Zaburi 57 - MUMA MALER 2015

Lemo mar resruok e lwet wasigu

¹ Kecha, A Nyasaye! Yie ikecha, nikech aringo iri mondo ayud kar konyruok. Ee, ayueyo e tipo mar bwombeni nyaka masiche duto kadhi.

² Aywak ni Nyasaye Maduong’ Moloyo. En e Nyasaye ma miya gik moko duto madwaro.

³ Obiro dwoka gie polo, mi oresa, kendo enolo joma monja. Nyasaye biro nyisa adierane kod herane mosiko.

⁴ Anindo e kind sibuoche ma dwaro chamo ji. Lekegi to chalo gi ligangla ma dhoge bith.

⁵ A Nyasaye, nyis tekoni gi e kor polo, kendo duong’ni maler bende mondo onenre e piny duto.

⁶ Wasika osechikona obadho mondo omaka, omiyo chunya chandore. Adier, ne gikunyo bur e wang’ yora, to gin giwegi ema ginyumoree.

⁷ Aikora, A Nyasaye, aikora chuth! Anawer kendo anapaki.

⁸ In chunya, chiew! Nyatiti gi orutu, un bende chakuru ywak! An to abiro chiew kogwen.

⁹ A Ruoth Nyasaye, anagoni erokamano e kind ogendini. Ee, anapaki e kind ji,

¹⁰ nimar herani mosiko kod adierani tundo e polo.

¹¹ A Nyasaye, nyis tekoni gi e kor polo, kendo duong’ni maler bende mondo onenre e piny duto!