Zaburi 52 - MUMA MALER 2015

Sunga ma onge tiende

¹ In ng’ama ratego, ang’o momiyo isungori nikech richoni? Hera mar Nyasaye osiko pile nyaka chieng’.

² Ichano timbe ma idwaro hinyogo ji, kendo lewi mihangogo ji bith ka wembe.

³ Ihero timbe maricho moloyo mabeyo kendo miriambo berni moloyo adiera.

⁴ Ihero chwanyo chuny ji gi weche mag miriambo.

⁵ Kuom mano, Nyasaye notieki chuth. Obiro maki, mi oyudhi oko e piny joma ngima!

⁶ Joma oluoro Nyasaye none gima otimoreni, mi ginibed maluor. Gininyieri, ka giwacho niya,

⁷ “Neyeuru ng’at mane ok ogeno kuom Nyasaye, to ogeno mana kuom mwandune mathoth, kendo pakore gi richone!”

⁸ To an, achalo gi yadh zeituni, ma dongo maber e bath od Nyasaye, nimar ageno kuom hera mosiko mar Nyasaye nyaka chieng’.

⁹ A Nyasaye, abiro goyoni erokamano pile kuom gik ma isetimo, kendo ka an e kanyakla mar joma oheri, to anahul ni iber.