Zaburi 73 - MUMA MALER 2015

KITABU MAR ADEK ( Zaburi 73—89 ) Misach joricho

¹ Mano kaka Nyasaye ng’won ni jo-Israel! Adier, ong’won ni jogo man gi chuny makare!

² An to ne achiegni podho, ka tiendena dwaro kier,

³ nikech nyiego ne omaka gi josunga, ka aneno kaka joricho mew.

⁴ Rem ok ramgi; gin roteke, kendo dendgi ber.

⁵ Ok githagre kaka ji mamoko thagore. Adier, gionge gi chandruok ma ji mamoko nigo.

⁶ Mano emomiyo girwakore gi sunga mana ka ng’ama orwako thiwni, kendo girwakore gi kwinyo mana ka ng’ama orwako kandhu.

⁷ Wengegi ofinyo, kendo chunygi opong’ gi timbe mamono.

⁸ Gicharo ji mamoko ka giwacho gik maricho, kendo gisungore ka mbaka mag thiro ji mamoko ema gigoyo.

⁹ Giwuoyo marach kuom Nyasaye manie polo, kendo gigolo chike ni joma nie piny ka gisungore.

¹⁰ Omiyo koda ka jo-Nyasaye odok irgi, kendo oyie mamor gi gik moko duto ma giwacho.

¹¹ Giwacho niya, “Nyasaye ok bi ng’eyo! Adier, Ng’ama Duong’ Moloyo ok bi fwenyo!”

¹² Mano e kaka joricho chalo. Gin gi gik moko mang’eny, kendo pile mwandugi medore ameda.

¹³ Kuom mano, a Nyasaye, aritora maler, ma ok amul richo, mana kayiem nono,

¹⁴ nimar achandora pile odiechieng’ duto, ka ikuma okinyi kokinyi.

¹⁵ To ka da bed ni ne asewacho weche ma kamago, to da abedo andhoga ni jogi!

¹⁶ Omiyo ne atemo matek mondo ang’e tiend wachno maber.

¹⁷ To ne odhiera ng’eyo, nyaka ne adonjo e Hekalu mari, eka awinjo gima notimre ni joricho e giko.

¹⁸ Chutho iketogi kuonde makier, mi imiyo gilwar e tho.

¹⁹ Itiekogi ka diemo wang’! Masiche malich lal kodgi nono.

²⁰ A Ruoth Nyasaye, gichalo lek malal nono gokinyi, ma, kichiew, to wiyi osewilgo.

²¹ Kane iya owang’, mi chunya odoko malit,

²² to ne abedo mofuwo ka dhiang’ e nyimi.

²³ Kata kamano, e kinde duto in koda, kimako lweta.

²⁴ Itelona, king’adona rieko, kendo chieng’ giko inirwaka kar duong’.

²⁵ Ere ng’at moro ma an go e polo mak mana in? Kuom mano, ere gimoro machielo ma anyalo dwaro e piny?

²⁶ Parona gi denda nyalo bedo manyap, to in e tekra, A Nyasaye. In kendi e mwanduna nyaka chieng’.

²⁷ Chutho, joma oweyi biro lal nono, kendo initiek jogo ma ok oyie kuomi.

²⁸ An to aonge gi gima berna, moloyo bedo machiegni kodi, yaye Nyasaye. A Ruoth Nyasaye, in ema aseyieri mondo ibedna kar konyruok mondo aland gik moko duto misetimo.