saulo gi ŋeca pere kenyo ni, “Wiwok kune?” Saulo odwoko ni, “Wawok rango punde; aka munyo wakinwaŋo jo, wakidho bongi Samwiri.”

¹⁵ Ner Saulo openjo go ni, “Aka Samwiri owaco rin aŋo?”

¹⁶ Saulo odwoko ni, “Go owaco riwan ni punde otiek nwaŋo.” Saulo k'owaco ri ner mere gima Samwiri owaco rigo ma mako kwoŋ go lokirok kere.

Ji joyero Saulo bedo kere

¹⁷ Rumacen Samwiri olwoŋo ji je romo gi Rwoth Mizipa.

¹⁸ To go waco ri Joisiraili ni, “Me a gima Rwoth, Were pa Isiraili waco, ‘Akwanyo win wok Misir t'abotho win wok i cingi Jomisir kodi ji man je m'oyido jodiyo win.’

¹⁹ To konon me wikwero Were mewin ma botho win wok i teko gi dinyo je; to wiwaco ni, ‘Be! Miy wan kere.’ Pama onyo wijoje cokere win ruwaŋ Rwoth luwo i nono kodi ude.”

²⁰ To Samwiri kelo nonin je to Were yero nono pa Benyamin.

²¹ Kenyo to doko Samwiri kelo kisi ot je ma nono pa Benyamin to Were yero ot pa Matri. To doko Samwiri kelo cwo je ma ot pa Matri, to Were yero Saulo. To munyo jorango Saulo jok'onwaŋo go.

²² To jopenjo Rwoth ni, “Nitie doko jacwo man?” To Rwoth dwoko ni, “Saulo dicade opondo kabuti kakano gilweny.”

²³ Ameno joŋweco to jokelo go; aka munyo go ocungo i dier ji, go oyido bor loyo ji je wok i bade kadho malo.

²⁴ Samwiri to waco ri ji je ni, “Me a jacwo ma Rwoth oyero. Ongoye ŋatiman ma cale go kwoŋ wan.” To ji je jokoko malo ni, “Yindira kere.”

²⁵ Samwiri otito ri ji je gima ripo bedo apa kere kodi tic pa kere; to ndiko je i kitawo aka oketho ruwaŋ Rwoth. To Samwiri sewila ji to waco rijo dok pecin pajo.

²⁶ Saulo bende odok peco pere i Gibeya. Cwo moro ma jomeni ma Were oyido otieko geyo adundo pajo bende to jodok gi go.

²⁷ To cwo moro ma bukony jopenjo ni, “Jame bende nyalo nedi botho wan?” Jocayo go, aka jokwero kelo rigo mic; to Saulo liŋaliŋa.